12/8/2019
Today from Hiiraan Online:  _
Wararka Maanta- Arbaco, Jun 20, 2012
Dowladda KMG Soomaaliya iyo Somaliland oo shir Xasaasi ah uu uga furmaya Maanta Magaalada London


Arbaco, June 20, 2012 (HOL) — Magaalada London ee xarunta dalka Britain ayaa lagu wadaa inuu maanta ka furmo shirkii ugu horreeyay oo Soomaaliya iyo Somaliland ay uga hadlayaan mustaqbalkooda, kaasoo socon doona laba maalmood.

Madaxda labada dhinac ayaa waxay shirkaas u magacaabeen min shax xubnmood oo dhammaantood ku sugan London, iyadoo aan la ogeyn ajandayaasha looga hadli doono, balse waa shir adag marka la eego mowqifyada ay kala taagan labada dhinac.

"Danta weyn ee shirkan aan ka leennahay waa inaan ka helno himilada Somaliland ay aamisan tahay oo ah inay hesho aqoonsi dowladnimo, madaxbannaanideennuna waa muhiimadda koowaad ee aan leennahay oo aanan ka laabanayn," ayuu yiri wasiirka arrimaha dibadda ee Somaliland, Maxamed C/llaahi Cumar oo hoggaaminaya ergada Somaliland ku matalaysa shirka London.

Wasiirka arrimaha gudaha iyo ammaanka Qaranka Soomaaliya, Cabdisamad Macallin Maxamuud oo hoggaaminaya wafdiga DKMG ah ee shirkaas uga qaybgalaya ayaa in uu rumeysan yahay inay imaan karaan caqabado, balse haddii dadku ay wadahadal yeeshaan ay wax isla meel dhigi karaan.

"Haddii dadku wadahadlaan waxbay isla fahmaan, waa imaan karaan caqabado, mana ahan kuwo ku dhammaan kara maanta iyo berri, balse waxaa loo baahan yahay in si deggen loo eego wax walba, ugu dambeynna waa la is-fahmi karaa," ayuu yiri wasiirka arrimaha gudaha ee Soomaaliya.

Madaxda Soomaalida oo uu ku jiro Shariif Sheekh Axmed ayaa shirkan ku tilmaamay mid dib loogu soo celinayo midnimadii iyo wadajirkii Soomaaliya, iyagoo rajo-weyn ka muujiyay in natiijooyinka shirka kasoo baxa ay noqon doonaan kuwo wanaagsan.

Jamhuuriyadii Soomaaliya oo ka koobnayd gobolladii uu Ingiriisku gumeysan jiray oo xoroobay 26-kii Juun, 1960-kii iyo gobolladii uu Talyaanigu gumeysan jiray oo iyana xoroobay 01-dii July, 1960-kii ayaa waxaa madmadow uu soo dhexgalay markii la riday dowladii dhexe ee Soomaaliya 1991-kii.

Somaliland ayaa sheegtay inay gooni uga go'day Soomaaliya inteeda kale, sannadkii 1992-kii, iyadoo taas sabab uga dhigtay tacadiyo iyo gabood-fallo loo geystay, basle waxaa la sugayaa natiijooyinka kasoo shirka maanta London ka furmaya.

Dowladaha Britain, Norway iyo ururka Midowga Yurub ayaa shirkan maalgelinayo iyadoo xubno ka mid ah ay ka qaybgalayaan, balse wadahadallada ayaa ah kuwo u dhexeyn doona dhinacyada Soomaalida.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
6/20/2012 9:25 AM EST
Araca, June 20, 2012-Waxaa magaalada Örebro ee dalka Sweden lagu qabtay koob Kubadda Cagta ah oo ay ka qeybgaleen Caruur Soomaaliyeed oo magaaladaas ku nool, kuwasi oo da’dooda ay u dhaxeyso 8—9 sano jir.

6/20/2012 8:36 AM EST
Arbaco, June 20, 2012 (HOL) — Madaxweyne ku xigeenka Somaliland, C/raxmaan Cabdillaahi Ismaaciil (Saylici) ayaa maanta ka qaybgalay kulan ay isugu yimaadeen dhakhaatiirta Somaliland ee gobolladda iyo degmooyinka ku kala sugan, kaasoo ka qabsoomay hoteelka Maansoor ee magaalada Hargeysa.

