10/22/2019
Today from Hiiraan Online:  _
Wararka Maanta- Arbaco, Nov 28, 2012
Maamulka Degmada Dharkeynley ee Gobolka Banaadir oo sheegay inay deegaankooda ka qaadeen Isbaarooyinka


Arbaco, November 28, 2012 (HOL) — Maamulka degmada Dharkeynley ee gobolka Banaadir ayaa sheegay inay ku guuleysteen inay degmadaas ka qaadaan isbaarooyin yaallay, waxayan dowladda ka dalbadeen inay degmadaas geysto ciidammo ka hortaga in isbaarooyinka lasoo celiyo.

Guddoomiyaha degmada Dharkeynley, Macallin Cabdulle Cali Hilowle oo saxaafadda la hadlay maanta ayaa sheegay in isbaarooyin dhowr ah oo degmadaas yaallay la qaaday, balse ay baqdin weyn ka qabaan inay dib ugu soo laabtaan kooxihii laga qaaday.

"Isbaarooyinkii degmada yaallay waa la qaaday, waxaana dowladda ka dalbanaynaa inay ciidammo keento degmada si looga hortago inay kooxihii isbaarada laga qaaday ay dib u soo dhigtaan," ayuu yiri Macallin Cabdulle.

Dadka deegaanka ayaa sheegay in isbaarooyinkii oo dhan la qaaday, iyagoo intaas ku daray in kooxihii hubeysnaa ee isbaarooyinka laga qaaday ay weli ku sugan yihiin goobihii isbaarooyinku u oolli jireen, iyadoo dadku ay baqdin ka qabaan inay dib u soo laabtaan isbaarooyinka.

"Ciidamadii isbaarooyinka laga qaaday weli waa kuwo hubeysan oo xaafadaha ku sugan. Waxaa jirta cabsi ah inay dib isbaarooyinku u soo laabtaan, waayo hadda ayaa gaadiidka si hoose oo handadaad ah lacagaha looga qaataa," ayu yiri Cali Maxamuud oo ka mid ah dadka ku nool degmada Dharkeynley.

Degmada Dharkeynley ayaa ka mid ahayd degmooyinka ay yaalleen isbaarooyinka ugu badan ee lacagaha lagu qaado, waxaana qaadistoodan ay daba socotaa amar uu ku bixiyay madaxweynaha Soomaaliya inaan isbaarooyin lagu arki karin jidadka magaalada Muqdisho.

Maxamed Xaaji Xuseen, Hiiraan Online
[email protected]
Muqdisho, Soomaaliya









Click here
11/28/2012 12:28 PM EST
Arbaco, November 28, 2012 (HOL) —Madaxweeynaha Jamhuuriyadda Federaalka Soomaaliya Mudane Xasan Sheekh Max’uud iyo wafdigii uu hogaaminayay oo saaka ka ambabaxay Dalka Jabuuti ayaa galabta gaaray magaalada Adisababa ee dalka Itoobiya

11/28/2012 7:55 AM EST
Arbaco, November 28, 2012 (HOL) — Madaxweynaha Dowladda Soomaaliya, Xasan Sheekh Maxamuud iyo wafdi uu hoggaaminayo oo maalmihii lasoo dhaafay safar ku joogay dalka Jabuuti ayaa sheegay in safarka ay ku tageen Jabuuti uu isugu jiro laba qodob oo kala ah: maadcelin iyo inay tusaale ka dhigtaan sida dalkaas yar uu u shaqeynayo.

11/28/2012 6:39 AM EST
Arbaco, November 28, 2012 (HOL) — Guud ahaan gobolada iyo degmooyinka Somaliland waxa si weyn loogu dareeray sidii dadweynuhu ugu codayn lahaayeen musharaxiinta ka sharaxan degmooyinkooda, waxaanay Dadweynuhu saaka arooryadii hore safaf dhaadheer u galeen goobaha laga codaynayo, iyagoo si degan ugu jira sefefka una samraya cadceedda kulul iyo wakhtiga dheer ee ay ku jiraan safafka.

11/28/2012 6:20 AM EST
Arbaco, November 28, 2012 (HOL) — Iska-horimaad sababay khasaare nafeed ayaa maanta oo Arbaco ah ku dhexmaray duleedka degmada Balad-Xaawo ee gobolka Gedo ciidamada dowladda Soomaaliya iyo xoogagga Al-shabaab, iyadoo mas'uuliyiin u hadlay dowladda Soomaaliya ay guulo ka sheegteen dagaalka.

11/28/2012 6:17 AM EST
Arbaco, November 28, 2012 (HOL) — Ergayga xoghayaha guud ee qaramadda midoobay u qaabilsan Soomaaliya Dr: Augustine Mahiga, ayaa ka raali galiyey madaxweynaha iyo shacabka Somaliland warqad ka soo baxday xafiiskiisa oo uu madaxweynaha Somaliland si weyn u qoonsaday kuna tilmaamay mid gef ku ah qaranimadda Somaliland.

11/28/2012 3:24 AM EST
Arbaco, November 28, 2012 (HOL) — Wasiirka Gaashaandhigga Jamhuuriyadda federaalka Soomaaliya Mudane C/xakiin Xaaji Fiqi ayaa kulan la qaatay dhigiisa dalka Jabuuti, C/qaadir Kaamil Maxamed waxayna labadani masuul ka wada hadleen arimo ku saabsan iskaashiga labada dal.

11/28/2012 3:15 AM EST
Arbaco, November 28, 2012 (HOL) — Hay'adda Laan-Qeyrta Cas ee (ICRC) ayaa soo gabgabeysay raashin qaybin ay kawadday gobollada Koonfurta Soomaaliya, iyadoo sheegtay in deeqdaas ay ka faa'iideysteen 170,000 oo qof oo ku nool gobollada Jubbada Hoose iyo Gedo.

11/28/2012 3:14 AM EST
Arbaco, November 28, 2012 (HOL) — Maamulka Xarakada Al-Shabaab ee degmada Baardheere ayaa sheegay inay saaka gacanta ku dhigeen labo dhalinyaro oo ka yimid dhinaca degmada Mandheera ee dalka Kenya, kuwaasoo ay ku sheegeen inay yihiin basaasiin u adeegaya Kenya.

11/28/2012 2:40 AM EST
Arbaco, November 28, 2012 (HOL) — Qof ku hubeysnaa qoriga AK-47 ayaa fiidnimadii xalay ku toogtay magaalada Baladweyne sadax ruux oo rayid ah, kuwaasoo ka mid ahaa ganacsatada ku dhaqan magaalada.