11/14/2018
Today from Hiiraan Online:  _
Wararka Maanta- Axad, May 6 , 2012
Magaalada Muqdisho oo dib loo dhisayo Inkastoo Xaaladda Ammaanka ay weli tahay mid aan Wanaagsanayn


Axad, May 06, 2012 (HOL) — Magaalada Muqdisho ee xarunta Soomaaliya ayaa waxaa ka socda dhismayaal cusub, iyadoo weli ammaankeedu uu yahay mid aan wanaagsanayn, waxaase dadku iyo madaxda dowladdu ay rajo ka muujinayaan in ammaanku uu sidan ka wanaagsanaan doono.

Caasimadda Soomaaliya ayaa wuxuu burburkeedu soo billowday sannadkii 1991-kii markaasoo xilka laga tuuray dowladdii dhexe ee Soomaaliya, iyadoo 21-kii sano ee ay colaaduhu jireen ay inta badan caasimaddu burburtay.

"Ammaanku ma ahan weli mid la isku halleyn karo, laakiin dadku waxay go'aan ku gaareen inay noloshooda caadi kusoo celiyaan," ayuu yiri Axmed Sheekh Guure oo ka mid ah ganacatada Soomaaliyeed oo u warramayay wakaaladda wararka ee AFP. "Dadku waxay dhisanayaan guryahoodii burburay," ayuu hadalkiisa ku daray,

Suuqa bakaaraha oo ah midka ugu weyn ee ku yaalla Muqdisho ayaa waxaa isna ka socda dib u dhis xoog leh, kaddib markii ay burburiyeen dagaallo sannadkii hore ku dhexmaray ciidamada DKMG ah, kuwa AMISOM iyo xoogagga Al-shabaab oo muddo ka talinayay suuqaas.

"Runtii anigu ma moodayn in dagaalku uu waqtigan qaadan karo," ayuu yiri Guure. "Ilaahay baa mahad leh, maxaa yeelay waxaan haysannaa fursad aan dayactir ku sameyn karno."

Afhayeenka xukuumadda KMG ah ee Soomaaliya, Inj. C/raxmaan Cumar Yariisow oo la hadlay AFP ayaa sheegay in dadku ay dib u dhis ku sameynayaan guryahooda. "Soomaalida dibadaha ku nool ayaa dib u soo laabanaya... si ay gacan uga geystaan dib u furidda ganacsiga."

Wax ka yar hal sano, xoogagga hubeysan ee Al-shabaab waxay madaafiic culus isku dhaafsan jireen Muqdisho ciidamada dowladda KMG ah iyo kuwa AMISOM, kuwaas oo keenay in magaaladu ay sii burburto. Laakiin hadda waxaa socda dib u dhis xoog leh.

"Maalmahan shaqo la'aan nama hayso, dib u dhis ayaa si aad ah u socda," ayuu yiri Aadan Shariif oo ah rinjiile. Isagoo hadalkiisa ku daray: "Afar toddobaad ama shan toddobaad oo kasta, waxaa naloogu yeeraa shaqo cusub."

Goobaha aadka u dhismaya ayaa waxaa ka mid ah degmooyinkii ay Xarakada Al-shabaab isaga baxday sannadkii hore, halkaasoo ay ku yaalleen xarumo ganacsi oo waaweyn, sida xaafadaha ku teedsan jidka Soddonka iyo jidka kale ee Wadnaha.

"Inaad dhul iibsato Muqdisho aad ayay qaali u tahay, maxaa yeelay sicirka guryaha ayaa aad sare ugu kacay... ganacsatadu waxay ka fikirayaan sida uu xaalku isku bedeli karo xilliga soo socda, waayo dagaalku weli uma muuqdo mid dhammaaday," ayuu yiri Cabdulqaadir Bashiir oo ganacsade ah.

Xoogagga Al-shabaab waxay dagaalkoodii u bedeleen mid jabhadeyn ah, sida in la qarxiyo gaari miineysan, duqeyn iyo weerarro kale oo toos ah, kuwaasoo ay wax-yeello kasoo gaarto dadka shacabka ah iyo ciidamada dowladda.

"Dhismihii aad maanta dhisto, waxaa si fudud loogu dumin karaa berri," ayuu Bashiir mar kale yiri. Isagoo sheegay in walaac xooggan uu ka haysto guryaha ay dib u dhisayaan waxa ay berri ku dameyn karaan.

Ganacsada kale oo lagu magaaabo Maxamed Cabdullaahi ayaa isaguna sheegay in ijaarka guryaha uu aad qaali u yahay, isagoo xusay in halkii qol oo deegaan ah ay kuugu kacayso bishii 10-dollar, isagoo sheegay in bilaha soo socda ay imaan karto inaadan ijaarka qolkii ku helin 40-dollar.

