9/22/2019
Today from Hiiraan Online:  _
Wararka Maanta- Sabti, July 7 , 2012
Guddoomiyaha Ururka Suxufiyiinta Somaliland oo cambaareeyay falal uu sheegay in Guddoomiyaha Gobolka Saaxil uu kula kaco suxufiyiinta Gobolkaas


Sabti, July,7, 2012 (HOL)-Guddoomiyaha ururka Suxufiyiinta Somaliland ee (SOLJA), Xasan Maxamed Yuusuf ayaa cambaareeyey falal guracan oo uu sheegay in badhasaabka gobolka Saaxil kula kacay wariyeyaasha ka hawlgalla gobolkaasi.

“Badhasaabku wuxuu sheegay in wariyeyaasha ka hawlgalla gobolka Saaxil uu doonayo inuu kala jeclaysto, isla markaana amaro xad gudub ku ah xoriyadda warbaahinta kula kacay suxufiyiintaasi ”sidaas waxa yidhi guddoomiyaha SOLJA Xasan Maxamed oo maanta shirjaraa’id ku qabtay hotel Xaraf ee magaaladda Hargeysa, waxaanu sheegay in aanay u dulqaadin Karin ficiladaasi qalafsan ee uu badhasaabka gobolka Saaxil samaynayo. isla markaana marar hore ka codsaday inuu dhibta uu ku hayo wariyeyaasha uu ka daayo.

“gudoomiyaha gobolka Saaxil waxa uu sameeyey kala takoorid uu ku sameeyey inamadda suxufiyiinta ah ee joogga gobolka Saaxil, oo uu yidhaa cidaas mooyee cid kale oo meel dawladu leedahay gali karta oo war ka qaadi karta ma jirto”ayuu raaciyey gudoomiyuhu.

“taas oo macnaheedu tahay kii aan aniga hawshayda fulinayn goobaha wararka ma tagi karo, markii u dambeysay waxa uu marayaa inuu yidhaa qof liisan iga haysan wariye kama noqon karo gobolka, runtii waa wax aad looga yaabo ah in nin gudoomiye gobol yidhaa anigaa aqoonsada oo sharci siinaya wariyaha, gudoomiyaha waxaan leeyahay sida aad u dhaqmaysaa waa mid laga fiican yahay, saxaafaduna maaha mid adiga iyo qayrkaa daba fadhiisanaya, qaar aad yeelan kartidna maaha”ayuu yidhi.

Mar kale isagoo si adag ula hadlaya Badhasaabka Ramaax waxa uu yidhi “Inaan dhimanayo sidaan u ogahay ayaan u hubaa inaad dhiidhi dhexfadhiisanayso oo aad ceeb ka qaadayso haddii aad sidaas u sii socoto, dadkana baritoole ka mid noqon doontida waxaad dhitaysataana waa wax kuu yaalla”

Gudoomiyuhu waxa uu sheegay in haddii uu warbaahinta ka cabanaya uu dariiqa sharciga maro oo uu maxkamadda geeyo dacwadiisa, balse aanu awood u lahayn inuu warbaahinta inta uu doonayo doorto, kuwa kalana diido.

Badhasaabka gobolka Saaxil Maxamuud Cali Saleebaan (Ramaax) ayaa wariyeyaasha qaarkood u diiday inay xafiisyadda dawladda soo galaan, isla markaana wax warar ah ka fidiyaan gobolka, isagoo markii dambana ku soo xidhay inay liisan saxaafadeed ka qaataan xafiiskiisa.

Barkhad-Ladiif M. Cumar, Hiiraan Online 
[email protected]
Hargeysa, Somaliland









Click here
7/7/2012 8:22 PM EST
Sabti, July 08, 2012(HOL): Shirkii sanadlaha ahaa ee Jabhadda xoreynta ONLF ayaa maalintii Jimcaha ahayd ka furmay magaalada Toronto ee dalka Canada. Shirkan oo ay martigelisay taageerayaasha jabhadda ONLF ee dalka Kanada ayaa waxaa ka soo qayb-galay wafuud ka kala yimid qaaradaha Yurub, North America, Australia iyo Bariga dhexe.

7/7/2012 8:32 AM EST
Sabti, July 07, 2012 (HOL) — Mas'uuliyiinta Ahlusunna Waljamaaca ayaa sheegay inay wadaan qorshe ay ku doonayaan inay dib ugu laabtaan degmada Ceelbuur iyadoo Al-shabaabna ay sheegtay inay ka hortagayso weerar walba oo lagu soo qaado degmadaas.