6/20/2012 8:07 AM EST
Arbaco, June 20, 2012 (HOL) — Odayaasha-dhaqanka ee ku shirsan Muqdisho ayaa isku raacay labo qodob oo kasoo baxay shir maalmahan uga socday Muqdisho, iyadoo sheegay inay goa'anka ay gaareen ay u gudbinayaan beesha caalamka iyo Soomaaliya.

6/20/2012 7:39 AM EST
Arbaco, June 20, 2012 (HOL) — Shirkan oo looga hadlayo mustaqbalka Soomaaliya ee ay yeelanayaan xubnaha ka socda Soomaaliya iyo Somaliland oo socon doona laba maalmood ayaa looga hadli doonaa sidii labada dhinac ay u yeelan lahaayeen iskaashi dhinac walba ah.

6/20/2012 7:31 AM EST
Arbaco, June 20, 2012 (HOL) — Musharraxa madaxweynenimada C/raxmaan Baadiyow oo xaflad kamid ah kaambaynkiisa ku qabtay Nairobi.

6/20/2012 7:29 AM EST
Arbaco, June 20, 2012 (HOL) — Guddoomiyaha Ahlusunna Waljamaaca ee gobolka Galguduud, Axmed Yuusuf Xasan Ciyoow ayaa maanta soo gaaray Muqdisho isagoo sheegay in sababta socdaalkiisa ay tahay sidii uu wadahadallo ula yeelan lahaayeen inay u yimaadeen Muqdisho sidii ay wadahadallo ugala yeelan lahaayeen DKMG ah iyo UNPOS, sidii mashaariic horumarineed looga fulin lahaa gobolka Galguduud.

6/20/2012 7:00 AM EST
Arbaco, June 20, 2012 (HOL) — Magaalada Nairobi ee dalka Kenya ayaa waxaa maanta oo Arbaco ah ka furmay shir ay leeyihiin saxiixayaasha Roadmap-ka Soomaaliya kaasoo socon doona laba maalmood, iyadoo looga hadlayo waxyaabihii ka hirgalay heshiiskaas oo ay madaxda Soomaalidu sannadkii hore ku gaareen Muqdisho.

6/20/2012 6:53 AM EST
Arbaco, June 20, 2012 (HOL) — Kooxda Raaskambooni oo ka barbar dagaalanta ciidamada DKMG ah iyo kuwa Kenya ee ku sugan Koonfurta Soomaaliya ayaa ugu baaqay hay'adaha gargaarka inay howlahooda ka billaabaan deegaannadii laga saaray Al-shabaab.

6/20/2012 6:24 AM EST
Arbaco, June 20, 2012 (HOL) — Booliis gaar ah oo ka socda dalka Uganda ayaa lagu wadaa in Muqdisho ay soo gaaraan maalmaha soo socda, kuwaasoo gacan ka geysan doona xasilinta ammaanka gobolka Banaadir.

6/20/2012 4:33 AM EST
Arbaco, June 20, 2012 (HOL) — Dhallinyaro tiradoodu gaarayso 250 ayaa xaflad loogu qabtay Muqdisho Talaadadii shalay ahayd waxay kusoo bandhigeen wixii ay barteen, waxaana kasoo qaybgalay bandhiggaas mas'uuliyiin degmooyinka gobolka Banaadir qaarkood.

6/20/2012 2:56 AM EST
Arbaco, June 20, 2012 (HOL) — Ururka Ahlusunna Waljamaaca oo ah urur taageera dowaldda KMG ah ee Soomaaliya ayaa wuxuu dowladda ku eedeeyay dowladda inay jartay xiriirkii wadashaqeyneed ee kala dhexeeyay ururkooda.

6/20/2012 1:28 AM EST
Waxaa maalintii axada ahayd oo ay taariikhduna ahayd June 17, 2012, magaalada Toronto, CIDER SINIA CENTRE ka dhacay shir wayn oo lagu taageerayay musharaxnimada madaxtinimada dowled goboleedka Galmudug G/le sare Cali-baashi Maxamed Xaji Cumar Fiqi, waxaa shirkaasi soo qabanqaabiyay Cali Shiddo iyo Cabdullahi Warsame, waxaana daadihinayay Cabdirashiid Salad Farah (keyton), iyo Bashir.