Talaado, December 22, 2009(HOL): Howgalladani ay maanta bilaabeen ciidamada amaanka Maamulka Islaamiga ah ee Gobollada Jubooyinka ayaa waxay ku baadigoobayeen ragga qaata saraawiisha lugaha dhaadheer kuwaasoo maamuulku uu horay qaadashadooda digniin uga soo saaray, iyadoo howlgalladaasi ay ciidamada u adeegsanayaan maqas kasoo ay ku jarayaan saraawiisha lugaha dhaadheer ee ay ku labistaan qaar kamid ah dadka ku dhaqan magaalada Kismaayo. Waxaana maanta waddooyinka waaweyn ee dhexmara gudaha magaalada Kismaayo iyo waliba goobaha ay ku badan yihiin bulshada lagu arkayey gaadiid ay wateen ciidamada ammaanka kuwaasi oo baadi goobayay ragga qaata surwaalada lugaha dhaadheer,
Waxaana maanta ku ekeyd mudadii 3 berri ahayd ee uu maamulku u qabtay in dadka iyagu ku labista saraawiisha lugaha dhaadheer in ay gaabasadaan, ciddii mudadaasi kaddib lagu arkana ay maamulku sheegeen in ay ka qaadi doonaan tallaabo waafaqsan shareecada Islaamka. Sidoo kale waxaa maanta gabi ahaanba marnaa goobihii ay isugu imaan jireen dhalinyarada kuwaasi oo ka cararayaya amaba ka baqanaya in laga jaro saraawiisha iyadoona maanta dhalinyarada lagu arkayey xaafadaha dhexdooda iyo waliba goobaha ka fog waddooyinka waa wayn ee ay isticmaalaan Bulshada. Sikastaba ha ahaatee howlgaladani ayaa waxay imaanayaan xili dhawaan uu maamulka bayaan ka soo saarey qaadashada saraawiisha lugaha dhaadheer iyo waliba Xiiridda Garka iyadoo uu maamulka sheegay in ay arintaasi xad gudub ku tahay ku dhaqanka Shareecada Islaamka. Xasan Nuur, Hiiraan Online[email protected]Kismaayo, Soomaaliya