12/4/2022
Today from Hiiraan Online:  _
Wararka Maanta- Axad, Sept 23, 2012
Ciidamada Midowga Afirka oo sheegay inay isku soo dhiibeen boqolaal dagaalyahan oo ka tirsanaa Xarakada Al-shabaab

Axad, September 23, 2012 (HOL) — Taliska ciidamada AMISOM ayaa sheegay inay isku soo dhiibeen shalay oo Sabti ahayd 200 dagaalyahan oo ka tisran Xarakada Al-shabaab, kuwaasoo ay sheegeen inay kasoo tageen degmada Jowhar ee gobolka Shabeellada dhexe.

Warsaxaafadeed ay AMISOM soo saartay ayay ku sheegtay in dagaalyahannadan ay isku soo dhiibeen ciidamadooda ku sugan deegaanka Garsaale oo 10-km u jira degmada Jowhar, isla markaana Muqdisho kaga beegan dhinaca waqooyi 80-km.

"Dagaalyahannadan waxay isi soo dhiibeen aroornimadii hore ee Sabtidii shalay, waxayna isku soo dhiibeen ciidamada AMISOM ee ku sugan deegaanka Garsaale. Ammnaanka xoogaggaas waxaa la wareegay ciidamada Midowga Afrika," ayaa lagu yiri warsaxaafadeedka.

AMISOM waxay sheegtay in dagaalyahannadan isku soo dhiibay ay ku jiraan laba sarkaal oo sarsare, iyagoo sheegay inay wateen 80 qori oo kuwa fudud ah, ayna soo goosteen kaddib markii ay go'aansadeen inay ka qaybqaatana howgallada looga horjeedo kooxdii ay ka tirsanaan jireen.

"Maanta waxaa caddaatay in Al-shabaab ay qaybsameen laguna jabiyay dagaallada ka socda dalka oo dhan. Soomaaliya waxay ku taagan tahay socotaa dariiqa nabadda iyo horumarka; dhawaanna waxay ka xoroobaysaa dagaallada iyo argagaxa," ayuu warsaxaafadeedka ku yiri taliye ku xigeenka AMISOM, Br. Michael Ondoga.

Dagaalyahan ka tirsanaa xoogagga soo goostay oo la hadlay saxaafadda ayaa sheegay in sababta ay uga soo tageen kooxdii ay ka tirsanaayeen ay tahay kaddib markii ay ku qanci waayeen howshii ay ku jireen; mana bixin faahfaahin intaas ka badan.

"Waxaan ugu yeeraynaa dhammaan kuwa nabadda doonaya ee ka tagaya argagixinta inay hubka dhigaan. Tiro ka mid ah ayaa lasoo xiriiray AMISOM kuwaas oo u sheegay inay doonayaan inay dagaallada joojiyaan. Waxaana kuwaas inay sugi doonto AMISOM ammaankooda, sida kuwii Garsaale isku soo dhiibay oo kale," ayaa lagu soo gabgabeeyay war-saxaafadeed AMISOM ay soo saartay.

Ma jiro hadal kasoo baxay dhinaca Al-shabaab oo ku saabsan in dagaalyahanno ka tirsan xoogaggooda ay isku dhiibeen AMISOM, waxaana tani ay kusoo beegmaysaa iyadoo ciidamada dowladda iyo kuwa Midowga Afrika oo wata taangiyo dagaal iyo hub fara badan ay ku dhawaadeen degmada Jowhar.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
9/23/2012 2:30 PM EST
Axad, September 23, 2012 (HOL) - Magaala madaxda Puntland ee Garoowe waxaa maanta soo gaarey wefdi uu horkacayo wakiilka cusub ee midowga Yurub u qaabilsan Soomaaliya Michal Caravan. Wefdigan oo si diiran loosoo dhoweeyey, waxay xarunta madaxtooyada kulan kula qaateen madaxweyne Cabdiraxmaan Maxamed Faroole, ku-xigeenkiisa Gen. Shire iyo xubno ka tirsan golaha wasiirada.

9/23/2012 9:24 AM EST
Axad, September 23, 2012 (HOL) — Kooxo bastoolado ku hubeysan ayaa xaafadda Suuqa Xoolaha ee degmada Huriwaa ku toogtay laba wiil oo dhallinyaro ah, kuwaas oo aan la garanayn sababta loo dilay iyo cidda dilkooda ka dambeysa.

