9/25/2022
Today from Hiiraan Online:  _
Wararka Maanta- Isniin, Sept 10, 2012
Xildhibaannada Baarlamaanka Soomaaliya oo maanta dooranaya Madaxweyne Afarta sano ee soo socota hoggaamiya dalka
Isniin, September 10, 2012 (HOL) — Xildhibaannada baarlamaanka Soomaaliya ayaa maanta oo Isniin ah dooran doona madaxweynihii dalka hoggaamin lahaa afarta sano ee soo socota, iyadoo doorahadan ay noqonayso tii ugu horreysay oo dalka ka dhacda muddo afartameeyo sano ka badan.


Murashaxiinta xilka madaxweynenimo ee Soomaaliya u tartamaya oo tiradoodu ay gaarayso 24 ayaa waxaa dhexmari doona tartan adag, iyadoo murashax walba uu xildhibaanada ka akhriyay barnaamijkiisa siyaasadeed labadii maalmood ee lasoo dhaafay.

"Doorashadu waxay ka dhacaysaa dugsiga tababarka booliiska Muqdisho, waxaa ku sugan mudanayaasha baarlamaanka iyo murashaxiinta goor dhow ayaana la filayaa inay doorashadu billaabato," ayuu yiri Axmed C/samad oo ka mid ah wariyeyaasha HOL, isagoo maanta soo tabinaya sida ay doorashadu u dhacayso.

Madasha ayaa waxaa ku sugan wufuud caalami ah oo goobjoog ka noqonaya sida ay doorashadu u dhacayso, waxaana lagu wadaa in isla maanta lagu dhawaaqo madaxweynaha dalka afarta sano ee soo socota, iyadoo isla maanta loo dhaarin doono xilka.

Guddoonka baarlamaanka Soomaliya iyo guddiga doorashada ayaa sheegay inay u dhacayso doorashada si cad oo aan musuqmaasuq lahayn, waxayna shacabka ka dalbadeen inay qayb ka qaatana deggenaashaha inta doorashadu socoto.

Ammaanka magaalada Muqdisho ayaa aad loo adkeeyay iyadoo jidadka waaweyn la dhigay ciidammo isugu jira milateri iyo booliis, waxaana sidoo kale goobta uu shirku ka dhacayo ku sugan ciidamada dowladda Soomaaliya iyo kuwa AMISOM oo isugu jira milateri iyo booliis.

Shacabka ayaa waxay doorashada kala socdaan qalabka warbaahinta, waxayna si aad ah u sugayaan madaxweynaha kusoo baxaya doorashada oo hoggaamin doona dalka afarta sano ee soo socota, iyadoo laga baxayo xilliga KMG ah oo muddo dheer uu dalku kusoo jiray.

Tan iyo markii ay dhacday dowladdii dhexe ee Soomaaliya sannadkii 1991-kii kama jirin Soomaaliya dowlad awood leh, waxaana dalka uu marti u noqday mid ay kala qaybsadaan hoggaamiye kooxeedyo, wuxuuna sidoo kale soo maray dagaallo dhiig fara badan ay ku daateen.

Dadweynaha Soomaaliyeed ayaa rajo weyn ka qaba in dalka uu isbedeli doono kaddib doorashada madaxweynenimo, waxaana xubnaha doorashada ku tartamaya ay u badan yihiin dad ka yimid dibadda dalka.

Maxamed Xaaji Xuseen, Hiiraan Online
[email protected]
Muqdisho, Soomaaliya












Click here
9/10/2012 6:47 PM EST
Kadib markii ay baarlamaanka Soomaaliya si aqlabiyad ah ugu codeeyeen madaxweynaha cusub ee Soomaaliya Xassan Sheekh Maxamuud ayaa magaalada Muqdisho laga maqlay sawaxanka rasaasta.

9/10/2012 2:10 PM EST
Isniin, September 10, 2012(HOL): Waxaa si aqlabiyad leh ugu guuleystay madaxweynenimada Soomaaliya Xasan Shiikh Maxamuud oo wareeggii ugu dambeeyay ee doorashada madaxweynenimada uga adkaaday Madaxweynihii hore Shiikh Shariif Shiikh Axmed.

9/10/2012 7:50 AM EST
Isniin, September 10, 2012 (HOL) — Xildhibaannadii horay loogu diiday inay ka mid noqon doonaan baarlamaanka Soomaaliya oo ay ku jiraan hoggaamiye kooxeedyadii hore ee Soomaaliya ayaa la dhaariyay maanta si ay uga qaybgalaan doorashada madaxweynenimo ee Soomaaliya.

9/10/2012 7:35 AM EST
Isniin, September 10, 2012 (HOL) — Hay'adaha CPD iyo SOYDEN oo ka shaqeeya arrimaha horumarinta dhallinyarada ayaa soo gabgabeeyay tababar muddo sideed bilood socday oo lagu tababarayay dhallinyaro ay saameyn ku yeesheen colaadaha dalka ka jira.

9/10/2012 7:10 AM EST
Isniin, September 10, 2012 (HOL) — Musharaxa xisbiga madaxweyne ee xisbiga UDUB, ayaa sheegay inay ka qaybgali doonin doorashooyinka golaha deegaanka, isla markaana xusay inuu maxkamadda u gudbin doono dacwad ka dhan ah guddidda Diiwaangelinta ururadda.

9/10/2012 6:13 AM EST
Isniin, September 10, 2012 (HOL) — Murashaxiin ka mid ahaa kuwii u tartamaya xilka madaxnimo ee Soomaaliya ayaa ku dhawaaqay inay tanaasuleen, iyagoo aan sheegin sababaha ku kallifay inay tanaasul sameeyaan.

9/10/2012 5:30 AM EST
Isniin, September 10, 2012 (HOL) — Markab ay leeyihiin ciidamada NATO ee howlgalka la dagaalanka burcad-badeedda u jooga xeebaha dalka Soomaailya, gaar ahaan kuwa Puntland ayaa soo badbaadiyey koox tahriibeyaal ah oo isugu jira Soomaali iyo Itoobiyaan, kuwaas oo muddo dhowr beri ah badda saarnaa, kadib markii ay ciladi soo food saartay doon yar oo ay ku safrayeen.

9/10/2012 5:26 AM EST
Isniin, September 10, 2012 (HOL) — Iyadoo la filayo in maanta magaalada Muqdisho ay ka dhacdo doorashada madaxtinimo ee Soomaaliya oo ay u taaganyihiin ku dhowaad ilaa 25 musharax ayaa Soomaalida ku dhaqan dalka gudihiisa iyo dibadiisa waxa ay isha ku hayaan warbaahinta Soomaalida ee soo tabinaysa qaabka ay u dhaceyso doorashada.

9/10/2012 4:28 AM EST
Isniin, September 10, 2012(HOL): Waxaa la soo gebagebeeyay wareegga koowaad ee doorashada madaxweynenimada Soomaaliya oo maanta mudanayaasha baarlamaanka Soomaaliya ku kala dooranayeen musharraxiin isu soo taagay xilka madaxweynenimada Soomaaliya.

9/10/2012 3:16 AM EST
Isniin, September 10, 2012 (HOL) — Shacabka Soomaaliyeed ee ku nool gudaha iyo dibadda dalka ayaa rajo wanaagsan ka muujiyay doorashada maanta Muqdisho ka dhacaysa ee lagu soo dooranayo madaxweynaha hoggaamin doona dalka muddo dheer kaddib.