11/27/2022
Today from Hiiraan Online:  _
Wararka Maanta- Khamiis, Feb 14, 2013
Ciidamada Dowladda Somalia iyo kuwa AMISOM oo si nabad ah kula wareegay Deegaanno ka tirsan Gobolka Shabeellada Hoose


Khamiis, Feberaayo 14, 2013 (HOL) — Ciidamada dowladda Soomaaliya iyo kuwa AMISOM ayaa saakay la wareegay deegaanno hor leh oo ka tirsan gobolka Shabeellada Hoose, iyadoo saraakiisha dowladdu ay sheegeen inay la kulmeen iska-caabino aan xoog badnayn.

Abaanduulaha ciidamada xoogga dalka, Jen. C/kariin Yuusuf Aadan (Dhego-badan) oo saxaafadda la hadlay howgalka kaddib ayaa sheegay in ciidamadu ay gaareen deegaannada Jannaale, Owdheegle, Bariirre iyo Kabtan-laas oo kawada tirsan gobolka Shabeellada Hoose.

“Saakay aroortii ayay ciidamada dowladda Soomaaliya iyo kuwa AMISOM oo garabsanaya waxay si nabadgalyo ah kula wareegeen deegaanno gobolka Shabeellada hoose ka tirsan, sida Bariirre, Owdheegle, Jannaale iyo Kabtan- laas, waxayna ku sugan yihiin fariisimo loogu talo-galay,” ayuu yiri Jen. Dhego-badan.

Mar uu ka hadlay inay halkaas kasii socon doonaan iyo inay sii joogayaan ayuu sheegay inay halkaas ku sugi doonaan howgalkooda dambe, balse warar kale ayaa sheegaya in ciidamada dowladdu ay ku wajahan yihiin degmada Qoryooley ee gobolka Shabeellada Hoose.

“Wax khasaare ah oo dhankeenna soo gaaray ma jiraan, mana garanayno khasaare Al-shabaab gaaray, balse waxaan xaqiijin karaa inay u carareen dhinaca degmada Kurtun-waarreey ee gobolka Shabeellada Hoose,” ayuu abaanduuluhu hadalkiisa ku daray.

Xarakada Al-shabaab weli kama aysan hadlin deegaannada cusub ee ay kala wareegeen ciidamada dowladda Soomaaliya, balse goobjoogayaal ku sugan deegaannadaas ayaa saxaafadda u xaqiijiyay in ciidamada dowladda iyo kuwa AMISOM ay deegaannadooda ku sugan yihiin.

Tan iyo dhammaadkii sannadkii 2011 ciidamada dowaldda Soomaaliya oo kaashanaya AMISOM iyo ciidamada Itoobiya ayaa waxay dhul ballaaran ka qabsadeen xoogagga Al-shabaab, taasoo sababtay in caalamku uu si rasmi ah u aqoonsado dowladda Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
2/14/2013 12:35 PM EST
Khamiis, Feberaayo 14, 2013 (HOL) — Guddoomiyaha baarlamaanka Soomaaliya, Prof. Maxamed Sheekh Cismaan (Jawaari) iyo wafdi uu hoggaaminayo ayaa maanta kulan kula yeeshay xarunta dalka Itoobiya ee Addis Ababa, guddoonka baarlamaanka dalkaas.

2/14/2013 11:36 AM EST
Khamiis, Feberaayo 14, 2013 (HOL) — Ardayda wax ka barta Jaamacadda Nugaal faraceeda magaalada Laascaanood ayaa safar wajiyo badan kusoo maray deegaanno ka tirsan gobolka Sool, Sanaag iyo deegaanka Cayn.

2/14/2013 11:19 AM EST
Khamiis, Feberaayo 14, 2013 (HOL) — Mas’uuliyiin ka tirsan dowladda Soomaaliya ayaa maanta ka qeyb-galay aas balaaran oo degmada Guri-ceel ee gobollka Galguduud loogu sameeyay guddoomiyihii gollaha fulinta Ahlu Sunna Waljameeca Sheekh Max’ed Yuusuf Xeefoow oo maalintii shalay Muqdisho ku geeriyooday.

2/14/2013 6:59 AM EST
Khamiis, Feberaayo 14, 2013 (HOL) — Madaxweynaha Somaliland, Axmed Maxamed Maxamuud (Siilaanyo), ayaa safar shaqo kaga maqnaa dalka dibiiisa, ayaa maanta dalka dib ugu soo laabtay, kana hadlay kulamaddii uu la yeeshay dawladda Ingiriiska.

2/14/2013 2:45 AM EST
Khamiis, Feberaayo 14, 2013 (HOL) —Kooxo baastoolado ku hubeysan oo aan heybtooda la aqoon ayaa xalay fiidkii xaafadda Farjanno ee magaalada Kismaayo ku dilay nin ganacsade ah oo si weyn looga yaqaano magaalada Kismaayo.

2/14/2013 1:08 AM EST
Khamiis, Feberaayo 14, 2013 (HOL) — Kooxo hubeysan oo Koonfur Afrikaan ah ayaa ku dilay shalay gallinkii dambe duleedka magaalada Cape Town ee dalka Koonfur Afrika ganacsade Soomaaliyeed oo lagu magacaabi jiray, Xuseen Cali Jimcaale.

2/14/2013 12:30 AM EST
Khamiis, Feberaayo 14, 2013 (HOL) — Xildhibaan Sheekh Nuur Cali Aadan oo ka mid ah mudanayaasha baarlamaanka Soomaaliya ayaa xanuun kusoo booday awgiis ugu geeriyooday xalay isbiaal ku yaalla magaalada Muqdisho.

2/14/2013 12:27 AM EST
Khamiis, Feberaayo 14, 2013 (HOL) —Al-shabaab ayaa ka hadashay geeridii ku timid guddoomiyihii golaha fulinta ee ururka Ahlusunna Waljamaaca, Sheekh Maxamed Yuusuf Xeefoow, iyagoo sheegay inuu ka mid ahaa dadka dhibaatada ku hayay shacabka muslimka ah ee Soomaaliyeed.