Hiiraan Online

Jimco, April, 22, 2022 (HOL) - Waxaa goordhaw lagu qabtay magaalada Ceelwaaq ee gobolka Gedo doorashada kursigii ugu horeeyay ee ka midka ah 16-ka kursi ee ku harsan doorashadooda maamulka Jubbaland.

kursiga goordhaw la doortay oo tirsigiisu yahay HOP 119 ayaa waxaa ku soo baxay doorashadiisa Cabdullaahi Abuukar Xaaji oo ah wasiirka Waxbarashada Xukuumadda Soomaaliya, islamarkaana horay ugu fadhiyay kursigaan, waxaana u tanaasulay Musharaxii la tartami lahaa Cabdicasiis Cabdullaahi Ibraahin.

Goobta ay ka dhacday doorashada kursigaan waxaa goobjoog ka ahaa guddoomiyaha guddiga doorashada heer Fedaraal Muuse Geelle iyo ku xigeenkiisa Mowliid Mataan iyo masuuliyiin kale oo ka tirsan guddiga doorashada Jubbaland.

Wararka soo baxaya ayaa sidoo kale sheegaya in Maanta lagu dooran doono degmada Ceelwaaq ilaa 11 kursi oo ka mid ah kuraasta Golaha Shacabka Baarlamaanka 11-aad ee dalka.