9/21/2018
Today from Hiiraan Online:  _
Wararka Maanta- Jimco, May 4 , 2012
Wararkii ugu danbeeyay xaalada degmada Maxaas ee gobollka Hiiraan


Jimco, May, 04, 2012 (HOL) --  Wararka laga hellayo degmada Maxaas ee gobollka Hiiraan ayaa sheegaya in ay halkaa isaga baxeen xoogagga Xarrrakada Mujaahidiinta Al-shabaab oo maalintii shalay gudaha u galay degmada.

Dad ku sugan degmada Maxaas oo ay HOL la hadashay ayaa sheegay in maalintii shalay galinkii danbe ilaa xalay fiidnimadii lagu arkayay saldhiga degmada Maxaas dagaalyahannada Al-shabaab, kuwasoo markii danbe isaga baxay saqdii dhexe ee xalay, iyaga oo fariisin ka dhigtay meeel aan ka fogeyn degmada.

Xoogagga Ahlu Sunna Waljameeca ee deegaannadaas kula dagaallamaya Xarrakada Al-shabaab ayaa lagu waramayaa in ay intooda badan u ruqaansadeen dhinaca deegaannka Goobo oo wax aan badneyn jira degmada Maxaas, halkaasoo saacadihii aynu soo dhaafnay uu dagaal ku dhaxmaray labada garab.

‘’Degmada Maxaas inta badan labada dhinac kuma nagaadaan, marba qolo ayaa soo gasha, haddana waa ay isaga baxaan, arintaa dhibaato xoog leh ayeey ku heysaa dadka degmada oo mar walba wadnaha farta uga haya in dushooda lagu dagaallamo,’’ ayuu yiri, qof ku sugan degmada Maxaas ee gobollka Hiiraan.

Saraakiisha maamulka Ahlu Sunna Waljameeca ayaa warbaahinta u sheegay in wax dagaal ah uusan ka dhicin deegaannadaas laakiin iskooda ay uga baxeen, iyaga oo intaa ku darray in hadda degmada Maxaas iyo deegaannka Goobo intaba yihiin kuwo cidlo ah oo aan cidna joogin.

Xarig jiidka iyo iska bada wareega ku saleysan colaada ee ka taagan deegaannada hoos taga degmada Maxaas ee gobollka Hiiraan ayaa jahwareer aan caadi aheyn ku riday dadka ku dhaqan deegaannadaas u badan dad xoola dhaqato ah, kuwaasoo mar marka qaar loo dhibaateeyo ku lug lahaanshaha siyaasadaha is diidan ee labada dhinac.

C/raxmaan Diini, Hiiraan Online
[email protected]
Beledweyne, Soomaaliya.







Click here
5/4/2012 7:48 AM EST
Jimco, May 04, 2012 — COL Cabaas Ibraahim Gurey oo kamid ah saraakiisha hogaamineysa ciidamada dowladda KMG ee howlgalka ka wada gobolka Gedo ayaa sheegay in dhawaan ay qorsheynayaan weerar ballaaran oo ay ku qaadaan magaalada Baardheere ee gobolka Gedo.

5/4/2012 7:47 AM EST
Jimco, May 04, 2012 — Maamulka xarakada Al-shabaab ee magaalada Bu'aale ee gobolka Jubada Dhexe ayaa gobolka ka eryay qaar katirsan odayaal dhaqameedyo caan ka ah gobollada Jubooyinka.

5/4/2012 7:32 AM EST
Jimco, May 04, 2012 — Waxaa goor dhow garoonka diyaaraha caalamiga ah ee Aadan Cadde ee Muqdishoka duulay wafdi uu hogaaminayo duqa magaalada Muqdisho ahna guddoomiyaha gobolka Banaadir oo ku sii jeeda magaalada Istanbuul ee dalka Turkiga.

