Hiiraan Online

Arbaco, Oktoobar 07, 2015 (HOL) — Madaxweynaha Puntland, Cabdiweli Maxamed Cali Gaas oo  maalmahan ku suganaa magaalada Nairobi ayaa la kulmay safiirka Talyaaniga ee Somalia, Fabrizio Marcelli, kaasoo madaxweynaha kusoo booqday hoygiisa.

War-saxaafadeed kasoo baxay madaxtooyada maamulka Puntland ayaa lagu sheegay inay labada mas'uul kulankooda iskula soo qaadeen arrimo muhiim ah oo la xiriira xaaladda guud ee Somalia oo la filayo inay ka dhacdo doorasho sanadka dambe.

“Madaxweynuhu waxa uu sharaxaad ka siiyay safiirka mashaariicda ka socda Puntland gaar ahaan garoonka diyaaradaha ee magaalada Bosaaso oo gaba-gabo ku dhow,“ ayaa lagu yiri war-murtiyeedka ka soo baxay maamulka.

“Waxaa madaxweynuhu uu ka codsaday safiirka in dowladda Talyaaniga ay gacan buuxda ka gaysato tababarada ciidamada Puntland iyo waliba qalabayntooda,“ ayaa mar kale lagu xusay war-saxaafadeedkan oo maanta la soo saaray.

Dowladda Talyaaniga ayaa dhowr jeer oo hore ka hirgalisay Puntland mashaariic uu ka mid yahay Tv-ga Puntland iyo dhismaha dhowr jid oo laga hirgaliyay magaalooyinka Garoowe, Boosaaso iyo waliba Gaalkacyo.

Ugu dambeyn, madaxweynaha Puntland C/weli Gaas ayaa maalmahanba kulammo kala duwan la yeelanayay dublamaasiyiinta dalalka reer galbeedka ah ee Fadhigoodu yahay magaalada Nairobi, waxaana la sheegay inay maamulka Puntland u sameeyeen ballan-qaadyo kala duwan.

Faysal Mohamed Hassan
[email protected]