Arbaco, Oktoobar 07, 2015 (HOL) — Iyadoo maalmihii u dambeeyay ay Qoriley ku qul-qulayeen waxgarad ayaa waxaa saakay u ambabaxay deegaanka Qoriley, Garaad Saleebaan Garaad Maxamed Garaad Maxamuud oo ka mid ah cuqaasha gobolka Sool, si loo joojiyo colaado soo laalaabtay oo deegaankaas ka dhacay.
Garaadka oo kasoo ambabaxay deegaanka Xuddun ayaa ka qayb-qaadan doona nabadaynta laba beelood oo dhawaan ku dagaallamay Qorilay oo gobolka Sool ka tirsan, Magaclay oo gobolka Mudug ka tirsan iyo Burtinle oo gobolka Nugaal ka tirsan.
Culumaa’udiin, waxgarad iyo madax-dhaqmeedyo kasoo kicitimay degmada Laascaanood, Buuhoodle, Boocame, Xuddun, Boosaaso, Garoowe iyo Gaalkacyo ayaa maalmihii dambe ku qulqulayay deegaanka Qorilay halkaasoo gogol nabadeed la dhex-dhigay dhinacyadii ku dagaallamay.
Sidoo kale, wufuuddaan ayaa waxaa hoggaamainayay madax-dhaqameedyo magac ku leh Somalia, iyagoo u kala dab-qaadayay beelihii dhawaan dagaalku ku dhex-martay gobolada Sool iyo Nugaal, waxayna ku guulaysteen inay xabad-joojin dhex-dhigaan labada beelood.
Wajigii koobaad ee nabadaynta ayaa lagu guulaystay in la kala raro malleeshiyadii labada dhinac ee isku hor-fadhiyay Magaclay iyo Qorilay, iyadoo ay booqdeen wufuudan gobihii ay ku kala sugnaayeen ciidamada labada beelood si loo hubiyo in la qaaday.
Ugu dameyn, culummada, waxgaradka iyo isimada kala duwan ee gogoshan isugu yimid ayaa ku booriyay labada dhinaca ALLE ka cabsi iyo inay nabadeynta deegaannadooda ku dadaalaan.
Seynab Cabdi Warsame, Hiiraan Online
[email protected]
Laascaanood, Gobolka Sool
