8/23/2019
Today from Hiiraan Online:  _
Wararka Maanta- Axad, Jun 10, 2012
Guddiga Madaxa-Bannaan ee Qabyo-Qoraalka Dastuurka oo sheegay in Dastuurku uu weli Gacantooda ku jiro Meel Wanaagsanna Marayo


Axad, June 10, 2012 (HOL) — Guddiga madaxa-bannaan ee dastuur u sameynta Soomaaliya ayaa warsaxaafadeed ay maanta kasoo saareen kulan ay ku yeesheen Muqdisho waxay ku sheegeen in dastuurka uu weli gacantooda ku jiro, ayna bishan 16-keeda u gudbin doonaan qaybaha bulshada si ay talooyin uga bixiyaan.

War-saxaafadeedka guddigan ayaa imaanaya iyadoo wasiirka dastuurka iyo arimaha federaalka DKMG ah ee Soomaaliya, C/raxmaan Xoosh Jabriil uu sheegay in maalinta Talaadada ah ee soo socota nuqullada dastuurka loo gudbin doono odayaasha dhaqanka.

"Qabyo-tirka iyo dhameystirka dastuurka waxaa u xilsaaran guddiga madaxabanaan ee qoraalka dastuurka, howsha wasaaradduna waa inay u fududeyso guddiga sidii uu howlihiisa u gudan lahaa, balse wax shuqul ah kuma lahan qabyo-qoraalka dastuurka," ayaa lagu yiri warka uu guddigu soo saaray maanta oo Axad ah, kaasoo uu saxiixnaa guddoomiyaha guddigan C/llaahi Xasan Jaamac.

Guddiga ayaa waxay shirkooda kasoo saareen afar qodob oo u qoraan sidan:

  1. Bishan Juun 16-keeda guddigu wuxuu u gudbin doonaa qormo-labaadka qabyo-qoraalka dastuurka culummaa'uddiinka, odayaasha dhaqanka, dhaqaale-yahannada iyo qareennada Soomaaliyeed si ay u darsaaan talooyin waafi ahna uga soo jeediyaan, si loo turxaan-bixiyo qabyo-qoraalka dastuurka.
  2. Bishan 20-keeda sida qorshuhu yahay waxaa loo gudbin doonaa nuqulka kama dambeysta ah golaha ansixinta dastuurka oo guddiga madaxa-bannaan iyo guddiga khuburadu ay ka kaalmeyn doonaan ka doodidda nuqulka.
  3. Guddigu wuxuu horay ula socodsiiyay marxaladaha dastuurka madaxda sare ee dalka si ay talooyinkooda uga dhiibtaan. Talooyinkoodii oo mideysanna waxay u soo gudbiyeen guddiga madaxa-bannaan ee dastuurka iyo khuburada.
  4. Guddigu wuxuu ka qaybgaleen qado-sharafeed odayaasha-dhaqanka uu u fidiyay madaxweynaha Soomaaliya, Sheekh Shariif Sheekh Axmed, waxaana guddoomiyaha guddiga madaxa-bannaan C/llaahi Xasan Jaamac uu ka sheegay kulankaas jadwalka loogu talo-galay inuu ku socdo dhameystirka dastuurka. iyadoo madaxweynuhuna uu guddiga u qiray inay yihiin kuwa keliya oo sharciyada u leh dhameystirka iyo bandhigidda dastuurka.

Sidoo kale, guddigu wuxuu warsaxaafadeedkiisa ku sheegay in dastuurka uu ku jiro gacantooda, cid kale oo howshaas loo xilsaarayna aysan jirin, waxayna xuseen in wasaaraddu ay howsheeda tahay fududeyn oo keliya.

Ugu dambeyn, guddiga madaxa-bannaan ee dastuurka waxay warsaxaafadeedka ku sheegeen in guddiga khuburada ah oo ay isla shaqeeyaan ay ku mideysan yihiin war-murtiyeedkan ay uga hadlayaan dhameystirka qabyo-qoraalka dastuurka.

