3/29/2024
Today from Hiiraan Online:  _
Wararka Maanta- Talaado, Jan 8 , 2013
Maamulka Ahlusunna oo sheegay in ay guulo ka gaareen dagaallo ay gobolka Gedo kula galeen Al-shabaab

Talaado, Jannaayo 08, 2013 (HOL) —Maamulka culumaa’udiinka Ahlusunna Wal-jameeca  ee gobolka Gedo ayaa sheegay in dagaalladii ugu danbeeyay ee ka dhacay gobolkaasi ay ku guuleysteen in ay xoogagga Al-shabaab kala wareegaan dhul ballaaran oo ay uga sugnaayeen gobolkaasi.

Afhayeenka ururka Ahlusunna Waljameeca ee gobolka Gedo Max’ed Aadan (Cod-weeyne) oo warbaahinta la hadlay ayaa sheegay in howl-gallo ballaaran oo ciidamadooda iyo kuwa dowladda ay ka fuliyeen wadooyinka isku xira magaalooyinka Garbahaareey, Luuq iyo beledxaawo ay ku guuleysteen in ay kula wareegaan fariisimo dhowr ah oo ay ku lahaayeen Al-shabaab.

Masuulkani ayaa sheegay in ay gacanta ku dhigeen hub iyo rasaas ay lahaayeen xoogagga Al-shabaab, wuxuuna xusay in isu socodka wadooyinka isku xira magaalooyinka Garbahaareey, Luuq iyo Beledxaawo uu imika yahay mid wanaagsan islamarkaasina aysan ka jirin wax cabsi ah.

"Waxaa la qorsheynayaa isbuucan soo socdo meelah ay u kala jabeen in ay ciidamada ka daba galaan si gobolka dhamaantii looga sifeeyo. Ciidamadana hada dhammaan waxay wada tageen Garbahaareey, waxaana la qorsheynayaa qaabkii kale oo lagu geli lahaa meelaha kala duwan oo nimankii ay weli ku dhimanyihiin,”ayuu masuulkani hadalkiisii raaciyay.

Ciidamada dowladda, Ahlusunna iyo kuwa Itoobiya ayaa mudooyinkii u danbeeyay dhaqdhaqaaqyo xooggan ka waday qeybo katirsan gobolka Gedo, iyadoona dhawaan dagaallo culus ay nawaaxiga degmada Garbahaareey ku dhexmareen ciidamada iskaashanaya iyo Al-shabaab.

Dhinaca kale saraakiil u hadashay Al-shabaab ayaa iyaguna sheegtay in ay guulo la taaban karo ka gaareen dagaalladii ay gobolkaasi kula galeen ciidamada isbaheysiga ah, waxayna sheegeen in ay u geysteen khasaarooyin isugu jira dhimasho iyo dhaawac islamarkaasina ay kula wareegeen hub iyo gaadiid.

Saraakiisha hogaamineysa ciidamada dowladda Soomaaliya iyo kuwa Ahlusunna ayaa sheegay in ay socon doonaan howlgallada ilaa ay gacanta uga dhigayaan degmooyinka Buurdhuubo iyo Baardheere oo ay maamulaan xoogagga Xarakada Al-shabaab.

Xiisadahani dagaal ee kasoo cusboonaaday gobolka Gedo ayaa wel-wel ku abuuray dadka rayidka ah ee ku dhaqan gobolka, kuwaasoo ay saameyn ballaaran ku reebtay abaarihii sanadii aynu kasoo gudubnay ku dhuftay dalka Soomaaliya.

Xasan Nuur, Hiiraan Online
[email protected]
Muqdisho, Soomaaliya













Click here
1/8/2013 4:54 PM EST
Talaado, January 08, 2013(HOL): Wiil Soomaali ah oo ku jiray xabsi ku yaalla magaalada Lecce ee dalka Talyaaniga, halkaasi oo loogu xiray in uu ku soo qaato ciqaabta dembi xatooyo ah oo lagu helay ayaa isdaldalay kaddib markii ay xaalad nolol xumo ah ay xabsiga kula soo gudboonaatay.

1/8/2013 12:12 PM EST
Talaado, Jannaayo 08, 2013 (HOL) — Wasiirka gaashaandhigga Soomaaliya, C/xakiin Maxamuud Xaaji Fiqi ayaa sheegay in dalal kasoo horjeeda nabad ka dhalata Soomaaliya ay taageeraan burcadbdeedda Soomaaliya, kuwaas oo raadinaya inaysan Soomaaliya weligeed xasilin oo aanay deggenaasho ka dhicin.

