5/25/2024
Today from Hiiraan Online:  _
Wararka Maanta- Talaado, Aug 6 , 2013
Xildhibaanno ka tirsan baarlamaanka Somalia oo Maanta gaaray Magaalada Gaalkacyo, iyagoo ka hadlay Socdaalkooda

Talaado, August 06, 2013 (HOL) — Xidhibaanno ka tirsan baarlamaanka Puntland ayaa gellinkii dambe ee maanta gaaray magaalada Gaalkacyo ee xarunta gobolka Mudug, iyagoo sheegay in socdaalkooda uu ku saabsan yahay sidii ay wax uga ogaan lahaayeen dadka ku nool Puntland.

Mudanayaashan oo tiradoodu ahayd toddoba xubnood ayaa waxay kasoo jeedaan dhammaantood Puntland, waxaana socdaalka ay ku tageen Gaalkacyo uu kusoo beegmayaa xilli maamulka Puntland uu ku dhawaaqay inuu xiriirka u jaray dowladda Soomaaliya.

“Socdaalkeennu waa mid la xiriira sidii aan wax uga ogaan lahayn dadka ku nool deegaannada aan ku matalno baarlamaanka, balse uma imaan inaan kala hadalo Puntland go’aanka ay ku gaartay inay xiriirka u jarto dowladda Soomaaliya,” ayuu yiri xildhibaan Maxamed Cabdi Yuusuf oo afhayeen u ahaa xildhibaannadii maanta gaaray Puntland.

Xildhibaannadan ayaa waxay kala yihiin: Xasan Abshir Faarax , Maxamed Cabdi Yuusuf, Cabdiladiif Muuse Nuur, Cali Ismacil Cabdi Giir, Adan Sadiiq Maxamed, Cabdullaahi Bile iyo xildhibaanad Saaqo Aadan Gaas.

Sidoo kale, xildhibaannadan waxay sheegeen in iyagoo ka faa’iideysanaya muddada halka bil ah ee uu baarlamaanku jiro fasaxa inay la joogaan qaar ka mid ah ehelladooda iyo qoysaskooda oo ku nool Puntland.

“Baarlamaanku fasax bil ah ayuu ku jiraan, waxaan doonaynaa inaan inta uu fasaxa yahay uga faa’iideysanayo inaan qoysaskeenna iyo ehelladeena aragno, sidoo kalena aan wax badan ka ogaanno xaaladda dadka aanu ku matalno baarlamaanka” ayuu xildhibaan Yuusuf mar kale u sheegay koox wariyeyaal ah oo uu kula hadlay garoonka diyaaradaha Gaalkacyo.

Dhanka kale, xildhibaan Maxamed Cabdi Yusuf ayaa sheegay inay kulammo la yeelan doonaan isimada iyo waxgaradka Puntland iyagoo kala hadli doona sida ugu wanaagsan ee loo horumarin karo xasilloonida iyo ammaanka Puntland.

Warar hoose oo la helayo ayaa sheegaya in xildhibaannadan lagu wado inay la kulmaan madaxda Puntland si ay ugala hadlaan sidii loo qaboojin lahaa xiisadda u dhexeysa dowladda federaalka iyo Puntland oo dowladda qayb ka ah.

Maxamed Xaaji Xuseen, Hiiraan Online
[email protected]
Muqdisho, Soomaaliya