9/28/2020
Today from Hiiraan Online:  _
Wararka Maanta- Axad, Dec 16, 2012
Madaxweynaha Soomaaliya oo safarkiisii labaad ugu kicitimaya Jabuuti


Axad, December 16, 2012 (HOL) — Madaxweynaha Soomaaliya, Xasan Sheekh Maxamuud ayaa qorsheynaya inuu safarkiisa labaad ku tago dalka Jabuuti maanta oo Axad ah, halkaasoo uu uga qaybgeli doono bandhigga buug afka Soomaaliga ah oo ka dhacaya magaalada Jabuuti.

Madaxweyne Xasan Sheekh oo 10-kii Sepetmber ee sannadkan 2012 loo doortay madaxweynaha dowladda joogtada ah ee Soomaaliya ayaa wuxuu dhamaadkii bishii hore ku tagay dalka Jabuuti safarkiisii ugu horreeyay, isagoo halkaas kula kulmay madaxda dalkaas oo uu ku ammaanay inay gacan weyn siiyeen Soomaaliya.

"Madaxweynaha iyo wafdi uu hoggaaminayo ayaa gallinka dambe ee maanta u ambabaxaya dalka Jabuuti, waxayna casuumaad ka heleen madaxweyaha dalka Jabuuti Ismaaciil Cumar Geelle," ayuu HOL u sheegay mas'uul ka tirsan madaxtooyada Soomaaliya.

Wafdiga madaxweynaha ayaa waxaa ka mid ah wasiirro iyo xubno baarlamaanka ka tirsan, wuxuuna safarkan noqonayaa kii afaraad oo uu madaxweynuhu dalka uga baxo tan iyo markii lasoo doortay xilka muddo hadda laga joogo toban toddobaad.

Dalka Jabuuti ayaa waxaa ka dhacaya xuska afartan guuradii kasoo wareegay markii la qoray afka Soomaaliga, waxaana halkaas lagu soo bandhigi doonaan buugaag ku qoran afka Soomaaliga, kuwaasoo qayb ka ah dadaal lagu xoojinayo qoraalka afka Soomaaliga.

Booqashadan ayaa waxay kusoo beegmaysaa xilli tododbaadkii hore uu booqasho ku yimid Muqdisho guddoomiyaha baarlamaanka Jabuuti, Idiris Aarna'uut Cali iyo xubno ka tisran baarlamaanka Jabuuti, kuwaasoo kulammo la yeeshay madaxda dalka iyo xildhibaannada baarlamaanka.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
12/16/2012 10:55 AM EST
Axad, December 16, 2012 (HOL)- Madaxweynaha Somaliland Iyo Wefti balaadhan oo uu Hoggaminayay, ayaa galabta u kicitimay dalka Jabuuti si uu uga qeyb gallo shirka madaxeedka horumarinta Af-soomaaliga ee PEN oo lagu soo casuumay Madaxweynaha Somaliland.

12/16/2012 7:10 AM EST
Axad, December 16, 2012 (HOL) — Xildhibaannada baarlamaanka Soomaaliya ayaa maanta cod aqlabiyad ah ku ansixiyay qorshe howleedka ay labada sano ee soo socota ku shaqeyn doonaan, iyadoo saddex mudane oo ka mid ah kuwii kulankaas soo xaadiray ay diideen qorshaha.

12/16/2012 6:49 AM EST
Axad, December 16, 2012 (HOL) —Xaflad xarig looga jaray shirkad lagu magacaabo Fruitsome oo soo saari doonta islamarkaana dhoofin doonta Muuska ayaa maanta ka dhacday Hotelka Ambassador ee Magaalada Muqdisho.

12/16/2012 6:35 AM EST
Axad, December 16, 2012 (HOL) — Kooxo hubeysan ayaa laba qof oo qoxooti ah xalay siyaabo kala duwan ugu dilay xerada IFO oo ka mid ah xeryaha qoxootiga ee ku yaalla deegaanka Dhadhaab ee dalka Kenya, iyadoo booliisku ay sheegeen inay baxsadeen kooxihii dilalkan geystay.

12/16/2012 5:48 AM EST
Axad, December 16, 2012 (HOL) — Mudaharaad balaadhan, ayaa ilaa maanta ka socday xaafaddo ka tirsan magaaladda Hargeysa, gaar ahaan waqooyiga magaaladda, kuwaas oo diidan kala bedel lagu sameeyey xildhibaanaddii soo baxay ee golaha deegaanka, kuwaas oo xildhibaankii ay taageerayeen oo soo baxay lagu bedelay xidhibaanno kale oo marki hore la sheegay inay hadheen.

12/16/2012 1:53 AM EST
Axad, December 16, 2012 (HOL) — Dowladda Kenya ayaa ugu baaqday dadka aan sharciga lahayn ee magangalyo doonka ah iyo kuwa qoxootiga ah inay ku laabtaan xeryaha Qoxootiga ee Dhadhaab iyo Kaakumo, iyadoo sheegtay in qorshahan uu ka mid lagu adkeynayo ammaanka Kenya.

12/16/2012 1:24 AM EST
Axad, December 16, 2012 (HOL) —Bambaanooyin kuwa gacanta laga tuuro ah ayaa xalay lagu weeraray saldhigga dhexe ee magaalada Kismaayo halkaas oo fariisin u ah ciidamada dowladda Soomaaliya iyo kuwa Raaskaambooni.

12/16/2012 1:09 AM EST
Axad, December 16, 2012 (HOL) — Ciidamada dowladda Soomaaliya ee ku sugan gobolka Bay iyo kuwa Itoobiya ee caawinaya ayaa fariisimo ka sameystay gudaha iyo daafaha degmada Ufuroow, iyadoo cabsi weynna ay ka jirto degmada Diinsoor oo 17-km u jirta Ufuroow.