5/4/2012 7:16 AM EST
Xaflad ay soo qaban qaabisay kooxda waayaha cusub oo ay kasoo qeyb galeen boqolaal dad ah oo reer Eastleigh ah, isla markaana loogu magac darey (Nabadi waa nolole, Dhalinyarooy Nageeh) taasoo lagu wacyi galinayo dhalinyarada Soomaaliyeed ayaa lagu qabtay xaafada Easliegh ee magaalada Nairobi

5/4/2012 6:47 AM EST
Hay’adda u dooda xuquuqda aadanaha ee Human Rights Watch oo maantay soo bandhigtay warbixinteeda sannadlaha ah ayaa sheegtay in tacadiyo xoog leh ay ciidamada Kenya u gaystaan dadka qaxootiga ah ee Soomaalida ah.

5/4/2012 4:30 AM EST
Jimco, May 04, 2012 (HOL) — Shirka lagu soo xulayo guddiga ansixinaya dastuurka cusub ee Soomaaliya ayaa lagu wadaa in berri oo Sabti ah uu ka furmo magaalaad Muqdisho, sida madaxweyne Sheekh Shariif u sheegay warbaahinta.

5/4/2012 4:20 AM EST
Jimco, May 04, 2012 (HOL) — Afhayeenka Al-shabaab, Sheekh Cali Maxamuud Raage (Sheekh Cali Dheere) oo wareysi siiyay idaacadda Andulus oo ku hadasha codka Al-shabaab ayaa sheegay inay ku guuleysteen inay fashiliyaan shir lagu doonayay in dhibaatooyin looga abuuro gobollada dhexe oo muddo sannad ah lasoo qorsheynayay.

5/4/2012 4:09 AM EST
Jimco, May 04, 2012 (HOL) — Madaxweynaha Soomaaliya, Sheekh Shariikh Sheekh Axmed oo shalay booqday xarunta gaadiidka booliiska oo lagu wado inuu ka furmo shirka lagu ansixinayo dastuurka cusub ee Soomaaliya, ayaa sheegay inaysan aqbali karin in dastuurka laga soo horjeesto, laakiin ay ogol yihiin in qodobbadiisa laga doodo.

5/4/2012 3:52 AM EST
Jimco, May 04, 2012 (HOL) — Dawladda hoose ee magaaladda Hargeysa, ayaa tan iyo sidii roobabkii u xidheen biyo mareenaddii ku mashquulsan sidii ay u furi lahaayeen biyo mareenadda ay camuudda iyo khashinku awday.

5/4/2012 3:48 AM EST
Jimco, May 04, 2012 (HOL) — Xoogagga Ahlusunna Waljamaaca ayaa ku toogtay degmada Dhuusomareeb ee gobolka Galguduud laba qof oo ka mid ahaa kuwii loosoo qabtay weerarkii ismiidaaminta ahaa ee Talaadiid lasoo dhaafay ka dhacay xarunta gobolka Galguduud.

5/4/2012 3:35 AM EST
Jimco, May 04, 2012 (HOL) — Madaxweynaha Kenya, Mwai Kibaki ayaa weydiistay beesha caalamka shalay oo Khamiis ahayd in gacan laga siiyo dowladdiisa sidii dib loogu celin lahaa qoxootiga Soomaalida gudaha dalkooda, gaar ahana goobihii laga saaray Al-shabaab.

5/4/2012 3:09 AM EST
Jimco, May 04, 2012 (HOL) — Kooxo hubeysan ayaa xalay weerar ku qaaday guri ay deggenaayeen ciidamada dowladda KMG ah ee Soomaaliya oo ku yaalla degmada Wardhiigley ee gobolka Banaadir, gaar ahaan xaafadda Xamarjadiid.

5/4/2012 2:56 AM EST
Jimco, May 04, 2012 (HOL) — Markii afaraad sannadkan oo keliya ayaa waxaa lagu weeraray xalay madaxtooyada Soomaaliya madaafiic culus, kuwaasoo qaarkood ku dhacay gudaha xarunta madaxtooyada, halka kuwo kalena ay ku dhaceen goobaha ku dhow.