3/28/2024
Today from Hiiraan Online:  _
Wararka Maanta- Isniin, May 6 , 2013
Dowladda Seychelles oo Maxaabiis Burcad-badeednimo ku Xukuman ku soo Wareejisay Maamulka Goboleedka Puntland

Isniin, May 06, 2013 (HOL) — Waxaa maanta garoonka diyaaradaha ee magaalada Boosaaso laga soo dejiyey sagaal maxbuus oo Soomaali ah, kuwaas oo horay maxkamad ku taalla dalka Seychelles ay ugu xukuntay falal lala xiriira burcad-badeednimo.

Maxaabiistan ayaa qayb ka ah labaatan iyo shan maxbuus oo ku jirey xabsiyada jaziiradda Seychelles, kuwaasoo ay horay maamulka Puntland iyo dowladda dalkaasi ugu heshiiyeen in muddada xukunkooda uga dhiman ay ku qaataan gudaha Puntland.

Maxaabiistan oo ay diyaarad gaar ahi siddey, waxaa garoonka Boosaaso dhexdiisa kula wareegey mas’uuliyiin ka tirsan hay’adaha garsoorka, booliska iyo ciidamada asluubta ee maamulka Puntland.

Xeer ilaaliyaha maxkamadda derejada 1-aad ee gobolka Bari Bashiir Axmed Daahir, oo kamid ahaa mas’uuliyiintii garoonka ku sugnaa xilligii maxaabiistan laga soo dejinayey, ayaa ka warbixiyey qaabkii ay soo wareejintoodu u dhacday.

Wuxuuna sheegay in qorshaha maxaabiistan Puntland lagu keenay uu qayb ka yahay heshiis ay labada dhinac horay u wada gaareen, isagoo xusay in sagaalka maxbuus ee maanta la keenay ay ugu danbeeyeen 25 horay loogu heshiiyey in la keeno Puntland.

“Sagaal nin baa lakeenay oo burcad-badeed ah oo laga keenay Seychelles, waxayna u danbeeyeen 25 maxbuus oo horay loo keenay Puntland, waxayna isugu jiraan kuwa kasoo jeeda Puntland iyo kuwo kasoo jeeda gobollada dhexe” xeer-ilaaliyaha maxkamadda gobolka Bari ayaa yiri.

Siddeed ka mid ah maxaabiistan ayuu sheegay in ay ku xukuman yihiin xabsi muddadiisu tahay 12-sano, halka midka sagaalaadna uu ku xukuman yahay lix sano, isagoo intaas raaciyey in xukunka horay ugu dhacay aan wax faragelin ah lagu sameyn doonin, inta u dhimanna ay ku qaadan doonaan xabsiyada Puntland.

Dowladda Seychelles ayaa horay maamullada Somaliland iyo Puntland ula gashay heshiis ku aadan in lagu soo wareejiyo maxaabiis Soomaali ah oo ay maxkamadda sare ee dalkaasi ku xukuntay denbiyo la xiriira burcad-badeednimo, kadib markii ciidamada caalamiga ah ee la-dagaalanka burcad-badeedka Soomaalidu ay qabteen.

Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
5/6/2013 9:37 AM EST
Isniin, May 06, 2013 (HOL) — Guddiga kumeel gaarka ah ee doorashooyinka Puntland ayaa maanta shaaciyey xilliga ay ku egtahay soo gudbinta musharrixiinta ururada siyaasadda uga qayb geli doona doorashooyinka goleyaasha deegaanka ee soo socda.

5/6/2013 9:13 AM EST
Isniin, May 06, 2013 (HOL) — Mas'uuliyiinta maamulka gobollka Hiiraan iyo saraakiisha ciidamada midowgga Africa AMISOM ayaa maanta kulan kula yeeshay magaalada Baladweyne ee xarunta gobollka Hiiraan wafdi ballaaran oo ka socday hay'addaha samafalka QM.

5/6/2013 9:03 AM EST
Isniin, May 06, 2013 (HOL) — Dowladda Qatar ayaa si adag u cambaareysay weerarkii Ismiidaaminta ahaa ee ay Al-shababa kula beegsatay Muqdisho samafalayaal dalkeeda u dhashay, sida lagu sheegay war-saxaafadeed ay baahisay wakaaladda wararka Qatar.

5/6/2013 8:43 AM EST
Isniin, May 06, 2013 (HOL) — Waxaa dhawaanaha gobolka Bakool ka socday dagaal ay ciidamada dowlada kula jireen xoogaga Al-shabaab, kuwaasoo ay ku qabsadeen tuulooyinka kala ah: Garas-weyne, kulan-jareer, Ceel-garas iyo Gubate, iyagoo deegaannadasa isaga baxayay markii saacado joogaan.

5/6/2013 8:30 AM EST
Isniin, May 06, 2013 (HOL) — Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa gaaray magaalada London ee xarunta dalka Britain, halkaasoo uu maalinta berri ah ka furmayo shir loo qabanayo Soomaaliya, si yabooh dhaqaale loogu ururiyo.

5/6/2013 8:13 AM EST
Isniin, May 06, 2013 (HOL) — Ciidamada ammaanka Soomaaliya ayaa dib u xiray jidadka waaweyn ee Muqdisho, maalin kaddib markii uu isgoyska KM-4 ka dhacay weerar ismiidaaminta ah oo sababay dhimasho iyo dhaawac fara badan, kaasoo ay mas’uuliyaddiisa sheegatay Al-shabaab.

5/6/2013 3:23 AM EST
Isniin, May 06, 2013(HOL) :- Dagaalyahanno katirsan xarakada Al-shabaab ayaa xalay saqdii dhexe weerar qorsheeysan ku qaaday deegaanka Dhoobleey ee gobolka J/hoose, iyadoona weerarkaasi uu ahaa mid ay labada dhinac isu adeegsanayeen hubka noocyadiisa kala duwan.

5/6/2013 1:40 AM EST
Isniin, May 06, 2013 (HOL) — Barnaamijkan loo bixiyey FAGAARAHA oo ah mid soo socday bilihii ugu dambeeyey, kana billowday gobolka ay Soomaalidu ku badan tahay ee Minnesota, ayaa lagu jeex-jeexaa mowduucii xiligaasi bulshada dhex-deeda saameyn muuqata ku leh, iyadoo la isku weydiiyo su’aalo badan, si loo curiyo jawaabo caqli-gal ah oo dawo u noqon-kara mushkiladda laga hadlayo, waxaana tododobaadkaan qeybtaan oo ahayd tiisi afraad lagu gorfeeyey nidaamka federalism-ka iyo sida Soomaaliya uu uga dhaqan-geli karo.

5/6/2013 12:28 AM EST
Isniin, May 06, 2013 (HOL) — Ra’iisul wasaaraxa Soomaaliya, Cabdi Faarax Shirdoon (Saacid) ayaa dhaleeceeyay qaraxii ismiidaaminta ahaa ee shalay ka dhacay isgoyska KM-4 ee magaalada Muqdisho, isagoo ku tilmaamay fal argagaxiso oo lagu gumaaday dad shacab ah oo aan waxba galabsan.