3/28/2024
Today from Hiiraan Online:  _
Wararka Maanta- Sabti, Sept 22, 2012
Siyaasi horay xilal kala duwan uga soo qabtay Maamulka Puntland oo Maanta laga sii daayay Xabsiga Magaalada Boosaaso

Sabti, September 22, 2012 (HOL) — Waxaa maanta dib xoriyadiisii u helay Bile Maxamuud Qabowsade oo ah siyaasi horay xilal kala duwan uga soo qabtay maamulka Puntland, kadib markii uu mudo 5-bilood ka badan ku jirey xabsiga weyn ee magaalada Boosaaso.

Bile oo waxyar kadib markii uu xabsiga kasoo baxay warbaahinta la hadlay, ayaa sheegay in uu si aad ah ugu faraxsan yahay in uu dib xoriyadiisa u helo, wuxuuna mahad balaaran u jeediyey shakhsiyaad ay ku jiraan siyaasiyiin dowladda ka tirsan oo uu sheegay in ay sii deyntiisa gacan weyn ka geysteen.

Mar la weydiiyey sababta loo xiray iyo weliba qaabkii loola dhaqmayey intii uu xabsiga Gaal-shire ku jirey, wuxuu tilmaamay in xarigiisu uu yahay mid la xiriira arrimo siyaasadeed, islamarkaana uusan wax dhibaato ah xabsiga dhexdiisa kala kulmin.

"Waxan ku faraxsanahay in aan dib xoriyadayda u helo, waxanan u mahad celinayaa cid walba oo sii deyntayda gacan ka geysatey, waxan u xirnaana siyaasad bay ahayd. Waan hubey in aan maalin uun dib xoriyadeyda u heli doono, xabsiga intii aan ku jireyna si wanaagsan ayaa la iila dhaqmay" ayuu Qabowsade u sheegay wariyeyaasha.

Ma jiro wax war ah oo ku aadan sababta ka danbeysey xariga siyaasigan iyo weliba sii deyntiisa oo kasoo baxay dhinaca dowladda, waxaana xusid mudan in mudadii uu xirnaa aan wax maxkamad ah lasoo taagin.

Bile Qabowsade oo horay usoo ahaan jirey la-taliyihii dhinaca saxaafadda ee madaxweynihii hore ee Puntland Gen. Cade, islamarkaana noqday wasiir ku-xigeenka kaluumaysiga xiligii ay jirtey xukuumaddii AHN madaxweyne Cabdilaahi Yuusuf, wuxuu qayb ka yahay dadka dhaliila siyaasadda madaxweyne Cabdiraxmaan Maxamed Faroole.

17-kii bishii April ee sanadkan ayeyna ahayd markii Qabowsade xabsiga loo taxaabay, waxaana sii deyntiisa si weyn usoo dhoweeyey bahda saxaafadda iyo siyaasiyiinta kale ee ay isku afkaarta yihiin.

Maxamed Salaad Xaaji Dirir, Hiiraan Online
[email protected]
Puntland, Soomaaliya













Click here
9/22/2012 1:47 PM EST
Sabti, September 22, 2012(HOL): Waxaa goor dhaweyd magaalada Muqdisho ee caasimadda dalka Soomaaliya lagu dilay xildhibaankii ugu horreysay oo ka tirsan Dowladda Soomaaliya, kaasi oo ay toogteen kooxo hubeysan.

9/22/2012 10:50 AM EST
Sabti, september 22, 2012(HOL): Munaasabad si weyn loo soo agaasimay oo ay ka qeybgaleen dad aad u faro badan, isla markaana lagu taageerayay isbedelka ka dhacay dalka Soomaaliya ayaa lagu qabtay magaalada Stockholm ee caasimadda dalka Sweden.

9/22/2012 10:41 AM EST
Sabti, September 22, 2012 (HOL) — Wasiirka Arrimaha gudaha Somaliland, Md: Maxamed Nuur Caraale (Duur), ayaa sheegay in doorashadii ka dhacday Soomaaliya ay xukuumadda Raad ku lahayd si ay madaxtinimadda ugu usoo baxdo dad ay wada hadli karaan.

9/22/2012 10:31 AM EST
Sabti, September 22, 2012 (HOL) — Madaxweynaha Somaliland Md: Axmed Maxamed Maxamuud (Siillaanyo), ayaa tacsi u diray fanaankii weynaa ee Faysal Cumar Mushteeg oo shalay aas qaran loogu sameeyey magaaladda Hargeysa.

9/22/2012 10:25 AM EST
Sabti, September 22, 2012 (HOL) — Ciidamo ka socda dalka Jabuuti ee qeybta ka ah howlgalka midowgga Africa AMISOM kuna qalabeysan gadiidka dagaallka ayaa maanta gaaray magaalada Baladweyne ee xarunta gobollka Hiiraan.

9/22/2012 10:25 AM EST
Sabti, September 22, 2012 (HOL) — Madaxweynaha Soomaaliya, Xasan Sheekh Maxamuud ayaa Muqdisho kula kulmay maanta ergayga cusub ee Midowga Yurub ay u soo magcowday Soomaaliya, Michele Cervone D'Urso iyagoo kulankooda kaga hadlay arrimo ay ka mid yihiin dib u qaabeynta hay'adaha dowladda.

9/22/2012 10:12 AM EST
Sabti, September 22, 2012 (HOL) — Ergayga ururka Midowga Afrika ee arrimaha Soomaaliya, dajire Abuubakar Gaoussou Diarra ayaa sheegay inay ciqaabayaan askarigii ka tirsan ciidamada AMISOM ee lagu helo inuu dhibaato u geystay shacabka, isagoo ugu baaqay ciidamada kale ee Soomaaliya ku sugan in iyaguna aysan dhibaateyn shacabka.

9/22/2012 3:58 AM EST
Sabti, September 22, 2012 (HOL) — Xulka Kubada cagta Soomaaliya ee da’doodu ka yar tahay 17-ka sano ayaa jimcihii shalay xulka dhigooda ee Suudadn ka badiyay, kaddib markii ay dhexmartay ciyaar ciyaar ka tirsanayd is-reeb-reebka cayaaraha dhallinyarada qaarada Afrika taasoo ka dhacay magaalada Khartuum ee dalka Suudaan.

9/22/2012 3:34 AM EST
Sabti, September 22, 2012 (HOL) — Ciidamada dowladda Soomaaliya oo garab ka helaya kuwa AMISOM ayaa gaaray deegaanka Booroow oo 17-km koonfur kaga beegan degmada Jowhar ee xarunta gobolka Shabeellada dhexe, iyadoo gudaha degmadaas laga dareemayo dhaqdhaqaaqyo ciidan oo ay wadaan xoogagga Al-shabaab.

9/22/2012 3:18 AM EST
Sabti, September 22, 2012 (HOL) — Ugu yaraan laba qof oo shacab ah ayaa xalay lagu dilay degmada Boondheere ee gobolka Banaadir, iyadoo ciidamada booliiska ee ku sugan degmadaas ay sheegeen inay qabteen ruuxii dilka labada qof geystay.

9/22/2012 3:17 AM EST
Sabti, September 22, 2012 (HOL) — Todobo qof oo ay ku jiraan afar sarkaal oo ka tirsan ciidamada Kenya ee loo yaqaan GSU (General Service Unit) ayaa ku dhawacantay laba qarax oo ka dhacay magaalada Garissa ee gobolka waqooyi bari Kenya.