3/29/2024
Today from Hiiraan Online:  _
Wararka Maanta- Isniin, Sept 10, 2012
Hay'adaha CPD iyo SOYDEN oo soo gabgabeeyay Barnaamij Tababarro lagu siinayay Dhalinyaro isugu jiray Gabdho iyo Wiilal
Isniin, September 10, 2012 (HOL) — Hay'adaha CPD iyo SOYDEN oo ka shaqeeya arrimaha horumarinta dhallinyarada ayaa soo gabgabeeyay tababar muddo sideed bilood socday oo lagu tababarayay dhallinyaro ay saameyn ku yeesheen colaadaha dalka ka jira.

Xaflada qalin-jabinta ah oo ka dhacay Muqdisho Khamiistii lasoo dhaafay ayaa waxaa ka qaygbalay mas'uuliyiin ka socda maamulka gobolka Banaadir, waxanaa shahaadooyin lagu guuddoonsiiyay ardaydii kaalimaha hore ka galay waxbarashada iyo tartammo lasoo galay.

Ardayda tababarka loosoo xiray ayaa waxay tiradoodu gaaraysaa 1,000 kuwaasoo isugu jiray 500 oo gabdho ah iyo 500 oo wiil ah, waxaana la baray dhallinyaradan casharro ay ka mid yihiin: dhisidda nabadda, sharciga iyo qaanuunka, dhaqanka bulshada, diinta Islaamka iyo qoraalka iyo aqriska farta Soomaaliga.

Sidoo kale, waxaa la baray farsamooyin ay ka mid yihiin: makaanikada, farsameynta taleefoonnada gacanta (Mobile) iyo kambiyuutarrada, iyadoo barnaamijkan ay maal-gelinaysay hay'adda UNDP ayna fulinayeen hay'adaha CPD iyo SOYDEN.

"Ardayda shahaadooyinka la guddoonsiiyay waxaa laga soo ururiyay degmooyinka gobolka Banaadir qaarkood, waxaana la guddoonsiiyay shahaadooyin ka turjumaya waxyaabihii ay barteen. Waxaana dhawaan aan billaabi doonaan in arday kale aan waxbarasho u furno," ayuu yiri Cali Siciid Cumar Ibraahim oo ah madaxa hay'adda CPD.

Dhallinyaradii dhameystay waxbarashada barnaamijka [Youth for Change] oo ay u dhexeysay da'dooda 18-jir illaa 40-jir ayaa waxaa guddoonsiiyay shahaadooyinkii iyo billadihii ay ku guuleysteen guddoomiye ku xigeenka dhinca siyaasadda iyo arrimaha bulshada ee maamulka gobolka Banaadir Cali Guure.

Ugu dambeyn, ardaydu waxay kusoo bandhigeen xiritaanka tababarka ruwaayad ka tarjumaysay isbedelka ku dhacay noloshooda iyo farqiga u dhexeeya intii aysan wax baran iyo hadda oo ay waxbarteen.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/10/2012 6:47 PM EST
Kadib markii ay baarlamaanka Soomaaliya si aqlabiyad ah ugu codeeyeen madaxweynaha cusub ee Soomaaliya Xassan Sheekh Maxamuud ayaa magaalada Muqdisho laga maqlay sawaxanka rasaasta.

9/10/2012 2:10 PM EST
Isniin, September 10, 2012(HOL): Waxaa si aqlabiyad leh ugu guuleystay madaxweynenimada Soomaaliya Xasan Shiikh Maxamuud oo wareeggii ugu dambeeyay ee doorashada madaxweynenimada uga adkaaday Madaxweynihii hore Shiikh Shariif Shiikh Axmed.

9/10/2012 7:50 AM EST
Isniin, September 10, 2012 (HOL) — Xildhibaannadii horay loogu diiday inay ka mid noqon doonaan baarlamaanka Soomaaliya oo ay ku jiraan hoggaamiye kooxeedyadii hore ee Soomaaliya ayaa la dhaariyay maanta si ay uga qaybgalaan doorashada madaxweynenimo ee Soomaaliya.

9/10/2012 7:10 AM EST
Isniin, September 10, 2012 (HOL) — Musharaxa xisbiga madaxweyne ee xisbiga UDUB, ayaa sheegay inay ka qaybgali doonin doorashooyinka golaha deegaanka, isla markaana xusay inuu maxkamadda u gudbin doono dacwad ka dhan ah guddidda Diiwaangelinta ururadda.

9/10/2012 6:13 AM EST
Isniin, September 10, 2012 (HOL) — Murashaxiin ka mid ahaa kuwii u tartamaya xilka madaxnimo ee Soomaaliya ayaa ku dhawaaqay inay tanaasuleen, iyagoo aan sheegin sababaha ku kallifay inay tanaasul sameeyaan.

9/10/2012 5:30 AM EST
Isniin, September 10, 2012 (HOL) — Markab ay leeyihiin ciidamada NATO ee howlgalka la dagaalanka burcad-badeedda u jooga xeebaha dalka Soomaailya, gaar ahaan kuwa Puntland ayaa soo badbaadiyey koox tahriibeyaal ah oo isugu jira Soomaali iyo Itoobiyaan, kuwaas oo muddo dhowr beri ah badda saarnaa, kadib markii ay ciladi soo food saartay doon yar oo ay ku safrayeen.

9/10/2012 5:26 AM EST
Isniin, September 10, 2012 (HOL) — Iyadoo la filayo in maanta magaalada Muqdisho ay ka dhacdo doorashada madaxtinimo ee Soomaaliya oo ay u taaganyihiin ku dhowaad ilaa 25 musharax ayaa Soomaalida ku dhaqan dalka gudihiisa iyo dibadiisa waxa ay isha ku hayaan warbaahinta Soomaalida ee soo tabinaysa qaabka ay u dhaceyso doorashada.

9/10/2012 4:28 AM EST
Isniin, September 10, 2012(HOL): Waxaa la soo gebagebeeyay wareegga koowaad ee doorashada madaxweynenimada Soomaaliya oo maanta mudanayaasha baarlamaanka Soomaaliya ku kala dooranayeen musharraxiin isu soo taagay xilka madaxweynenimada Soomaaliya.

9/10/2012 3:16 AM EST
Isniin, September 10, 2012 (HOL) — Shacabka Soomaaliyeed ee ku nool gudaha iyo dibadda dalka ayaa rajo wanaagsan ka muujiyay doorashada maanta Muqdisho ka dhacaysa ee lagu soo dooranayo madaxweynaha hoggaamin doona dalka muddo dheer kaddib.

9/10/2012 2:54 AM EST
Isniin, September 10, 2012 (HOL) — Xildhibaannada baarlamaanka Soomaaliya ayaa maanta oo Isniin ah dooran doona madaxweynihii dalka hoggaamin lahaa afarta sano ee soo socota, iyadoo doorahadan ay noqonayso tii ugu horreysay oo dalka ka dhacda muddo afartameeyo sano ka badan.