Safiirka Soomaaliya u fadhiya Kenya oo gacan ka heystay sii deynta Lamaanayaal Jarmalka u dhashay oo Af-duub loogu heystay Deegaano ka tirsan Gobolka Sanaag

Safiirka Soomaaliya u fadhiya Dalka Kenya-Maxamed Cali Ameerika

Sabti, August 09, 2008(HOL): Safiirka Soomaaliya  u fadhiya dalka Kenya Danjire Maxamed Cali Ameerika ayaa isagoo kaashanayay Maamulka Puntland iyo Odayaal iyo Waxgarad ka soo jeeda Degmada Laas-Qoray waxaa uu ku guuleystay in la sii daayo oo ay xoriyaddoodii dib u helaan Lamaanayaal Jarmalka u dhashay oo muddo labo bilood ah af-duub loogu heystay Deegaanno ka tirsan Degmada Laas-qoray ee Gobolka Sanaag.

Safiirka oo isagoo ku sugan Magaalada Boosaaso ee Gobolka Bari la soo xiriiray HOL  ayaa wuxuu sheegay in Lamaanayaasha Jarmalka u dhashay oo lagu kala magacaabo Jurgen Gustev Kontner iyo Sabine Ilse Merz ay xaaladdooda wanaagsan tahay isla markaana uu galabta u kaxeyn doono Magaalada Nairobi ee Dalka Kenya, kadibna uu ku wareejin doono Safaaradda Jarmalka ee Magaalada Nairobi.

Safiirka ayaa sheegay in uu muddo seddex maalmood ah oo uu ku sugnaa Magaalada Boosaaso uu ku howlanaa sidii loo sii deyn lahaa Lamaanayaashaas Jarmalka u dhashay, wuxuuna sheegay in uu ugu dambeyntii ku guuleystay in la sii daayo, isagoo arrinta sii deyntana uga mahadceliyay Madaxda maamulka Puntland iyo weliba Odayaal ka soo jeeda Deegaankii lagu heystay Labada Lamaane.

Safiirka Soomaaliya u fadhiya Dalka Kenya Maxamed Cali Ameerika ayaa wuxuu yahay Safiirka ugu shaqada badan Safiirrada Dowladda Federaalka u fadhiya Dalalka Caalamka, waxaana taasi marag muujin u ah sida uu mar kasta ula socdo xaaladda Dadka iyo Dalka Soomaaliya haddii ay ahaan lahayd Arrimaha Diblumaasiyadda iyo weliba Arrimaha kale ee ka socda gudaha Soomaaliya.

Lamaanayaasha la sii daayay-Jurgen Gustev Kontner iyo Sabine Ilse Merz

Safiirka ayaa lagu xusuustaa gurmad uu u fidiyay Dad badan oo ka barakacay Gudaha Soomaaliya, kuwaasi oo iyagoo ku dhibaateysan Xadka u dhaxeeya  Soomaaliya iyo Kenya uu u geeyay Raashin Mucaawino ah oo ay dadkaas aad ugu farxeen markii loo qeybiyay, sidoo kalena wuxuu Safiirka muddo todobaad ah ku hayay Garoonka Diyaaradaha Jomo Kenyata Dad Soomaaliyeed oo ay soo qaldeen qaar ka mid ah Shirkadaha Diyaaradaha ee ka howlgala Dalka Soomaaliya, kuwaasi oo laga soo celiyay Garoonka Diyaaradaha Entebbe ee dalka Uganda, iyadoo sababtaasina ay lahayd Shirkadda Diyaaraddii ay la socdeen oo aan dadkaas u dhameystirin tas-hiilaadkii dhinaca safarka ee ay u baahnaayeen.

Dadkaas Garoonka Jomo Kenyata ku xayirnaa oo tiradooda gaarysay 50 ruux, isla markaana ka koobnaa dadka Bulshada ugu nugul sida Haweenka, Caruurta iyo Dadka Waayeelka ah ayaa waxay ka heleen Safaaradda Soomaaliya ee Kenya daryeel kasta oo ay u baahnaayeen haddii ay ahaan lahayd raashin ay cunaan, biyo ay cabaan iyo weliba daweyn.

Salaad Iidow Xasan (Xiis), Hiiraan Online
[email protected]
Mogadishu, Somalia