Ugu dambeyn, ganacsadahan wuxuu hadalkiisa kusoo gabagabeeyay "Allaa weyn, waxaan rajeynayaa in dadku ay dib u soo laabtaan ayna dib u dhisaan dalka."

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/6/2012 9:03 PM EST
Isniin, May 07, 2012(HOL): Fanaanniin, aqoonyahanno iyo waxgarad ku nool magaalada Stockholm ee caasimadda Dalka Sweden ayaa gurmad intii karaankooda ah u sameeyay Abwaan Axmed Cabdi Gaashaan oo Muqdisho ku xanuunsanaya, isagoo qaba dhaawac ka soo gaaray qaraxii Tiyaatarka ee dhimashada iyo dhaawaca ka dhasheen.

5/6/2012 4:18 PM EST
Axad, May 06, 2012-Dalka Faransiiska ayaa markii ugu horreysay muddo 17 sano ah yeeshay madaxweyne ka socda Xisbiga Socialist Party ee dalkaas, kaasi oo lagu magacaabo Francois Hollande.

5/6/2012 1:10 PM EST
Axad,May 06, 2012 (HOL)- Madaxweynaha Somaliland, Mudane, Axmed Maxamed Maxamuud (Siilaanyo),ayaa maanta xafiiskiisa ku qaabilay lix xubnood oo uu hogaaminayo u qaybsamaha arrimaha Soomaaliya ee Maraykanka Mr: Douglas Meurs ee safaaradda Nairobi ee dalka Kenya.

5/6/2012 1:08 PM EST
Axad, May 06, 2012 (HOL)- Madaxweynaha Somaliland, Mudane, Axmed Maxamed Maxamuud (Siilaanyo), ayaa Digreeto Madaxweyne xilkii uu hayey kaga qaaday Gudoomiyihii Gobolka Salal, Mudane, Maxamed Muuse Bucul, waxaanu gudoomiye cusub u magacaabay gobolkaasi Nuur CIsmaan Guuleed.

5/6/2012 1:04 PM EST
Axad, May 06, 2012 (HOL): Wasiirka Qorsheynta iyo Xiriirka Caalamiga Cabdulahi Goodax Barre ayaa maanta xafiiskiisa ku qaabilay Stefano Porretti oo ah Wakiilka Wadamada ee WFP. Kulanka labada dhinac ayaa waxaa looga hadlayay arrimaha gargaarka iyo kuwa bini’aadanimo sidii wax looga qaban lahaa.

5/6/2012 6:58 AM EST
Axad, May 06, 2012 (HOL) — Taliyaha cusub ee ciidamada AMISOM, Jen. Andrew Gutti ayaa sheegay in howgallada ciidamada AMISOM lagu baahin doono gabi ahaan dalka Soomaaliya, isagoo xusay inay tegi doonaan demgooyinkii laga saaray Al-shabaab.

5/6/2012 6:47 AM EST
Axad, May 06, 2012 (HOL) — Booliiska dalka Zambia ayaa xiray safaaraddii ay ku lahayd Soomaaliya magaalada Lusaaka ee xarunta dalkaas Kaddib markii uu dagaal dhexmaray safiirkii Soomaaliya ee dalkaas iyo safiir cusub oo sheegay inuu xilkaas u magacabaay madaxweyne Sheekh Shariif Sheekh Axmed.

5/6/2012 5:46 AM EST
Axad, May 06, 2012 (HOL) — Madaxweynaha Soomaaliya, Shariif Sheekh Axmed oo hadal dheer ka jeediyay kulankii furitaanka shirkii odayaasha-dhaqanka ee Muqdisho ka furmay ayaa sheegay inaanu dalka ku jiri karin KMG, isagoo xusay inaysan jirin duruuf kallifaysa in lagu sii jiro.

5/6/2012 2:55 AM EST
Axad, May 06, 2012 (HOL) — Hoggaamiyihii hore ee ururkii Xisbul Islaam, haddana ah sarkaal sare oo ka tirsan Al-shabaab, Sheekh Xasan Daahir Aweys ayaa hadal uu jeediyay ku sheegay in dowladda KMG ah ay tahay mid aan jirin, sidoo kalena wuxuu aad u dhaliilay dastuurka cusub ee la doonayo in la ansixiyo.

5/6/2012 2:54 AM EST
Axad, May 06, 2012 (HOL) — Urur-diimeedka Ahlusunna Waljameeca ayaa sheegay inaysan jirin cid uga qaybgalaysa shirka odayaasha-dhaqanka ee shalya Muqdisho ka furmay, kaasoo lagu soo xulayo ergooyinka ansixinaya dastuurka cusub ee dalka Soomaaliya uu yeelanayo mustaqbalka dhow.