Ciidanka Booliska Puntland oo Xoog ku soo furtay Nin Jarmal ah oo afduub loo haystay

Isniin, September 22, 2008(HOL): Ciidanka Booliska Dowlad Goboleedka Puntland ayaa maanta xoog ku soo furtay Nin u dhashay Dalka Jarmalka, kaasi oo ay kooxo dablay ah habeenkii Sabtid ahayd   ka afduubteen Magaalada Boosaaso ee Xarunta u ah Gobolka Bari.
 
Hawlgalka lagu soo furtay Ninkan Ajnabiga ah waxaa ku dhaawacmay mid ka mid ah afduubayaashi sida uu saxaafadda u sheegay Guddoomiyaha Gobolka Bari Muuse Geelle Faroole.
 
Guddoomiyaha Gobolka Bar i waxaa uu intaas ku daray  in gacanta lagu soo dhigay af-duubayaashii Ninkani Ajnabiga ah oo lix gaaray, kuwaasi oo laga soo qabtay Buuraha Dhaadheer ee Gobolka Bari.
 
Maamulka Gobolka Bari ayaa tilmaamay in ay aad u Wanaagsan tahay xaaladda Caafimaad  ee  labada Lamaane, iyadoo xaaskiisana ay tahay Muwaadinad u dhalatay Dalka Somalia.
 
Soo furashada la soo furtay Ajnabigan u dhashay Dalka  Jarmalka  Iyo Xaaskiisa  waxaa soo dhaweeyay Dhamaan Shacabka Puntland ,iyadoo hore soo furashada ninkani ay gacan ballaaran ka gaysteen NabadoonnadaGobolkaasi.
 
Isku soo wada duuboo Soo furashada Lamaanayaashan ayaa waxa ay ku soo aadeysaa, xilli afduubyada Badda iyo kuwa Berigaba waqtiyadii la soo dhaafay ay ku soo badanayeen deegaanno badan oo ka mid ah Puntland.
 
Faysal Maxamed Xasan(Boston), Hiiraan Online
[email protected]
Garowe ,Somalia