3/28/2024
Today from Hiiraan Online:  _
Wararka Maanta- Khamiis, Jun 13, 2013
Madaxweyne iyo Madaxweyne ku xigeen cusub oo kusoo baxay doorashadii Madaxnimo ee Maamulka Ximan iyo Xeeb

Khamiis, Juun 13, 2013 (HOL) — Madaxweyne iyo madaxweyne ku xigeen cusub ayaa maanta loo doortay maanta maamulka Ximan iyo Xeeb oo ka tiliya deegaanno ka yaalla bartamaha Soomaaliya, waxaana xubnahan cusub ee la doortay maanta u codeeyay 23-ka xubnood ee baarlamaanka maamulkaas uu ka kooban yahay.

Madaxweynaha cusub ee la doortay oo lagu magacaabo, Cabdullaahi Cali Maxamed Kadiye ayaa waxaa la tartamay laba murashax o kale, oo kala ahaa Cismaan Maxamed Cali (Cismaan Dheere) iyo Cali Amiin Sayid Axmed, isagoo codadkiid doorashada oo ahaa kuwo qarsoodi ah ka helay 20-cod, labada murashax ee kale ay kala heleen saddexdii cod ee kale.

Sidoo kale, madaxweyne ku xigeenka cusub oo loo doortay Cabdi Maxamed Axmed ayaanay jirin cid la tartantay, isagoo helay 22-cod oo ka mid ahaa 23-kii cod ee xubnaha baarlamaanka maamulkaas, halka codkii kalena uu noqday mid hallaabay.

“Waxaan ku faraxsanahay xilka la ii doortay, waxaana ballanqaadayaa inaan ku shaqeyn doono cadaalad, kana shaqeyn doono horumarka deegaannada uu maamulka ka taliyo iyo dadka ku nool,” ayuu yiri madaxweynaha cusub ee maamulka Ximan iyo Xeeb.

Labadii murashax ee looga adkaaday doorashada madaxweynenimada oo ka hadlay iyaguna goobta ayaa sheegay inay ku faraxsan yihiin sida uu codku ku dhacay, waxayna xuseen inay u hambalyeynayaan murashaxa la doortay ayna la shaqeyn doonaan.

Goobta ay codeyntu ka dhacaysay ayaa waxaa goobjoog ku ahaa Maxamed Aadan Tiiceey oo ahaa madaxweynihii maamulka Ximan iyo Xeeb iyo xubno ka tirsan maamulkiisii, kuwaasoo iyaguna u hambalyeeyay madaxda cusub ee xilka kala wareegaya.

Maamulka Ximan iyo Xeeb ayaa ka mid ah maamullada ka jira bartamaha Soomaaliya, inkastoo uusan aqoonsi buuxa ka haysan dowladda Soomaaliya ee cusub, waxaana horay safar ugu tagay madaxweynihii hore ee Somalia, Sheekh Shariif Sheekh Axmed.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/13/2013 3:36 PM EST
Khamiis, June 13, 2013(HOL)—Shirkaan waxaa ujeedkiisa ahaa wadatashi ay qowmiyadda ka yeelatay arrimaha Soomaaliya gaar ahaan Jubbooyinka. Shirkaan waxaa kasoo qeyb galey Odayaal, Waayo-arag, Siyaasiyin, Dhalinyaro, Haween iyo culumaa'udiin.

6/13/2013 10:20 AM EST
Khamiis, Juun 13, 2013 (HOL) — Bandhig farshaxameed kii ugu horreeyay noociisa ayay hay’adda CRD ka furtay maanta magaalada Muqdisho, kaasoo socon doona muddo saddex maalmood ah, waxaana xafladda furitaanka goob-joog ka ahaa dad isugu jiray Soomaali iyo ajnabi.

6/13/2013 9:16 AM EST
Khamiis, Juun 13, 2013 (HOL) — Ergayga Qaramada Midoobay ee arrimaha Soomaaliya, Nicholas Kay iyo xubno la socday ayaa maanta tagay Hargeysa si uu kulammo ula yeesho madaxda Somailland oo uu ugu horreeyo Axmed Siilaanyo oo ah madaxweynaha maamulka Somaliland.

6/13/2013 7:38 AM EST
Khamiis, Juun 13, 2013 (HOL) — Wafdi ka socda dalalka Jabuuti iyo Shiinaha ayaa soo gaaray Muqdisho si ay u qiimeeyaan dib u dhis iyo casriyeyn lagu sameeyo dekedda weyn ee Muqdisho oo ah isha ay dowladda Soomaaliya ka hesho dhaqaalaha ugu badan ee gudaha dalka kasoo gala.

6/13/2013 7:17 AM EST
Khamiis, Juun 13, 2013 (HOL) — Hay’adda xuquuqda aadanaha ee Human Rights Watch ayaa baarlamaanka Soomaaliya ugu baaqday inuu xoojiyo sharciga qabayada ah ee ilaalinta xuquuqda aadanaha, uuna kala tashado dhameystirkiisa bulshada Soomaaliyeed.

6/13/2013 3:06 AM EST
Khamiis, Juun 13, 2013 (HOL) — Madaxweynaha maamulka Jubaland Sheekh Axmed Maxamed Islaam (Sheekh Axmed Madoobe) oo magaalada Nairobi ugu warramay wargeyska Standard ayaa sheegay in dhismaha maamulkooda uusan ahayn mid ay ka dambeyso Kenya.