5/19/2024
Today from Hiiraan Online:  _
Wararka Maanta- Arbaco, Oct 7 , 2015
Dib u dhac ku yimid Kulankii looga Hadli lahaa Mooshinkii laga keenay Madaxweynaha Somalia


Arbaco, Oktoobar 07, 2015 (HOL) — Shirkii looga xaajoon lahaa Mooshinkii laga keenay Madaxweynaha Somalia oo lagu waday inuu maanta ka furmo Muqdisho ayaa dib u dhac uu ku yimid, kaddib markii ay diideen xildhibaannadii mooshinka keenay

Howl-wadeennada shirka ayaa  bayaan looga hadlayay shirkan waxay ku sheegay in shirka loo hakiyay sababo la xiriira maqnaashaha ra’iisul wasaaraha xukuumadda Soomaaliya oo dalka ka maqan, lagana yaabo inuu soo laabto 10-ka bishan Oktoobar.

Sidoo kale, la-taliyaha guddoomiyaha baarlamaanka Soomaaliya, Cumar Aadan Qaadi oo isagana la hadlay warbaahinta ayaa sheegay in wadahadalkii looga hadli lahaa mooshinka madaxweynaha ka yaalla dib loo dhigay illaa 10-ka bishan Oktoobar. Isagoo dib u dhigista shirka ku macneeyay ra’iisul wasaaraha dalka oo safar dibadda ah ku maqan.

“Ra’iisul wasaaraha Soomaaliya ayaa codsaday in lala sugo shirka, maadaama lagu ballan-sanaa in wadahadalka ay goobjoog ka noqdaan mas'uuliyiinta Qaranka, sida RW Somalia, madaxweynaha dalka iyo guddoomiyaha baarlamaanka,” ayuu yiri Qaaddi.

Guddoomiyaha baarlamaanka Somalia, Maxamed Sheekh Cismaan Jawaari ayaa sheegay shalay in Arbacada maanta ah ay xildhibaannada mooshinkan keenay ka soo qayb-galaan shirka lagu maareynayo mooshinka ka dhanka ah Madaxweyne Xasan Sheekh.

Dhanka kale, xildhibaannada mooshinka ka keenay Madaxweynaha Somalia oo soo saaray shalay war-saxaafadeed ayaa sheegay inaysan ka qaybgalay shirka uu ku dhawaaqay Prof. Jawaari in Arbacada maanta furmi lahaa.

Xildhibaan Cabdullaahi Goodax Barre oo ka mid ah xildhibaannadii mooshinka ka keenay Madaxweynaha Somalia ayaa warbaahinta u sheegay maanta inaanay ka qayb-gali doonin shirka lagu xallinayo mooshinka ka dhanka ah madaxweynaha.

Bishii Ogoosto12-keedii ayay ahayd markii 93-xildhibaan oo baarlamaanka Soomaaliya ay u gudbiyeen mooshin ay xusnaayeen qodobbo lagu eedeynayo madaxweynaha Soomaaliya, kuwaasoo ay ku jiraan culus oo ku saabsan maamul-xumo.

Ugu dambeyn, lama oga illaa hadda xilliga uu qabsoomi doono shirkan, kaasoo la doonayo in lagu xalliyo mooshinka xil ka qaadista ah ee madaxweyne Xasan laga keenay, kaasoo ku noqday caqabad howlaha dowladda Somalia.

Maxamed X. Xuseen, Hiiraan Online  
[email protected]
Muqdisho, Soomaaliya