9/23/2019
Today from Hiiraan Online:  _
Wararka Maanta- Axad, Oct 14, 2012
Madaxweynaha Somaliland Axmed Siilaanyo oo Wasiir u magcaabay Hoggaamiyihii Jabhadda SSC, Suleymaan Xagla-toosiye


Axad, Oktoobar 14, 2012 (HOL) — Madaxweynaha Somaliland, Axmed Maxamuud Maxamed (Siilaanyo) ayaa xil wasiir u magacaabay hoggamiyihii jabhadda SSC ee ka dagaalami jirtay deegaanka Buuhoodle, isagoo sidoo kale wasaarad cusub ku daray golaha wasiirrada Somaliland.


Wareegto habeenkii xalay ahaa kasoo baxday xafiiska madaxweynaha Somaliland, ayaa lagu sheegay in Saleebaan Ciise Axmed (Xagla-toosiye) loo magacaabay wasiirka wasaaradda dib u dajinta Somaliland, iyadoo wasiirkii wasaaradda, Cabdirisaaq Cali Cismaan isna loo magacaabay wasaaradda warshadaha oo aan horay uga mid ahayn wasaaradaha Somaliland.

Sidoo kale, madaxweynaha Somaliland, Axmed Siilaanyo ayaa sidoo kale wasiir ku xigeenka wasaaradda macdanta, biyaha iyo tamarta u magacaabay, Cabdisalaan Maxamed Xasan; iyadoo aan la sheegin xilka loo magacaabay wasiir ku xigeenkii hore ee wasaaraddan.

Wax ka badalka wasaaradaha Somaliland ayaa si weyn looga hadal hayaa saakay deegaannada Somaliland, iyadoo si gaar ah ay dadku uga hadlayaan wasiirnimada loo magacaabay Saleebaan Xagla-toosiyo, iyadoo dadka qaarkood ay soo dhaweyayaan halka kuwo kalena ay kasoo horjeedaan.

Magaacaabidda xilkan ayaa waxay imaanaysaa kaddib markii uu heshiis dhexmaray Somaliland iyo hoggaamiyihii SSC, heshiiskaasoo ay ka mid ahaayeen in ciidamada Somaliland laga raro aagaggii ay kaga sugnaayeen agagaarka Buuhoodle iyo in laga sii daayo xabsiyada Somaliland maxaabiis u xirxirnaa SSC ahaan, kuwaasoo ay Somaliland fulisay.

Saleebaan Xagla-toosiyo ayaa dhankiisa laga doonayaa in dadka daggan goobihii ay ka talin jirtay SSC laga dhaadhiciyo inay Somaliland ka tirsan yihiin, taasoo noqon doonta mid lagu tijaabinayo hoggaamiyhan xilka wasiir loo magacaabay.

Maamulka Somaliland ayaa waxay noqonaysaa markii ugu horreysay oo heshiis caynkan oo kale ah la galo jabhad ay dagaalamayeen; iyadoo tani ay imaanayso xilli ay Somaliland weli guluf ugu jirto sidii ay ku heli lahayd aqoonsi caalami ah.

Maxamed Xaaji Xuseen, Hiiraan Online
[email protected]
Muqdisho, Soomaaliya









Click here
10/14/2012 6:49 AM EST
Axad, Oktoobar 14, 2012 (HOL) — Guddoomiyaha baarlamaanka Soomaaliya, Prof. Maxamed Cismaan Jawaari ayaa ka dalbaday madaxweynaha Soomaaliya, Xasan Sheekh Maxamuud maanta inuu ku horkeeno baarlamaanka ra'iisul wasaaraha cusub ee Soomaaliya si loo ansixiyo.

10/14/2012 6:28 AM EST
Axad, Oktoobar 14, 2012 (HOL) — Dowladda Spain iyo hay'adda dhaqaatiirta aan xuduudda lahayn ee MSF ayaa waxay si wadajir ah u dalbadeen in lasii daayo laba haween ah oo u dhashay dalka Spain, kuwaasoo laga afduubay bishii Oktoobar ee sannadkii hore xeryaha qoxootiga Dhadhaab-Kenya xilli ay howlo caafimaad halkaas ka wadeen.

10/14/2012 6:14 AM EST
Axad, Oktoobar 14, 2012 (HOL) — Dibadbaxyo ballaaran oo lagu taageerayo ra'iisul wasaaraha cusub ee Dowladda Federaalka Soomaaliya Dr. Cabdi Faarax Shirdoon (Saacid) ayaa siyaabo kala duwan uga dhacay qaar katirsan degmooyinka gobolka Gedo.

10/14/2012 6:13 AM EST
Axad, Oktoobar 14, 2012 (HOL) — Xarakada Al-shabaab oo dagaal kula jirta dowladda federaalka Soomaaliya iyo ciidamada caawinaya ee AMISOM iyo kuwa Itoobiya ayaa xilkii ka qaaday guddoomiyahoodii gobolka Banaadir, Sheekh Maxamed Xasan Cumar (Abuu-Cabdiraxmaan) iyadoo xilkaas loo magacaabay mas'uulkii horay looga qaaday xilka gobolka Banaadir.

10/14/2012 4:15 AM EST
Axad, Oktoobar 14, 2012 (HOL) — Xildhibaanada Baarlamaanka Soomaaliya ayaa maanta kulan looga hadlayo xeer-hoosaadyada baarlamaanka ku yeelanaya xarunta golaha shacabka, iyadoo dhawaan guddi loo saaray dib u eegista xeer hoosaadyada baarlamaanka Soomaaliya.

10/14/2012 4:07 AM EST
Axad, Oktoobar 14, 2012 (HOL) — Kooxo Baastoolado ku hubeysan oo aan ilaa imika la garanayn cidda ay ka amarqaataan ayaa xalay toogasho ku dilay mid kamid ah odoyaasha dhaqanka magaalada Kismaayo xilli uu kasoo baxay masaajid uu ku tukaday saladdii Cishaha.