9/28/2022
Today from Hiiraan Online:  _
Wararka Maanta- Talaado, Sept 11, 2012
Dadka ku nool Magaalada Baladweyne oo soo dhaweeyay doorashada madaxweynaha cusub kuna tilmaamay isbadal taariikhi ah
Talaado, September 11, 2012 (HOL) — Laga soo bilaabo subaxnimadii hore ee maalintii shalay ilaa laga soo gaaro fiidnimadii xalay dadka ku dhaqan magaalada Baladweyne ee xarunta gobollka Hiiraan waxaa ay siweyn ugu mashquulsanaayeen la socoshada doorashadii ka dhacday magaalada Muqdisho, iyaga oo si toos ah ugala socday qalabka warbaahinta sida TV-da iyo Idaacadaha oo si toos ah u soo gudbinayay.

Markii ay xalay soo baxday natiijada doorashada laguna dhawaaqay in uu ku guuleystay xilka madaxweyne Soomaaliya Xassan Shiikh Max’uud waxaa al maqlayay rasaas cirka loo tuurayay, taasoo u muuqatay in lagu soo dhaweynayo isbadalka cusub ee uu dalku galay.

Hadal heynta ugu weyn ee saakay magaalada waa doorashada iyo madaxweynaha cusub oo ay dadku siweyn u soo dhaweeyeen, waxaana intooda badan oo aan wax ka weydiinay aragtidooda sheegeen in Xassan Shiikh Max’uud yahay  aqoonyahan ah xog-ogaal ah, madaama mudadii bur burka uu ka shaqeynayay gudaha dalka Soomaaliya, wax badanna kala socdo xaalada uu dalku waqtigan ku jiro.

Siyaasiyiin, aqoonyahanno, waxgarad, iyo odayaal ay HOL wax ka weydiisay doorashada iyo sida ay u arkaan madaxweynaha cusub, waxaa ay intooda badan isku raaceen in loo baahnaa is badalkan, madaama laga gudbay waqtigiii ku-meel-gaarka.

"Mar haddii laga baxay waqtigii ku-meel-gaarka loona gudbay dowlad rasmi ah oo ay dadka Soomaaliyeed leeyihiin, waa muhiim in ay hogaamiyaan wajiyo cusub, waayo waxaad la soctaan in hogaankii baarlamaanku uu mar hore isbadal ku dhacay, sidaa si lamid ah waa loo baahnaa in madaxda sare ee dalkuna is badalaan, ayeey ku soo ururiyeen aragtidooda dadkii ay la hadashay HOL.

Waxaa ay kula dar daraameen madaxweynaha cusub in uu soo xulu ra’iisal wasaare sida ay hadalka u dhigeen ka duwan kuwii horay u soo maray xukuumadihiin la soo dhaafay, si is badalku u noqdo mid dhab ah.

Sikastaba dadka ku dhaqan magaalada Baladweyne waxaa la oran karaa saacadihii aynu soo dhaafnay waxaa ay ahaayeen kuwo siweyn isha ugu hayay doorashada bal si ay wax badan uga ogaadaan natiijada ugu danbeysa ee soo baxda.

C/raxmaan Diini, Hiiraan Online
[email protected]
Baladweyne, Soomaaliya












Click here
9/11/2012 5:39 PM EST
Talaado, September , 11, 2012 (HOL)-Madaxweynaha Somaliland Md: Axmed Maxamed Maxamuud Siillaanyo, ayaa u hambalyeeyey madaxweynaha cusub ee Soomaaliya Md: Xasan Sheekh Maxamuud, waxaanu sidoo kale hambalyo klae u diray madaxweynihii tartanka lagaga guulaystay ee Sheekh Shariif Sh. Axmed oo Aqlabay natiijaddii doorashadda ka soo baxday.

9/11/2012 5:38 PM EST
Talaado, September 11, 2012(HOL): Shacabka ku dhaqan xaafadda ay Soomaalidu ku badantahay ee Eastleigh ayaa si diiran usoo dhaweeyay madaxweeynaha cusub ee Jamhuuriyadda Federaalka Soomaaliya Mudane Xasan Sheekh Max'uud.

9/11/2012 5:36 PM EST
Talaado, September , 11, 2012 (HOL)-Dadweynaha Somaliland oo maalmihii u dambeeyey hadal hayey doorashaddii ka dhacaysay magaaladda Muqdisho ayaa mucjiso ku tilmaamay madaxweynaha cusub ee ka soo dhexbaxay musharaxiintii badnaa, iyago intooda badani u saadaalinayey musharaxiin kale inay u dhow yihiin inay tartanka ku guulaystaan.

9/11/2012 9:34 AM EST
Talaado, September, 11, 2012 (HOL)- Jaamacadda Geeska (International Horn University) ( IHU), ayaa waxa ka qalinjabiyey dufcadii 3aad oo kuuliyaddo kala duwan ka baxay, waxaana kuuliyadaha kala duwan ugu muhiimsanaa kuuliyadda quraanka kariimka ah oo markii ugu horaysay 49 arday ka qalinjabiyeen oo ka mid ah 130 ka arday ee jaamacadda ka baxay.

9/11/2012 7:20 AM EST
Talaado, September 11, 2012 (HOL) — Madaxweynihii hore ee Soomaaliya, Shariif Sheekh Axmed ayaa sheegay inuu aqbalay natiijadii doorashada madaxweynenimo ee Soomaaliya, taasoo looga guuleystay, wuxuuna xusay inuu la shaqeyn doono dowladda cusub ee la dhisayo.

9/11/2012 7:09 AM EST
Talaado, September 11, 2012 (HOL) — Dibadbax lagu taageerayo madaxweynaha cusub ee jamhuuriyadda federaalka Soomaaliya ayaa maanta ka dhacay degmada Balcad ee gobolka Shabeellada dhexe, iyadoo ay halkaas isugu soo baxeen kumannaan qof.

9/11/2012 7:06 AM EST
Talaado, September 11, 2012 (HOL) — Dagaal culus oo u dhexeeya ciidamada dowladda KMG, kuwa Raaskaambooni iyo Militariga Kenya oo isgarabsanaya iyo Xarakada Al-shabaab ayaa goordhow ka qarxay deegaan lagu magacaabo harboole oo hoostaga Degmada Afmadow ee gobolka jubada hoose.

9/11/2012 4:07 AM EST
Talaado, September 11, 2012 (HOL) — Qaramada Midoobay, Marekanka iyo Midowga Afrika ayaa si isku mid ah u soo dhaweeyay doorashada madaxweynaha cusub ee Soomaaliya, Xasan Sheekh Maxamuud iyagoo ku tilmaamay doorashadiisa tallaabo horay loo qaaday.