3/28/2024
Today from Hiiraan Online:  _
Wararka Maanta- Talaado, Aug 6 , 2013
Al-shabaab oo Sanadkii labaad ka Maqan Muqdisho iyagoo Awood u leh weli inay Weerarro ka geystaan Caasimadda


Talaado, August 06, 2013 (HOL) — Maanta oo ay bishan Ogoosto ku beegan tahay lix ayaa waxaa buusamay sannadkii labaad oo Xarakada Al-shabaab ay isaga baxday magaalada Muqdisho ee xarunta Soomaaliya oo ay inteeda badan ka talinaysay muddo saddex sano ah, balse weli waxay Muqdisho ka geystaan falal isugu dilal qorsheysan, qaraxyo ismiidaamin ah iyo weerarro duqeyn ah.

Ciidamada dowladda Soomaaliya iyo kuwa AMISOM oo iskaashanaya ayaa culeys ku saaray Al-shabaab inay isaga baxdo degmooyinka Muqdisho oo ay gacanta ku haysay, iyagoo ugu dambeyn ka baxay 06-dii Ogoosto, 2011.

Dajiraha Midowga Afrika ee Soomaaliya, Maxamed Saalax Anaadiif ayaa ku tilmaamay tallaabadan guul ay gaareen ciidamada dowladda iyo AMISOM, isagoo sheegay in ciidamada Midowga Afrika ka ay sii wadayaan howlaha ay kula dagaalamayaan Al-shabaab.

“Magaalada Muqdisho waxaa dib ugu soo laabatay noloshii caadiga ahayd iyo in dhaqaalaheeda uu sare u kaco. Dukaamadii ayaa dib loo furay muddo dheer kaddib, suuqyada iyo guryaha ayaa dib loo dayactiray. Dad badan oo Soomaali ah ayaan dib ugu soo laabtay dalka, iyadoo duulimaadyadii iman jiray Muqdisho ay aad u kordheen,” ayuu Anaadiif ku yiri warbixin uu soo saaray maanta oo Salaaso ah.

Inkastoo horumarkaas uu sheegay dajire Anaadiif uu magaalada Muqdisho ka jiro; haddana dadka caasimadda ku nool waxay la kulmaan falal kaga imaanaya Al-shabaab oo ay ka mid yihiin dilalka, waxaana baqdin ugu weyn ay haysaa xilligan shaqaalaha dowladda iyo askarta.

Habeen hore waxay u ahayd Muqdisho habeen ka duwan habeennadii ay soo martay tan iyo markii ay Al-shabaab isaga baxday, waxaana ka dhacay in ka badan 20-qarax oo qaarkood lagu weerarya, saldhigyo, xarumaha hay’adaha Turkiga ee Muqdisho iyo guryo ay deggen yihiin xubno ka tirsan dowladda.

“Laba sano ka hor, ciidamada dowladda Somalia iyo kuwa AMISOM waxay la galeen Al-shabaab dagaallo adag,” ayuu yiri Anaadiif oo intaas raaciyay. “Ka saaristoodii Muqdisho waxay horsed u noqotay isbedel siyaasadeed oo dhacay, dastuurka dalka oo la dajiyay iyo wakiillada bulshada oo doortay xukuumad cusub oo dalka hoggaamisa.”

Sidoo kale, danjire Anaadiif wuxuu sheegay in AMISOM ay labadii sano ee la soo dhaafay ay soo gabagabeysay laba waji dagaal oo ay la gashay kooxda Al-shabaab. Waxaana howgalka wajigiisa labaad uu ahaa midkii lagu qabtay magaalada Kismaayo, iyagoo sidoo kale ka howlgala hadda Baladweyne iyo Baydhabo.

“Waxaan diyaar u nahay inaan dowladda Somalia kala shaqeyno sidii looga hortegi lahaa hanjabaadaha ay Al-shabaab ku hayso shacabka. Ciidankeennu waxay awoodooda ciidan u adeegsan doonaan sidii Al-shabaab looga saari lahaa dalka oo dhan, waxaana naga go’an inaan tababarro siinno ciidamada dowladda Soomaaliya si ay awood ugu yeeshaan inay ka horagaan falalka ammaan-darrada ah,” ayuu Anaadiif hadalkiisa kusoo gabgabeeyay.

Xarakada Al-shabaab oo muddo sannado ah dagaallo kula jirtay dowladda Soomaaliya ee hadda jirta iyo kuwii ka horreeyay ayaa dhawaan sheegtay inay sii wadayso dagaallada inta ay uga suurogalayso hadafkooda oo ah in dalka oo dhan ay kusoo rogaan in la isku xukumo shareecada Islaamka.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/6/2013 3:41 PM EST
Talaado, August 06, 2013 (HOL) — Xidhibaanno ka tirsan baarlamaanka Puntland ayaa gellinkii dambe ee maanta gaaray magaalada Gaalkacyo ee xarunta gobolka Mudug, iyagoo sheegay in socdaalkooda uu ku saabsan yahay sidii ay wax uga ogaan lahaayeen dadka ku nool Puntland.