1/8/2013 12:11 PM EST
Talaado, Jannaayo 08, 2013 (HOL) — Ergayga xoghayaha guud ee Qaramada Midoobay uga wakiilka ah arrimaha Soomaaliya, Danjire Augustine Mahiga oo kulan la qaatay madaxweynaha Soomaaliya, Xasan Sheekh ayaa sheegay in Qaramada Midoobay ay qaab cusub kula shaqeyn doonto dowladda federaalka Soomaaliya.

1/8/2013 8:50 AM EST
Talaado, Jannaayo 08, 2013 (HOL) — Kulan ay magaalada Muqdisho ku yeesheen ergayga Midowga Afrika u qaabilsan Soomaaliya iyo madaxda dowladda Soomaaliya ayaa waxaa lagu gaaray go’aan lagu dalbanayo in la kordhiyo xilliga howgalka ciidamada Midowga Afrika ee AMISOM.

1/8/2013 7:56 AM EST
Talaado, Jannaayo 08, 2013 (HOL) — Kulan cashooyinkii lasoo dhaafay uga socday deegaanka Dan-dan madaxdhaqameed ku kala dhex-jirey beelo isku maan-dhaafay dhul daaqsimeed la magaaleeyay oo lagu magacaabo Xamar-lagu-xidh oo 40-km dhinaca Koonfur-bari kaga beegan Degmada Buuhoodle ayaa ga`aammo lagaga soo saaray.

1/8/2013 7:54 AM EST
Talaado, Jannaayo 08, 2013 (HOL) — Golaha aqoonyahannada Koonfurta Soomaaliya oo mudooyinkii ugu dambeeyay wadday barnaamij la magac baxay [qiimee qofkaaga] ayaa munaasabad uu soo qaban-qaabiyey golaha kana dhacday hoteel Manchester ee magaalada Baydhabo waxaa shahaadooyin lagu guddoonsiiyay shirkado iyo hay’ado wadani ah oo ka jira gobolka Bay.

1/8/2013 6:59 AM EST
Talaado, Jannaayo 08, 2013 (HOL) — Guddiga cadaalladda Somaliland ayaa isku shaan-dheyn ballaaran ku sameeyay guddoomiyeyaasha maxkamaddaha goboladda Somailland qaarkood.

1/8/2013 6:52 AM EST
Talaado, Jannaayo 08, 2013 (HOL) — Mudanayaasha golaha Wakiiladda Somaliland, ayaa maanta cod aqlabiyad ah ku ansixiyey wasiirka Dib u jinta Somaliland Mr: Saleebaan Ciise Axmed (Xaglo Toosiye) iyo wasiir ku xigeenka macdanta, Tamarta iyo biyaha Somaliland Mr: Cabdisalaan Maxamed Xasan.

1/8/2013 6:47 AM EST
Talaado, Jannaayo 08, 2013 (HOL) — Iyadoo madaxweynaha Soomaaliya, Xasan Sheekh Maxamuud uu dhawaan sheegay in askarigii kufsi lagu helo uu xukunkiisu noqonayo dil toogasho; ayaa haddana haweenka ku jira xeryaha barakacayaasha ee Muqdisho ku yaalla waxay ka cabanayaan kufsi ay u geystaan ciidamada dowladda Soomaaliya iyo dad xiran dharka ciidamada.

1/8/2013 5:46 AM EST
Talaado, Jannaayo 08, 2013 (HOL) — Dowladda Talyaaniga oo muddo dheer gumeysanaysay gobollada Koonfureed ee Soomaaliya ayaa shaacisay inay ka caawin doonto dowladda cusub ee Soomaaliya tababarka ciidamada iyo wax-soo-saarka.

1/8/2013 1:21 AM EST
Talaado, Jannaayo 08, 2013 (HOL) — Ciidamada AMISOM ee ku sugan magaalada Baydhabo ee xarunta gobolka Bay ayaa lagu wareejiyay garoonka diyaaradaha ee Baydhabo, halkaasoo tan iyo bishii Feberaayo ee sannadkii hore ay gacanta ku hayeen ciidamada Itoobiya ee caawinaya kuwa dowladda Soomaaliya.

1/8/2013 1:20 AM EST
Talaado, Jannaayo 08, 2013 (HOL) — Afar qof oo ay ku jiraan saddex sarkaal oo ka tirsan saraakiisha booliiska Kenya iyo qof rayid ah ayaa ku dhaawacmay bambaano lagu weeraray xalay gaari ay wateen booliiska Kenya oo marayay bartamaha magaalada Gaarisa ee xarunta gobolka Waqooyi-bari-Kenya.