8/14/2020
Today from Hiiraan Online:  _
Wararka Maanta- Axad, Dec 16, 2012
Kenya oo Dadka aan Sharciga lahayn ugu Baaqday inay ku Laabtaan Xeryaha Qoxootiga Dhadhaab iyo Kaakumo


Axad, December 16, 2012 (HOL) — Dowladda Kenya ayaa ugu baaqday dadka aan sharciga lahayn ee magangalyo doonka ah iyo kuwa qoxootiga ah inay ku laabtaan xeryaha Qoxootiga ee Dhadhaab iyo Kaakumo, iyadoo sheegtay in qorshahan uu ka mid lagu adkeynayo ammaanka Kenya.

Dalka Kenya ayaa waxaa tan iyo sannadkan billowgiisa ka dhacayay qaraxyo ay ku waxyeelloobeen dad shacab ah iyo ciidamo waxaana laamaha ammaanka ay dusha uga tuureen weerarradaas kooxo gacan-saar la leh Al-shabaab.

"Dhammaan Soomaalida qoxootiga ah iyo kuwa kale ee magan-galyo doonka ah waa inay tagaan xeryaha qoxootiga Dhadhaab. Qoxootiga kasoo jeeda dalalka kalena waa inay iyaguna tagaan xerada Kaakuma," ayuu yiri madaxa waaxda arrimaha qoxootiga Kenya, Sora Katelo.

Katelo wuxuu sheegay in la xiray dhammaan xarumihii deegaameynta iyo diiwaan-gelinta qoxootiga, oo sheegay in 60% qoxootiga ku nool dalka Kenya ay ku sugan yihiin magaalooyinka waaweyn, sida magaalada Nairobi.

Arrintan ayaa waxay saameyn weyn ku yeelanaysaa qoxootiga Soomaalida ah ee ku nool dalka Kenya, kuwaasoo intooda badan maal fara badan geliyay magaalooyinka ay ka mid yihiin Nairobi, waxayna walaac xooggan ka muujinayaan qorshahan cusub ee Kenya ay soo saartay.

"Markii uu qarax ka dhaco Islii ama Nairobi waxaa lasoo abbaaraa Soomaalida, ma garanayno sababta dusha nalooga saarayo dhibaatooyinka ka dhacaya dalkan, si aad ah ayaan uga walaacsannahay xaaladda jirta," ayay tiri gabar ka mid ah kuwa ganacsiga ku haysta Nairobi oo saxaafadda Kenya la hadashay.

Isku-dhacyo ayaa toddobaadyadii lasoo dhaafay dhexmaray dadka Soomaalida ah ee ku nool Islii iyo dad u dhashay dalka Kenya oo doonayay inay hantidooda boob u geystaan, kaddib markii uu qarax ka dhacay xaafaddaas.

Mas'uul u hadlay hay'aadda qoxootiga adduunka ee UNHCR ayaa sheegay inay kala hadlayaan dowladda Kenya qorshaha cusub ee ay qoxootiga dib ugu celinayso, iyadoo lagu wado in labada dhinac ay maanta wada-fariistaan.

Maxamed Xaaji Xuseen, Hiiraan Online
[email protected]
Muqdisho, Soomaaliya









Click here
12/16/2012 10:55 AM EST
Axad, December 16, 2012 (HOL)- Madaxweynaha Somaliland Iyo Wefti balaadhan oo uu Hoggaminayay, ayaa galabta u kicitimay dalka Jabuuti si uu uga qeyb gallo shirka madaxeedka horumarinta Af-soomaaliga ee PEN oo lagu soo casuumay Madaxweynaha Somaliland.

12/16/2012 7:10 AM EST
Axad, December 16, 2012 (HOL) — Xildhibaannada baarlamaanka Soomaaliya ayaa maanta cod aqlabiyad ah ku ansixiyay qorshe howleedka ay labada sano ee soo socota ku shaqeyn doonaan, iyadoo saddex mudane oo ka mid ah kuwii kulankaas soo xaadiray ay diideen qorshaha.

12/16/2012 6:49 AM EST
Axad, December 16, 2012 (HOL) —Xaflad xarig looga jaray shirkad lagu magacaabo Fruitsome oo soo saari doonta islamarkaana dhoofin doonta Muuska ayaa maanta ka dhacday Hotelka Ambassador ee Magaalada Muqdisho.

12/16/2012 6:35 AM EST
Axad, December 16, 2012 (HOL) — Kooxo hubeysan ayaa laba qof oo qoxooti ah xalay siyaabo kala duwan ugu dilay xerada IFO oo ka mid ah xeryaha qoxootiga ee ku yaalla deegaanka Dhadhaab ee dalka Kenya, iyadoo booliisku ay sheegeen inay baxsadeen kooxihii dilalkan geystay.

12/16/2012 5:48 AM EST
Axad, December 16, 2012 (HOL) — Mudaharaad balaadhan, ayaa ilaa maanta ka socday xaafaddo ka tirsan magaaladda Hargeysa, gaar ahaan waqooyiga magaaladda, kuwaas oo diidan kala bedel lagu sameeyey xildhibaanaddii soo baxay ee golaha deegaanka, kuwaas oo xildhibaankii ay taageerayeen oo soo baxay lagu bedelay xidhibaanno kale oo marki hore la sheegay inay hadheen.

12/16/2012 5:47 AM EST
Axad, December 16, 2012 (HOL) — Madaxweynaha Soomaaliya, Xasan Sheekh Maxamuud ayaa qorsheynaya inuu safarkiisa labaad ku tago dalka Jabuuti maanta oo Axad ah, halkaasoo uu uga qaybgeli doono bandhigga buug afka Soomaaliga ah oo ka dhacaya magaalada Jabuuti.

12/16/2012 1:24 AM EST
Axad, December 16, 2012 (HOL) —Bambaanooyin kuwa gacanta laga tuuro ah ayaa xalay lagu weeraray saldhigga dhexe ee magaalada Kismaayo halkaas oo fariisin u ah ciidamada dowladda Soomaaliya iyo kuwa Raaskaambooni.

12/16/2012 1:09 AM EST
Axad, December 16, 2012 (HOL) — Ciidamada dowladda Soomaaliya ee ku sugan gobolka Bay iyo kuwa Itoobiya ee caawinaya ayaa fariisimo ka sameystay gudaha iyo daafaha degmada Ufuroow, iyadoo cabsi weynna ay ka jirto degmada Diinsoor oo 17-km u jirta Ufuroow.