3/29/2024
Today from Hiiraan Online:  _
Wararka Maanta- Isniin, Sept 10, 2012
Murashaxiin ka Tanaasulay ka Qaybgalka Doorashada Madaxweynenimo ee Somalia intii aysan doorashadu billaaban
Isniin, September 10, 2012 (HOL) — Murashaxiin ka mid ahaa kuwii u tartamaya xilka madaxnimo ee Soomaaliya ayaa ku dhawaaqay inay tanaasuleen, iyagoo aan sheegin sababaha ku kallifay inay tanaasul sameeyaan.

Iyadoo uu horay u tanaasulay C/raxmaan C/shakuur Warsame ayaa waxaa ku biiray, Xuseen Khaliif Jaamac iyo Bashiir Nuur Xasan (Bidaar) iyadoo ay isku soo hareen 22 murashax oo tartan adag uu dhexmari doono.

"Waxaa warqado ay ku tanaasulaan inoo soo gudbiyay laba murashax, mid kalena horay ayuu u tanaasulay, waxaana leennahay saddexdooda meel kale guul Allaha idinka siiyo," ayay tiri guddoomiyaha guddiga doorashada madaxweynaha Somalia, xildhibaanad Maryan Cariif Qaasim.

Mudanayaasha isku soo haray ayaa waxay kala yihiin:
  1. Cabdiraxmaan Macallin Cabdullaahi (Baadiyoow)
  2. Cabdiraxmaan Maxamed Cabdi Xaashi
  3. Cabdiweli Cilmi Cumar (Goon-jeex)
  4. Cabdiweli Maxamed Cali (Gaas)
  5. Cabdulqaadir Cosoble Cali
  6. Cabdullaahi Axmed Caddoow
  7. Axmed Ismaaciil Samatar
  8. Xaaji Maxamed Yaasiin Ismaaciil
  9. Xasan Sheekh Maxamuud
  10. Ibraahim Cali Xuseen
  11. Maslax Maxamed Siyaad Barre
  12. Maxamed C/weli Sheekh Yuusuf Direed
  13. Maxamed Cabdullaahi Maxamed (Farmaajo)
  14. Maxamed Cabdullaahi Oomaar
  15. Maxamed Axmed Saalax
  16. Cumar Salaad Cilmi
  17. Cusmaan Maxamed Gacal
  18. Siciid Ciise Maxamuud
  19. Salaad Cali Jeelle
  20. Sheekh Shariif Sheekh Axmed
  21. Yuusuf Garaad Cumar Axmed
  22. Zakariye Maxamuud Xaaji Cabdi
Xildhibaannada u codeynaya murashaxiinta madaxweyne oo tiradoodu marba marka ka dambeysa sii kordhayso ayaa waxay hadda maraysaa 242 mudane, iyadoo lagu wado in la dhaariyo 20 xildhibaan oo go'aan ay kasoo gaareen guddi loo saaray inay kasoo tala-bixiyaan.

Doorashada oo saddex wareeg ah ayaa waxay qaadan doonaa saacado badan, iyadoo isla maanta lagu dhawaaqi doono natiijada doorashada iyo madaxweynaha sida rasmiga ah ugu guuleysatay xilka.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/10/2012 6:47 PM EST
Kadib markii ay baarlamaanka Soomaaliya si aqlabiyad ah ugu codeeyeen madaxweynaha cusub ee Soomaaliya Xassan Sheekh Maxamuud ayaa magaalada Muqdisho laga maqlay sawaxanka rasaasta.

9/10/2012 2:10 PM EST
Isniin, September 10, 2012(HOL): Waxaa si aqlabiyad leh ugu guuleystay madaxweynenimada Soomaaliya Xasan Shiikh Maxamuud oo wareeggii ugu dambeeyay ee doorashada madaxweynenimada uga adkaaday Madaxweynihii hore Shiikh Shariif Shiikh Axmed.

9/10/2012 7:50 AM EST
Isniin, September 10, 2012 (HOL) — Xildhibaannadii horay loogu diiday inay ka mid noqon doonaan baarlamaanka Soomaaliya oo ay ku jiraan hoggaamiye kooxeedyadii hore ee Soomaaliya ayaa la dhaariyay maanta si ay uga qaybgalaan doorashada madaxweynenimo ee Soomaaliya.

9/10/2012 7:35 AM EST
Isniin, September 10, 2012 (HOL) — Hay'adaha CPD iyo SOYDEN oo ka shaqeeya arrimaha horumarinta dhallinyarada ayaa soo gabgabeeyay tababar muddo sideed bilood socday oo lagu tababarayay dhallinyaro ay saameyn ku yeesheen colaadaha dalka ka jira.

9/10/2012 7:10 AM EST
Isniin, September 10, 2012 (HOL) — Musharaxa xisbiga madaxweyne ee xisbiga UDUB, ayaa sheegay inay ka qaybgali doonin doorashooyinka golaha deegaanka, isla markaana xusay inuu maxkamadda u gudbin doono dacwad ka dhan ah guddidda Diiwaangelinta ururadda.

9/10/2012 5:30 AM EST
Isniin, September 10, 2012 (HOL) — Markab ay leeyihiin ciidamada NATO ee howlgalka la dagaalanka burcad-badeedda u jooga xeebaha dalka Soomaailya, gaar ahaan kuwa Puntland ayaa soo badbaadiyey koox tahriibeyaal ah oo isugu jira Soomaali iyo Itoobiyaan, kuwaas oo muddo dhowr beri ah badda saarnaa, kadib markii ay ciladi soo food saartay doon yar oo ay ku safrayeen.

9/10/2012 5:26 AM EST
Isniin, September 10, 2012 (HOL) — Iyadoo la filayo in maanta magaalada Muqdisho ay ka dhacdo doorashada madaxtinimo ee Soomaaliya oo ay u taaganyihiin ku dhowaad ilaa 25 musharax ayaa Soomaalida ku dhaqan dalka gudihiisa iyo dibadiisa waxa ay isha ku hayaan warbaahinta Soomaalida ee soo tabinaysa qaabka ay u dhaceyso doorashada.

9/10/2012 4:28 AM EST
Isniin, September 10, 2012(HOL): Waxaa la soo gebagebeeyay wareegga koowaad ee doorashada madaxweynenimada Soomaaliya oo maanta mudanayaasha baarlamaanka Soomaaliya ku kala dooranayeen musharraxiin isu soo taagay xilka madaxweynenimada Soomaaliya.

9/10/2012 3:16 AM EST
Isniin, September 10, 2012 (HOL) — Shacabka Soomaaliyeed ee ku nool gudaha iyo dibadda dalka ayaa rajo wanaagsan ka muujiyay doorashada maanta Muqdisho ka dhacaysa ee lagu soo dooranayo madaxweynaha hoggaamin doona dalka muddo dheer kaddib.

9/10/2012 2:54 AM EST
Isniin, September 10, 2012 (HOL) — Xildhibaannada baarlamaanka Soomaaliya ayaa maanta oo Isniin ah dooran doona madaxweynihii dalka hoggaamin lahaa afarta sano ee soo socota, iyadoo doorahadan ay noqonayso tii ugu horreysay oo dalka ka dhacda muddo afartameeyo sano ka badan.