Talaado, December 2, 2025 (HOL) - Maamulka Trump ayaa baaraya in lacago canshuur ah oo Minnesota laga qaaday ay ku dambeeyeen Al-Shabaab, sida uu sheegay Xoghayaha Dowladda ee Maaliyadda, Scott Bessent, Isniintii.
Bessent ayaa bartiisa X ku qoray in Wasaaradda Maaliyaddu ay baarayso eedeymo sheegaya in maamul-xumada dowladda Biden iyo Guddoomiyaha Minnesota Tim Walz awgeed, canshuurtii ay bixiyeen shacabka Minnesota laga yaabo in loo weeciyay kooxda Al-Shabaab.
Xoghayaha Maaliyadda ayaa lala wadaagay warbixin 19-kii November ka soo baxday warbaahinta City Journal oo ah wargeys muxaafid ah, taas oo ku andacoonaysa in malaayiin doollar oo ka yimid barnaamijyada daryeelka bulshada ee gobolka Minnesota ku dhaceen gacanta kooxda Al-Shabaab.
Iyada oo soo xiganeysa ilo ka tirsan booliska. Siyaasiyiin Republican ah oo Minnesota ka tirsan, oo uu ku jiro Congressman Tom Emmer, ayaa ku cadaadiyay dacwad-oogayaasha federaalka inay baaritaan furaan.
Xafiiska Guddoomiyaha Walz ayaa CBS News u tilmaamay hadallo uu guddoomiyuhu horay u sheegay toddobaadkii hore, taas oo uu ku muujiyay inuu soo dhaweynayo baaritaanka ku saabsan halka ay ku dambeeyeen lacagaha la musuqmaasuqay ee daryeelka bulshada, islamarkaana uu diyaar u yahay inuu la shaqeeyo baarayaasha.
Minnesota waxaa ka taagan eedeymo waaweyn oo ku saabsan musuqmaasuq ka dhex jira barnaamijyada kaalmada dadweynaha ee gobolka. In ka badan dhowr iyo toban qof ayaa lagu soo oogay dacwad ku saabsan khiyaano gaaraysa $250 milyan oo lala xiriirinayo ururka Feeding Our Future iyo la-hawlgalayaashiisa, kuwaas oo dacwad-oogayaasha federaalka ay sheegeen inay lunsadeen deeqaha cuntada carruurta.