Maxamed Xaaji Xuseen, Hiiraan Onilne
[email protected]
Muqdisho, Soomaaliya










Click here
6/10/2012 10:07 AM EST
Axad, June 10, 2012(HOL): Shirkii looga hadlayay arrimaha ammaanka iy o nabadgelyada dalalka Geeska Afrika ee ka socday Magaalada Lund ee dalka Sweden ayaa maanta la soo gebagebeeyay, iyadoo uu socday muddo seddex maalmood ah.

6/10/2012 9:36 AM EST
Kulan ay soo qabanqaabisay wasaarada dastuurka Soomaaliya ayaa waxaa isugu yimid gudiga loo saaray dib u habaynta dastuurka oo ay xubno ka yahiin wakiilo ka kala socda saxiixayaasha Roadmapka.

6/10/2012 8:12 AM EST
Axad, June 10, 2012 (HOL) — Madax dhaqameedka iyo waxgaradka gobolka Awdal, ayaa ku baaqay shir Qaadhaan ururin ah oo loogu gurmanayo dadka ay abaaruhu saameeyeen ee ku dhaqan gobolada Awdal iyo Selel, kuwaas oo bilihii u dambeeyey laga soo sheegayey in xaalad aad u adag oo dad iyo duunyaba ku jiraan ay ka jirto deegaanadaasi.

6/10/2012 7:09 AM EST
Axad, June 10, 2012 (HOL) — Xukuumadda Somaliland, ayaa iska fogaysay inay wax lug ah ku lahayd go’aankii maxkamadda gobolka Hargeysa ka soo baxay ee lagu xukumay masuuliyiintii lagu eedeeyey lunsiga Raashinka Mucaawimadda, taas oo baryihii u dambeeyey xildhibaano ka tirsan Baarlamaanka Somaliland ku eedeeyeen inay xukuumaddu farogalisay kiiskaasi.

6/10/2012 7:07 AM EST
Axad, June 10, 2012 (HOL) — Wafdi uu hoggaaminayo kaaliyaha xogyaha arrimaha dibadda Mareykanka ee arrimaha Afrika, Johnnie Carson ayaa soo gaaray Muqdisho iyagoo kulammo la leh madaxda dowladda KMG Soomaaliya.

6/10/2012 6:40 AM EST
Axad, June 10, 2012 (HOL) — Mas’uuliyiinta ka tirsan maamulka gobollka Hiiraan iyo xubno isugu jira qeybaha bulshada oo ay ka mid yihiin odayaal dhaqameed, ayaa maanta ka dhoofay magaalada Beledweyne ee xarunta gobolka Hiiraan.

6/10/2012 6:35 AM EST
Axad, June 10, 2012 (HOL) — Wasiirka amniga gudaha Kenya Prof George Saitoti iyo kuxigeenkiisa Orda Ojode iyo afar kale ayaa maanta ku dhintay shil diyaaradeed oo ka dhacay Duleedka magaalada Nairobi ee caasimadda dalka Kenya.

6/10/2012 3:45 AM EST
Axad, June 10, 2012 (HOL) — Dowladda Jabuuti ayaa sheegtay inay qayb weyn ka qaadanayso dadaallada caalamka ee lagu doonayo in dib loogu soo celiyo nabaddii iyo kala dambeyntii ka jirtay Soomaaliya kaddib 21-sano oo dagaallo ay ka jireen.

6/10/2012 3:40 AM EST
Axad, June 10, 2012 (HOL) — Saraakiisha hogaamineysa ciidmaada dowladda KMG ee gobolka Gedo ayaa sheegay in dhawaan ay duulaan ku yihiin magaalooyinka Buurdhuubo iyo Baardheere oo ay gacanta ku hayaan xoogagga Al-shabaab.

6/10/2012 3:07 AM EST
Axad, June 10, 2012 (HOL) — Wararka laga helayo degmada Ceelbuur ee gobolka Galguduud ayaa waxay sheegayaan in ciidamadii Itoobiya iyo kuwii Ahlusunna ee ku sugnaa ay saakay isaga baxeen degmadaas, iyadoo ay gudaha u galeen xoogagga Al-shabaab.