8/10/2022
Today from Hiiraan Online:  _
Wararka Maanta- Isniin, Sept 10, 2012
Shacabka Soomaaliyeed oo Doorashada Maanta dhacaysa ku tilmaamay mid Taariikhi ah Rajo wanaagsanna muujiyay
Isniin, September 10, 2012 (HOL) — Shacabka Soomaaliyeed ee ku nool gudaha iyo dibadda dalka ayaa rajo wanaagsan ka muujiyay doorashada maanta Muqdisho ka dhacaysa ee lagu soo dooranayo madaxweynaha hoggaamin doona dalka muddo dheer kaddib.


Doorashadan oo mid ay beesha caalamka iyo shacabka Soomaaliyeed indhaha ku hayaan ayaa waxay ka dhacaysaa goob ilaalinayaan ciidamada Midowga Afrika iyo kuwa Soomaaliya, waxaana baarlamaanka dooranaya madaxweyaha lagu sheegay inuu yahay kii ugu aqoonta badnaa ee Soomaaliya soo mara 21-kii ee colaaduhu ay jireen.

"Waxaa maanta dhacaya wax aan dhammaanteen sugaynay, waxaan rajeynaynaa in doorashadan ay noqoto mid lagu guuleysto," ayay yiraahdeen Soomaali ku nool dalka dibaddiisa oo intaas ku daray: "Rabbiga awoodda leh waxaan weydiisanaynaa inuu murashaxiinta kasoo dhex saaro hoggaamiye daacad ah."

Soomaalida dibadaha ku nool ayaa waxay rajo weyn ka qabaan inay dalka dib ugu soo laabtaan haddii doorashadan lagu guuleysato, iyadoo doorashadan ay Somalia uga baxayso xilliga KMG ah oo sannadihii ugu dambeeyay ay dowladuhu ku shaqeynayeen.

"Inkastoo bulshada aysan waxba dooranayn, haddana waxaan xildhibaannada ka codsanaynaa inay soo doortaan hoggaamiye dalka wax ka qaban kara dadkana wax u qaban kara," ayay yiraahdeen dhallinyaro ku nool Muqdisho, kuwaasoo ka baxay jaamadaha dalka ; basle aan wax shaqooyin ah helin.

Magaalada Muqdisho ayaa jawi ahaan si aad ah uga bedelen sidii ay ahaan jirtay, waxaana magaalada ka muuqda firaaqo weyn, iyadoo dadku ay ku sugan yihiin guryahooda iyo goobaha ay dadweynuhu isugu yimaadeen halkaasoo laga socdo doorashada.

"Tani (doorashada) waa mid taariikhi ah; waayo qof walba oo Soomaali ah wxuuu dareemayaa jawi aan kii hore ahayn. Dadku waxay u muuqdaan kuwo ilbaxnimo ahaan koray, dalkuna wuxuu u muuqdaa mid kasoo daalay dagaallo iyo rabshado aan macno badan lahayn," ayay tiri Raxmo Cali oo ka mid ah ardayda wax ka bartay jaamacadaha Muqdisho.

Doorashadan ayaa waxay noqonaysaa tii ugu horreysay oo Muqdisho ka dhacda wixii ka dambeeyay doorashadii madaxweynihii hore ee Soomaaliya Cabdirashiid Cali Sharma'arke oo la doortay sannadkii 1967-kii, inkastoo la dilay 1969-kii markaasoo ay xukunka dalka si awood ah kula wareegeen milateriga.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/10/2012 6:47 PM EST
Kadib markii ay baarlamaanka Soomaaliya si aqlabiyad ah ugu codeeyeen madaxweynaha cusub ee Soomaaliya Xassan Sheekh Maxamuud ayaa magaalada Muqdisho laga maqlay sawaxanka rasaasta.

9/10/2012 2:10 PM EST
Isniin, September 10, 2012(HOL): Waxaa si aqlabiyad leh ugu guuleystay madaxweynenimada Soomaaliya Xasan Shiikh Maxamuud oo wareeggii ugu dambeeyay ee doorashada madaxweynenimada uga adkaaday Madaxweynihii hore Shiikh Shariif Shiikh Axmed.

9/10/2012 7:50 AM EST
Isniin, September 10, 2012 (HOL) — Xildhibaannadii horay loogu diiday inay ka mid noqon doonaan baarlamaanka Soomaaliya oo ay ku jiraan hoggaamiye kooxeedyadii hore ee Soomaaliya ayaa la dhaariyay maanta si ay uga qaybgalaan doorashada madaxweynenimo ee Soomaaliya.

9/10/2012 7:35 AM EST
Isniin, September 10, 2012 (HOL) — Hay'adaha CPD iyo SOYDEN oo ka shaqeeya arrimaha horumarinta dhallinyarada ayaa soo gabgabeeyay tababar muddo sideed bilood socday oo lagu tababarayay dhallinyaro ay saameyn ku yeesheen colaadaha dalka ka jira.

9/10/2012 7:10 AM EST
Isniin, September 10, 2012 (HOL) — Musharaxa xisbiga madaxweyne ee xisbiga UDUB, ayaa sheegay inay ka qaybgali doonin doorashooyinka golaha deegaanka, isla markaana xusay inuu maxkamadda u gudbin doono dacwad ka dhan ah guddidda Diiwaangelinta ururadda.

9/10/2012 6:13 AM EST
Isniin, September 10, 2012 (HOL) — Murashaxiin ka mid ahaa kuwii u tartamaya xilka madaxnimo ee Soomaaliya ayaa ku dhawaaqay inay tanaasuleen, iyagoo aan sheegin sababaha ku kallifay inay tanaasul sameeyaan.

9/10/2012 5:30 AM EST
Isniin, September 10, 2012 (HOL) — Markab ay leeyihiin ciidamada NATO ee howlgalka la dagaalanka burcad-badeedda u jooga xeebaha dalka Soomaailya, gaar ahaan kuwa Puntland ayaa soo badbaadiyey koox tahriibeyaal ah oo isugu jira Soomaali iyo Itoobiyaan, kuwaas oo muddo dhowr beri ah badda saarnaa, kadib markii ay ciladi soo food saartay doon yar oo ay ku safrayeen.

9/10/2012 5:26 AM EST
Isniin, September 10, 2012 (HOL) — Iyadoo la filayo in maanta magaalada Muqdisho ay ka dhacdo doorashada madaxtinimo ee Soomaaliya oo ay u taaganyihiin ku dhowaad ilaa 25 musharax ayaa Soomaalida ku dhaqan dalka gudihiisa iyo dibadiisa waxa ay isha ku hayaan warbaahinta Soomaalida ee soo tabinaysa qaabka ay u dhaceyso doorashada.

9/10/2012 4:28 AM EST
Isniin, September 10, 2012(HOL): Waxaa la soo gebagebeeyay wareegga koowaad ee doorashada madaxweynenimada Soomaaliya oo maanta mudanayaasha baarlamaanka Soomaaliya ku kala dooranayeen musharraxiin isu soo taagay xilka madaxweynenimada Soomaaliya.

9/10/2012 2:54 AM EST
Isniin, September 10, 2012 (HOL) — Xildhibaannada baarlamaanka Soomaaliya ayaa maanta oo Isniin ah dooran doona madaxweynihii dalka hoggaamin lahaa afarta sano ee soo socota, iyadoo doorahadan ay noqonayso tii ugu horreysay oo dalka ka dhacda muddo afartameeyo sano ka badan.