9/23/2012 8:52 AM EST
Axad, September 23, 2012 (HOL) — Wasiirradda Caafimaadka iyo Beeraha Somaliland ayaa soo dhaweyey 11 dhakhtar oo reer Kuwayt ah oo u yimid Somaliland sidii ay qaliinno kala duwan u sameyn lahaayeenm kuwaasoo shaqadooda ka billaabi doona Isbitaalka Al-Xayaat oo ku yaalla magaalada Boorame ee xarunta gobolka Awdal.

9/23/2012 8:40 AM EST
Axad, September 23, 2012 (HOL) — Waxaa garoonka kubada cagta Cawaale ee degmada Gaalkacyo lagu soo gabagabeeyay tartan kubada cagta ah oo lagu maamuusayay Alle ha u naxatiirteen marxuum Eng Cali Xaaji Shirwac oo kol hore lagu dillay magaalada Baladweyne.

9/23/2012 8:23 AM EST
Axad, September 23, 2012 (HOL) — Dagaal culus oo u dhexeeyo ciidamada dowladda Soomaaliya oo kaashanaya kuwa Kenya iyo Xarakada Al-shabaab ayaa goor-dhawayd ka qarxay deegaanka Janaa cabdalle oo 60 KM dhanka galbeed kaga began magaalada Kismaayo ee xarunta gobolka jubada Hoose.

9/23/2012 8:16 AM EST
Axad, September 23, 2012 (HOL) — Wefti uu hoggaaminayo ergayga cusub ee Midowga Yurub u fadhiyi doona magaalada Muqdisho ayaa booqasho ku yimid magaalada Hargeysa, kaasoo la kulmay madaxweynaha Somaliland, Axmed Maxamed Maxamuud (Siillanayo) iyo shir-guddoonka golaha wakiillada Somaliland.

9/23/2012 7:12 AM EST
Axad, September 23, 2012 (HOL) — Xarakada Al-shabaab ayaa sheegtay inay ka dambeysay dil mudane ka tirsan baarlamaanka Soomaaliya loogu geystay xalay degmada Waaberi ee gobolka Banaadir, kaddib markii ay dabley bastoolado ku hubeysan ay gurigiisa ku weerareen.

9/23/2012 6:59 AM EST
Axad, September 23, 2012 (HOL) — Hay'adda shaqada adduunka ee ILO ayaa ka furtay maanta Muqdisho mashruuc lagu horumarinayo ganacsiga haweenka, taasoo ay ka qaybgaleen mas'uuliyiin ka socda dowladda Soomaaliya iyo xubno ka socday hay'adaha bulshada rayidka Soomaaliyeed.

9/23/2012 6:58 AM EST
Axad, September 23, 2012 (HOL) — Kulankan oo loogu baroordiiqayay wariyeyaashii lagu laayay magaalada Muqdisho ayaa waxa uu ka dhacay Hotel Bin-Ali oo ku yaal xaafadda Eastleigh, waxaana kasoo qeybgalay suxufiyiinta Soomaaliyeed ee ka howlgasha magaalada Nairobi iyo marti sharaf kale.

9/23/2012 6:07 AM EST
Axad, september 23, 2012(HOL): Munaasabad si weyn loo soo agaasimay oo ay ka qeybgaleen dad aad u faro badan, isla markaana lagu taageerayay dowladda cusub ee Soomaaliya ayaa ka dhacday Magaalada Katrineholm ee dalka Sweden.

9/23/2012 1:31 AM EST
Axad, September 23, 2012 (HOL) — Howlgallo lagu soo qabqabtay dad fara badan ayay cidamada amaanka dowladdu xalay ka sameeyeen degmooyinka, Waaberi, Hodan iyo Wadajir, iyadoo ciidamadu ay baaritaanno ku sameynayeen guryaha iyo gaadiidka.

9/23/2012 1:24 AM EST
Axad, September 23, 2012 (HOL) — Waxaa degmada Qardho ee xarunta gobolka Karkaar maalintii labaad ku sugan xubno ka tirsan gudiga madaxa banaan ee doorashooyinka Puntand oo uu horkacayo gudoomiyaha gudigaasi, Dr. Maxamed Xasan Barre.