WARBXIN: Isbitaalka Magaalada Beledweyne ee Gobolka Hiiraan oo Qarka u Saaran inuu Xirmo
Arbaco, Oktoobar 07, 2015 (HOL) — Iyadoo maalmihii ugu dambeeyay ay si aad ah isku soo tarayeen qeylo dhaanta maamulka iyo shaqaallaha isbitaalka guud ee Beledweyne oo ka cabanaya dawo la'aan soo food saartay, ayaa waxaa hadda muuqata in heer quus ah laga taagan yahay sii socoshada adeegyadii caafimaad ee isbitaalku siin jiray bukaanka.
Guddoomiye ku-xigeenka maamulka goboka Hiiraan ee arrimaha bulshada Sheekh Xuseen Cismaan Cali oo booqday isbitaalka, ayaa wuxuu warbixin ka dhageystay maamulka iyo shaqaalaha, waxaana uu soo maray qeybaha kala duwan ee isbitaalka ka kooban yahay, isaga u kuur-galayay xaalada bukaanka ku jira iyo sidda ay u hellaan adeegii caafimaad oo ay u baahnaayeen.
Agaasimaha guud ee isbitaalka, Axmed Max'ed Khaliif ayaa sheegay in illaa iyo hadda aysan jirin cid ka soo jawaabtay cabasho muddo dheer ay jeedinayay, isaga oo intaa ku darray in dawo la'aanta ka jirta isbitaalka laga yaabo inay sababto in ay joogsadaa howlihii uu u hayay bulshada ku dhaqan gobolka.
Guddoomiye ku-xigeenka maamulka gobolka Hiiraan ee arrimaha bulshada Sh. Xusseen Cismaan Cali, ayaa ugu baaqay hay'adda samafalka ka howlgal gobolka iyo cid kasta oo gacan ka geysan karta in uu isbitaalku sii shaqeeyo inay si deg-deg ah ugu soo gurmadaan..
“Bulshada inta wax heysta waa in ay isbitaalka caawisaa, waayo cid kale oo uu sugayo ma jirto, bulshada ayaa loo adeegayaa, sidaa daraadeed waa in bulshada laftirkeeda gacan ka geysataa siddii uu u sii shaqeyn lahaa'' ayuu yiri Sh. Xuseen Cismaan Cali.
Isbitaalka magaalada Beledweyne, oo ah isbitaalka ugu weyn gobollada dhexe, waxaana adeeg caafimaad u soo doonta siiya bukanno ka kala yimaada deegaannada uu gobolku ka kooban yahay, Bakool iyo Dhulka Ismaamulka Soomaalida Itoobiya
C/raxmaan Diini, Hiiraan Online
[email protected]
Beledweyne, Soomaaliya
