5/26/2019
Today from Hiiraan Online:  _
Wararka Maanta- Talaado, Jun 11, 2013
Howgallo dad badan lagu soo qab-qabtay oo booliiska Somalia iyo AMISOM ay ka Sameeyeen Xaafadda Suuqa Xoolaha


Talaado, Juun 11, 2013 (HOL) — Howgallo lagu soo qabqabtay boqolaal qof oo dhallinyaro ah ayay booliiska Soomaaliya kuwa AMISOM waxay maanta ka sameeyeen degmada Huriwaa ee gobolka Banaadir, gaar ahaan xaafadda Suuqa xoolaha.

Saraakiisha booliiska Soomaalida ee howgalkan ka qaybqaadanaya ayaa sheegay in qaar ka mid ah dadkii lagu qabtay howgalkaas lasii daayay balse ay weli gacantak ku hayaan kuwo kale oo ay uga shakisan yihiin inay xiriir la leeyihiin Al-shabaab.

Xaafadda suuqa xoolaha ayaa intii uu howlgalku socday waxaa la hakiyay dhammaan dhaqdhaqaaqii ganacsiga, dadka iyo gaadiidka iyadoo halkaas ay ku sugnaayeen gaadiidka gaashaaman ee ay wateen ciidamada AMISOM oo ka qaybgalayay howgalka.

Dowladda Soomaaliya iyo AMISOM ayaa dhawaan sheegay in Muqdisho loo baari doono guri-guri si loosoo qabto dad ay sheegeen inay Al-shabaab xiriir la leeyihiin oo ku sugan caasimadda.

Goobjoogayaal ku sugan xaafadda suuqa xoolaha ee degmada Huriwaa ayaa u sheegay warbaahinta inay arkayeen dhallinyaro indhaha laga xiray oo ay sii wadaan ciidamada dowladda iyo kuwa AMISOM.

“Aroornimadii ee saakay ayay ciidamadu soo galeen xafaadda, waxayna guri-guri u baareen xaafadda oo ah mid weyn, guryaha qaarkood ayay ka soo saareen dhallinyaro ku sugnaa,” ayay tiri haweeney lagu magacaabo Nuuro Sheekh oo ka mid ah dadka ku nool degmada Huriwaa.

Ma ahan markii ugu horreysay oo howlgal noocan oo kale ay ciidamada dowladda Soomaaliya iyo kuwa AMISOM ka sameeyaan Muqdisho inkastoo ay weli jiraan falalka dilalka qorsheysan ah oo ay Al-shabaab ka geystaan degmooyinka gobolka Banaadir.

Howlgalka kaddib ayay dadka deegaanka Suuqa Xoolaha waxay sheegeen in dhaqdhaqaaqii ganacsiga, gaadiidka iyo isku socodka dadku uu caadi kusoo laabtay, iyadoo dadka intooda badanna ay hadal hayeen howgalkan.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/11/2013 2:25 PM EST
Talaado, Juun 11, 2013 (HOL) —Axmed Maxamed Islaam (Axmed Madoobe) oo ka mid ah ragga isku haysta xilka madaxweyne ee maamulka Jubbaland ee bishii hore looga dhawaaqay Kismaayo ayaa sheegay inuu diyaar u yahay inuu la shaqeeyo dowladda Soomaaliya ee uu hoggaaminayo Xasan Sheekh Maxamuud.

6/11/2013 1:50 PM EST
Talaado, Juun 11, 2013 (HOL) —Maxaabiis iyo gaadiid muddo dheer ay kala haysteen maamullada Somaliland iyo Khaatumo ayaa makhribnimadii shalay oo Isniin ahayd lagula kala wareegay duleedka degmada Xuddun ee gobolka Sool.

6/11/2013 8:50 AM EST
Talaado, Juun 11, 2013 (HOL) — Maxkamadda gobolka Maroodi jeex, ayaa maanta soo saartay amar ay ku xayirayso wargeyska madaxa banaan ee Hubaal oo Hargeysa ka soo baxa.

6/11/2013 8:22 AM EST
Talaado, Juun 11, 2013 (HOL) — Dab khasaare geystey ayaa abbaare 10:00-kii barqonimo ee maanta ka kacay mid kamid ah xeryaha barakacayaasha ee magaalada Garoowe ee xarunta gobolka Nugaal.

6/11/2013 7:54 AM EST
Talaado, Juun 11, 2013 (HOL) — Madaxda dowladda Soonaaliya ayaa ugu baaqay shacabka Soomaaliyeed inay ka qaybqataan sidii Soonmaaliya looga cirib-tiri lahaa cudurka halista ah ee dabeysha, kaddib markii ay madaxdu ka hadleen kulan ay soo qabanqaabisay wasaaradda arrimaha bulshada oo ka dhacday Muqdisho.

6/11/2013 7:05 AM EST
Talaado, Juun 11, 2013 (HOL) — Ra’iisul wasaaraha Soomaaliya, Cabdi Faarax Shirdoon (Saacid) ayaa sheegay maanta in xiisadaha ka taagan degmada Kismaayo ee gobolka Jubbada Hoose ay ku wajibi doonaan qaab wadahadal iyo nabad ah.

6/11/2013 4:01 AM EST
Talaado, Juun 11, 2013 (HOL) — Tababar soconaya muddo afar maamood ah ayaa wuxuu uga furmay dugsiga tababarrada Booliska Soomaaliyeed ee Jeneral Kaahiye 14-sarkaal oo ah taliyayaasha booliiska Soomaaliyeed ee gobollada dalka.