9/19/2019
Today from Hiiraan Online:  _
Wararka Maanta- Jimco, July 13, 2012
Dabley hubeysan oo saraakiil ka tirsan Booliiska Kenya ku toogtay Deegaan ku dhow degmada Mandheera ee dalka Kenya


Jimco, July 13, 2012 (HOL) — Dabley hubeysan ayaa toogasho ku dhaawacay laba ka mid ah saraakiisha booliiska Kenya oo ku sugnaa deegaan ku dhow degmada Mandheera ee gobolka Waqooyi-bari ee dalka Kenya aroonimadii shalay oo Khamiis ahayd.

Saraakiishan ayaa waxay kasoo laabteen degmada Gaarisa ee dalka Kenya, markii ay kooxaha hubeysani ku weerarayeen deegaanka Carabiya oo dhowr kiiloo-mitir u jirta soohdinta ay wadagaaan Soomaaliya iyo Kenya.

Weerarkan ayaa waxaa ka badbaaday taliye ku xigeenkii ciidanka booliiska deegaanka uu weerarku ka dhacay oo lagu magacaabo, John Mbaluka, wuxuuna u sheegay warbaahinta in kooxaha weerarka geystay ay ahaayeen dhowr qof ayna baxsadeen weerarka kaddib.

"Saraakiisha lagu dhaawacay weerarka waxaa lagu wadaynayaa isbitaalka guud ee degmada Mandheera," ayuu yiri sarkaal sare oo u hadlay booliiska gobolka Waqooyi-bari ee dalka Kenya.

"Dableydu waxay ahaayeen koox dhowr qof ka kooban, waxay nagu fureen rasaas wayna baxsadeen, runtii waxaan ahay qof nasiib badan haddii aan ka badbaaday weerarkaas," ayuu yiri Mbaluka.

Labada sarkaal ee dhaawacmay ayaa midkood wuxuu waday gaariga la weeraray halka midka kalena uu gaariga saarnaa.

Weerarrada lala beegsanayo ciidamada ammaanka Kenya ayaa aad ugu kordhaya deegaannada ku dhow soohdinta ay wadagaan Soomaaliya iyo Kenya, iyadoo ay ciidamada Kenya ay gudaha Soomaaliya kula dagaalamayaan Xarakada Al-shabaab.

Toddobaad ka hor ayay ahayd markii 17-qof oo ay ku jireen laba sarkaal oo booliiska Kenya ka tirsan lagu dilay weerar lagu qaaday kaniisado ku yaalla magaalada Gaarisa ee xarunta gobolka Waqooyi-bari ee dalka Kenya, iyadoo ay weerarkaas ku dhaawacmeen 50-meeyo qof oo kale.

Ma jirto cid loo xiray weerarka lagu dhaawacay saraakiish iyo weliba cid sheegatay inay mas'uul ka tahay, inkastoo saraakiisha booliiska Kenya ay ku eedeeyeen inay ka dambeyso Xarakada Al-shabaab.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
7/13/2012 3:13 PM EST
Jimco, July 13, 2012 (HOL)- Madaxwaynaha Somaliland Md Axmed Maxamed Maxamuud (Siilaanyo) ayaa maanta salaaddii jimce kala qaybgalay dadweynaha magaaladda Hargeysa, isagoo aan ilaalo la socon, isla markaana kula tukaday masaajid ay dadku iskugu yimaadaan.

7/13/2012 1:37 PM EST
Kulan ballaaran oo ay ka qeyb galeen Marwada Ra'iisul Wasaaraha Drs. Hodan Saciid Ciise, Xildhibaano ka tirsan Baarlamaanka, Ururada Haweenka degmooyinka Gobolka Banaadir, Fanaaniin ay ka mid ahaayeen Seynab Xaaji Cali Baxsan, Binti Cumar Gacal iyo haween ka socday 16-ka degmo ee Gobolka Banaadir ayaa maanta ka dhacay Hotelka Saxafi ee Magaalada Muqdisho,

7/13/2012 7:57 AM EST
Jimco, July 13, 2012 (HOL) — Wafdi ka socda Qaramada Midoobay uuna horkacayo wakiilka UN-ka ee arimaha Soomaaliya, danjire Augustine Mahiga ayaa duhurnimadii maanta gaaray magaalada Garoowe ee xarunta Puntland, halkaasoo uu kulammo kula leeyahay madaxda Puntland.

7/13/2012 7:45 AM EST
Jimco, July 13, 2012 (HOL) — Ciidamada dowladda KMG Soomaaliya oo kaashanaya kuwa AMISOM ayaa maanta howgallo lagu soo qabqabtay dad iyo hub ka sameeyay degmada Balcad ee gobolka Shabeellada dhexe.

7/13/2012 7:21 AM EST
Jimco, July 13, 2012 (HOL) — Warsaxaafadeed ay soo saareen ciidamada AMISOM ayay ku sheegeen in Laanta-buuro ay ka heleen 500-kiish oo raashin ah, kaasoo ay loogu talogalay sida ay sheegeen in lagu caawiyo dadka ku nool gobolkaas, balse ay Al-shabaab dhacday.

7/13/2012 4:57 AM EST
Jimco, July 13, 2012 (HOL) — Guddoomiyaha odayaasha Muqdisho, Maxamed Xasan Xaad oo ka mid ah odayaasha dhaqanka Soomaaliyeed ee Muqdisho uu uga socdo shirka ayaa sheegay inay codsadeen in la saxo qaladaadka dastuurka jira ka hor inta aan lasoo xulin ergagada ansixinta dastuurka.