8/6/2013 3:19 PM EST
Talaado, August 06, 2013 (HOL) — Xarunta maamulka Puntland ee Garoowe waxaa maanta soo gaarey wefdi ballaaran oo ka socda wadanka Ingiriisa, kuwaasoo uu horkacayey safiirka cusub ee dalkaas u qaabilsan Soomaaliya Neil Wigan.

8/6/2013 3:00 PM EST
Talaado, August 06, 2013 (HOL) — Ra'iisul wasaarihii hore ee Soomaaliya Prof. C/weli Maxamed Cali Gaas ayaa maanta magaalada Addis Ababa ee xarunta dalka Itoobiya kaga dhawaaqay in uu yahay musharrax u taagan xilka madaxweynenimada ee Puntland.

8/6/2013 10:39 AM EST
Talaado, August 06, 2013 (HOL) — Madaxweynaha Somaliland, Mudane, Axmed Maxamed Maxamuud (Silaanyo), ayaa maanta si kadis ah kormeer shaqo ku soo maray Garoonka Diyaaradaha ee Egal international Airport ee magaaladda Hargeisa oo hada dhismihii Runway-gu uu gebegabo yahay.

8/6/2013 10:15 AM EST
Talaado, August 06, 2013 (HOL) — Kulan looga looga hadlay ammaanka iyo sidii ay wada-shaqeyni u dhexmari lahayd dhallinyarada Soomaaliyeed iyo hay'adaha ammaanka ayaa maanta lagu qabtay degmada Waaberi ee magaalada Muqdisho.

8/6/2013 10:02 AM EST
Talaado, August 06, 2013 (HOL) — Wasiiradda Caafimaadka iyo deegaanka oo booqday goobta Qashinka xoolaha la qalo ka soo hadho lagu shubo ee magaalada Hargeysa, ayaa ka qaybqaatay olole buufin ah oo lagu samaynayey goobaha lagu shubo qashinka xoolaha ka hadho oo ay ka dhasheen cayayaan fidin kara cudurada.

8/6/2013 10:00 AM EST
Talaado, August 06, 2013 (HOL) — Maalmihii u dambeeyay magaalada Hargeysa waxaa si weyn looga dareemayey dadweyne faro badan oo buux dhaafiyey suuqyadda waaweyn ee magaaladda Hargeysa.

8/6/2013 7:19 AM EST
Talaado, August 06, 2013 (HOL) — Kooxo hubeysan ayaa maanta ku toogtay isgoyska Siinaay guddoomiye ku xigeenkii degmada Wardhiigley, Maxamed Axmed Taako, iyagoo sidoo kale dhaawacay ruux ilaalo ahaa oo la socday.

8/6/2013 6:48 AM EST
Talaado, August 06, 2013 (HOL) — Wasaaradda khayraadka dalka Somalia ayaa ku dhawaaqday maanta inay heshiis la gashay sharikadda fadhigeedu yahay dalka Britain oo sahmisa shidaalka, taasoo lagu magacaabo Soma Oil and Gas Exploration LTD, www.somaoilandgas.com.

8/6/2013 6:28 AM EST
Talaado, August 06, 2013 (HOL) — Xili lagu gudo jiro maalmihii ugu bisha Ramadaan ugu dambeeyay, isla markaana jiraan qoysas danyar ah oo u baahan in la gargaaro, ayaa Ururka dhalinyarrada Gargaar waxaa uu kaalmo lacageed gaarsiiyay danyar ah oo ku dhibaateysan magaalada Baladweyne.

8/6/2013 2:38 AM EST
Talaado, August 06, 2013 (HOL) — Maamul-goboleedka Puntland ayaa ku dhawaaqay inay si rasmi ah u hakiyeen xiriirkii kala dhexeeyay dowaldda federaalka Soomaaliya, kaddib markii dowladda Somalia ay ku eedeeyeen inay ka shaqeynayso is-qabqasbi siyaasadeed.

8/6/2013 2:24 AM EST
Talaado, August 06, 2013 (HOL) — Maxkamada Gobolka Maroodi jeex, ayaa min toban sanno ilaa shan sanno ku xukuntay kow iyo labaatan dhalinyaro ah oo kufsi wadaradeed u gaystay laba hablood oo ku nool xaafadda New Hargeysa ee bariga magaaladda Hargeysa.

8/6/2013 2:16 AM EST
Talaado, August 06, 2013 (HOL) — Wadahadallo u dhexeeya maamulka Jubbaland ee uu hoggaaminayo, Sheekh Axmed Madoobe iyo dowladda federaalka Soomaaliya ayaa lagu wadaa inay ka furmaan magaalada Addis Ababa ee xarunta dalka Itoobiya.

8/6/2013 2:11 AM EST
Talaado, August 06, 2013 (HOL) — Xarakada Al-shabaab ayaa faahfaahin ka bixisay weerarro isugu jira qaraxyo, duqeymo iyo kuwo toos ah oo ay habeen ka hor la beegsatay magaalada Muqdisho iyo degmada Baydhabo ee gobolka Bay.