2014-10-31
Today from Hiiraan Online:  _
Wararka Maanta- Talaado, Nov 20, 2012
Dad fara badan oo ku dhaawacmay Rasaas ay Milateriga Kenya ku fureen dad shacab ah oo ku sugnaa Bartamaha Gaarisa


Talaado, November 20, 2012 (HOL) — Ugu yaraan 15-qof ayaa ku dhaawacmay rasaas ay milateriga Kenya ku fureen maanta dad shacab ah oo isugu soo ururay bartamaha magaalada Gaarisa ee gobolka Waqooyi-bari-Kenya, halkaasoo tan iyo shalay ay ka socdeen rabshado ka dhashay saddex askari oo la dilay.

Goobjoogayaal ku sugan degmadaas ayaa sheegay in ciidamada Kenya ay rasaas ku fureen dadka shacabka ah oo isugu soo ururay suuq lagu magacaabo Suuq Mugdi oo xalay gubtay, iyadoo dadkii ku dhaawacmay la dhigay isbitaalka degamdaasi.

Xidhibaan Aadan Barre Ducaale oo laga soo doorto degmadaas ayaa sheegay inay dowladda Kenya ka jeesatay dhibaatada ay ciidamada milaterigu ka wadaan Gaarisa, isagoo ka dalbaday wasiirka gaashaandhigga Kenya, Maxamed Yuusuf Xaaji inuu ciidamada milateriga ah ka saaro degmadaas.

"Haddii saddex askari oo la dilay oo keliya magaalada loo gubayo, haweenka loo kufsanayo dadkana loo dhibaateynayo waa mid aan innagu ka tashanayno, balse waxaan u sheegaynaa wasiirka gaashaandhigga inay ciidamadooda la baxaan, haddii kale waxaan ogeysiinaynaa inaan iyaga iyo innagu wada deggenaan doonin magaalada," ayuu yiri Xildhibaan Aadan Barre.

Waxgarad iyo culummo ka hadlay rabshadaha ka taagan Gaarisa ayaa sheegay inay wax lala yaabo tahay in askar la dilay oo keliya loo baabi'iyo magaalada Gaarisa ee gobolka Waqooyi-bari. Haddii wasiirka gaashaandhigga uusan waxba ka qaban karin arrintan waxaan ka dalbanaynaa inuu iscasilo.

Madaxa isbitaalka Gaarisa Dr. Muuse ayaa VOA-da u sheegay in 15 ruux oo qaba dhaawacyo kala duwan lasoo gaarsiiyay isbitaalka. Iyadoo dadka dhaawacyadu ay soo gaareen ay ka mid yihiin arday ay ciidamadu ugu galeen iskuulladii ay wax ku baranayeen.

"Innagoo iskuulka joogna kuna jirna imtixaan ayay ciidamadu soo galeen iskuulka, rasaas ayay nagu fureen, aniga gacanta ayay iiga dhacday, arday kale oo fara badanna dhaawacyo kala duwan ayaa gaaray," ayuu yiri arday magaciisa ku sheegay Aadan Dhaqane oo ka mid ahaa dadkii dhaawacooda la geeyay isbitaalka.

Haween ka mid ah kuwii waxyeelladu kasoo gaartay howgallada ay ciidamada Kenya ka wadaan magaalada Gaarisa iyo kuwo ganacsigooda uu ku gubtay suuqii weynaa ee magaaladaas ayaa ku eedeeyay madaxweynaha Kenya inuu isagu mas'uul ka yahay dhibaatada lagu hayo shacabka magaalada Gaarisa ayna isaga guuri doonaan haddii aan dhaqanka wax laga bedelin.

Magaalada Gaarisa ee gobolka Waqooyi-Kenya ayaa waxaa dhawaanahan ka dhacayay falal ammaan-darro ah oo kala duwan, kuwaasoo u badnaa dilal kala duwan oo loo geystay ciidamada dalka Kenya.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

2012-11-20 9:28 AM EST
Talaado, November 20, 2012 (HOL) —Kulan ballaaran oo looga hadlayay sidii loo xallin lahaa rabshadaha kasoo cusboonaaday xaafadda Islii ee u dhexeeya Soomalida Islii ku dhaqan iyo kooxo dhalinyaro ah oo ka yimid xaafadda Madari islamarkaasina ka careysnaa qaraxii ay dadka badan ku dhinteen ee gudaha xaafadda Islii lagula eegtay gaari Bas ah.

2012-11-20 9:06 AM EST
Talaado, November 20, 2012 (HOL) — Madaxweynaha Soomaaliya, Mudane Xasan Sheekh Maxamuud ayaa maanta xafiiskiisa ku qaabilay wafdi ballaaran oo ka socday laamaha kala duwan ee Qaramada Midoobay.

2012-11-20 8:25 AM EST
Talaado, November 20, 2012 (HOL) — Wasiirka difaaca Soomaaliya, Cabdixakiin Maxamuud Xaaji Fiqi oo ka hadlayay waxyaabaha ay qaban doonto wasaaraddiisa ayaa sheegay inay ku wajahan yihiin degmada Jowhar ee gobolka Shabeellada dhexe oo ay ka taliso Al-shabaab.

2012-11-20 8:02 AM EST
Talaado, November 20, 2012 (HOL) — Inkastoo tababarka loo soo xiray saraakiisha iyo ciidamada maamulka gobollka Hiiraan uu socday mudo gaaban, ayeey haddana saraakiisha ciidamada AMISOM sheegeen in uu ahaa mid casri ah oo ka faa’ideen intii ka qeyb-qaadatay.

2012-11-20 7:16 AM EST
Talaado, November 20, 2012 (HOL)-Magaalada Gaalkacayo ee xarunta gobolka Mudug waxaa xalay lagu diley Nabad-doon si weyn loo yaqaaney , laguna magacaabi jirey Aadan Faarax Dheere. Rag Baaskoolado ku hubeysnaa oo aan haybtooda la aqoonsan ayaa la sheegay in ay toogteen.

2012-11-20 2:44 AM EST
Talaado, November 20, 2012 (HOL) — Madaxweynaha Soomaaliya, Xasan Sheekh Maxamuud ayaa si adag u cambaareeyay weerar bambaano oo Axaddii lagu qaaday gaari kuwa rakaabka qaada ah oo marayay bartamaha Nairobi, weerarkaas oo ay ku dhinteen sagaal qof ayna ku dhaawacmeen in ka badan 30-qof oo kale.

2012-11-20 2:43 AM EST
Talaado, November 20, 2012 (HOL) — Beesha Cali Yacquub ee Abgaal ayaa ku caleemo saaratay Muqdisho nabaddoon kaddib kulan ay qaybgaleen waxgarad, culimaawidiin, siyaasiiyiin iyo oo shalay oo Isniin ahayd lagu qabtay magaalada Muqdisho ee xarunta Soomaaliya.

2012-11-20 2:29 AM EST
Talaado, November 20, 2012 (HOL) —Ciidamada ammaanka Kenya ayaa howgallo ay shalay ilaa xalay ka fuliyeen magaalada Garissa ku qabqabtay boqollaal qof oo reer Garissa ah, kadib markii shalay sedex askari lagu dilay magaaladaasi.

2012-11-20 1:31 AM EST
Talaado, November 20, 2012 (HOL) —Waxaa saaka xaalad deganaan ah laga dareemayaa xaafadda Islii oo labadii maalmood ee ugu danbeeyay ay ka jireen rabashado u dhexeeyay Soomaalida degan xaafadda iyo dad ka careysan qaraxii ay dadka badan ku dhinteen ee ka Dhacay Isllii.