7/7/2012 8:06 AM EST
Sabti, July 07, 2012 (HOL) — Xiriiriyaha Qaramada Midoobay u qaabilsan gargaarka bani'aadamnimo ee Soomaaliya, Mark Bowden ayaa sheegay in xaalado aadamnimo oo khatar ah ay ka jiraan Soomaaliya, isagoo sheegay inay ku ogaadeen xog-ururin dhawaan ka sameeyeen Soomaaliya.

7/7/2012 7:56 AM EST
Sabti, July 07, 2012 (HOL) — Magaalada Baladweyne ee xarunta u ah gobollka Hiiraan waxaa ku sii kordhaya xeryaha ay degan yihiin ama ku nool yihiin dad barakacayaasha ah, kuwaasoo in badan rajo ka qaba in ay gargaar ka heleen hay’addaha samafalka oo bilihii ugu danbeeyay saraakiil ka tirsan si is daba joog ah kormeer ugu tagayeen magaalada.

7/7/2012 7:22 AM EST
Sabti, July 07, 2012 (HOL) — Kooxo bastoolado ku hubeysan ayaa askari ka tirsan waaxda canshuuraha ee dowladda KMG ah ku toogtay xaafadda Laba-dhagax ee degmada Wardhiigley, iyadoo kooxihii dilka geystay ay u suurogashay inay goobta ka baxsadaan.

7/7/2012 7:13 AM EST
Sabti, July 07, 2012 (HOL) — Howgallo ay wadajir uga sameeyeen degmooyin ka tirsan magaalada Muqdisho ayay kusoo qabqabteen boqolaal dhallinyaro ah oo loo haysto inay Al-shabaab xiriir la leeyihiin, waxaana saraakiisha dowladdu KMG ay sheegeen in howgalladan ay yihiin lagu sugayo ammaanka.

7/7/2012 7:04 AM EST
Sabti, July 07, 2012 (HOL) — Diyaarado dagaal oo la aaminsyahay in ay leedahay dowladda Kenya ayaa duqeymo xooggan ka geeystay deegaano ka tirsan gobolka Jubada Hoose, iyadoona la sheegay in diyaaraduhu ay bartilmaameedsanayeen saldhigyo ay xoogagga Al-shabaab ku lahaayeen deegaanadaasi.

7/7/2012 6:57 AM EST
Sabti, July 07, 2012 (HOL) — Madaxweynaha Puntland, Cabdiraxmaan Maxamed Faroole ayaa maanta oo Sabti ah saxiixay xeerka ururada siyaasada Puntland oo ay soo diyaariyeen guddiga doorashada Puntland, toddobaadyo ka horna ay ansixiyeen xildhibaannada maamulkaas.

7/7/2012 6:54 AM EST
Sabti, July 07, 2012 (HOL) — Laba qof ayaa ku geeriyootay qof kalena dhaawac ayaa kasoo gaaray kaddib markii ciidamada dowladda KMG ah ay rasaas ku fureen gaari noociisu ahaa MARK II oo ku socday degmada Baydhabo ee gobolka Bay.

7/7/2012 4:00 AM EST
Sabti, July 07, 2012 (HOL) — Madaxweynaha maamulka Puntland, Cabdiraxmaan Sheekh Maxamed Faroole ayaa sheegay inuu walwal weyn ka qabo dhameystirka heshiiska Roadmap-ka oo uu wax ka saxiixay, isagoo sheegay in shirarka odayaasha ee Xamar ka socda ay xagal-daacin karaan dhameystirka khariidadda nabadda.

7/7/2012 3:55 AM EST
Sabti, July 07, 2012 (HOL) — Dowladda KMG ah ee Soomaaliya ayaa ku eedeeysay Kenya inay si sharci-daro ah baaritaano shidaal uga sameynayso xeebaha ku yaalla dhinaca Konfureed ee Soomaaliya.

7/7/2012 3:12 AM EST
Sabti, July 07, 2012 (HOL) — Taliska ciidamada Midowga Afrika ee (AMISOM) ayaa si rasmi ah ula wareegay hoggaanka ciidamada Kenya ee ku sugan Koonfurta Soomaaliya kaddib munaasabad Jimcihii shalay ka dhacday magaalada Nairobi ee xarunta dalka Kenya.

7/7/2012 2:48 AM EST
Sabti, July 07, 2012 (HOL) — Wasiirka dastuurka iyo arrimaha federaalka DKMG ah ee Soomaaliya, C/raxmaan Xoosh Jabriil ayaa sheegay in qodobka ku saabsan maqaamka ay yeelanayso magaalada Muqdisho dib u eegis lagu sameynayo, isagoo xusay in sharci gaar ah laga soo saarayo.