Kooxo hubeysan oo Muqdisho ku dilay laba qof oo midkood uu Adeer u ahaa Madaxweyaha DF
Dr. Liibaan Cismaan Cilmi - Wiilka uu Adeerka u ahaa Madaxweynaha Soomaaliya
Arbaco, Oktoobar 07, 2015 (HOL) — Kooxo hubeysan ayaa saakay degmada Wadajir ku toogtay wiil u adeer u yahay madaxweynaha Somalia, Xasan Sh. Maxamuud, kaasoo lagu magacaabi jiray Liibaan Cusmaan Cilmi iyo wiil kale oo la socday. waxaana dilkooda si rasmi ah u sheegatay Al-shabaab.
Liibaan ayaa ahaa dhakhtar ka hawlgala mid ka mid ah isbitaalada Imaaraadku leeyihiin ee Muqdisho ku yaalla, iyadoo aabbihii oo ay isku hooyo yihiin Xasan Sheekh uu dhawaan ku dhintay magaalada Nairobi ee xarunta dalka Kenya.
Goob-joogayaal ayaa sheegay in dhakhtarka iyo wiil kale oo macallin jaamacadeed ahaa oo la socday laguna magacaabi jiray C/qaadir Yabaroow ayaa lagu dhex-toogtay gaarigooda, kaddib markii dableyda dishay ay gaarigoodii ku hor-gooyeen gaari ay wateen, kaddibna ay rasaas culus ku fureen.
"Dabley watay gaari ayaa ku hor-jaray gaarigii ay dhakhtarta iyo wiilka kale wateen gaari kale oo ay wateen, kaddibna waxay ku fureen, goobta ayayna ku geeriyoodeen," ayuu yiri mid ka mid ah goobjoogayaal la hadlay warbaahinta. Waxayna intaas ku dareen in kooxihii dilka geystay ay baxsadeen.
Xarakada Al-shabaab ee Somalia ayaa sheegatay inay ka dambeysay dilkaas labadan ruux oo ay sheegeen inay ka tirsanaayeen madaxtooyada Somalia, weerarkana ay dileen xoogag ka tirsan Al-shabaab oo Muqdisho ku sugan.
"Hadafka weerarka wuxuu ahaa wiilka uu madaxweynaha Somalia adeerka u yahay oo ka tirsan madaxda xiriirka waddamada Carabta iyo dowladda Soomaaliya," ayaa lagu yiri war laga sii daayay idaacadda Al-shabaab ee Al-andulus oo soo xiganaysay saraakiil ka tirsan Al-shabaab.
Wararka qaarkood ayaa sheegaya in Dr. Liibaan Cismaan Cilmi oo uu madaxweynaha DF adeer u ahaa uu si gaar ah ula socday caafimaadka madaxweynaha Somalia, laakiin weli kama hadlin xafiiska madaxweynaha inuu Dr. Liibaan ahaa dhakhtarka Madaxweynaha iyo in kale.
Haya'daha amniga dowladda federaalka Somalia ayaan weli ka hadlin iyaguna dilka labada qof ee mid ka mid ah uu adeer u ahaa madaxweynaha Somalia ka hadlin, waxaana dilkaan uu ka mid noqonayaa dilal dhowr ah oo sannadkan ka dhacay degmada Wadajir.
Ugu dambeyn, ma ahan markii ugu horreysay oo kooxo hubeysan ay degmada Wadajir ku dilaan mas’uuliyiin ka tirsan dowladda Soomaaliya iyo dad shacab ah, iyadoo horay loogu dilay degmadaas suxufiyiin, shaqaale dowladeed iyo shaca fara badan.
Maxamed X. Xuseen, Hiiraan Online
[email protected]
Muqdisho, Soomaaliya
