8/18/2022
Today from Hiiraan Online:  _
Wararka Maanta- Talaado, May 17, 2022
Xukuumada Somaliland iyo xisbiyada mucaaradka oo gaadhay heshiis hor dhac ah

Talaado, May, 17, 2022 (HOL) - Xukuumada Somaliland iyo xisbiyada mucaaradka ah ee Waddani iyo UCID, ayaa heshiis rasmi ah ka gaadhay khilaafka xuska 18 May, isla markaana wadahadalo ku saabsan khilaafka doorashooyinka, ayaa loo balamay in ay bilaabmaan 18 May kadib.

Kulan kan oo uu gogoshiisa fidiyay Madaxweynaha Somaliland Muuse Biixi Cabdi, ayaa layskula afgartay in xuska 18 May  cidii caasimada joogtaana wada dabaal dagto, cidii gobolada u baxaysaana gobolka ay doonto ku dabaal degto, habeenimada qolo waliba meesha ay doonto ku dabaal degto.

"Kulan fiican ayaa dhacay si wanaagsan ayaa layskula gartay in 18 May oo maalintii qaranka ah hadii la wada joogana inta wada joogtaa wada qabato, hadii la kala maqanyahayna meelaha lagu kala maqanyahay lagu kala qabto, waxaanu leenahay bulshada Somaliland nabad ku dabaaldaga" sida waxa yidhi Guddoomiyaha Xisbiga Waddani Xirsi Cali X. Xasan.

Wasiirka Arrimaha Gudaha Somaliland Maxamed Kaahin Axmed, ayaa sheegay in dhinacyadu ay ku balameen in wadahadalo lagaga arrin sanayo khilaafka doorashooyinka layskugu yimaado xuska 18 May kadib.

"Caawa si niyad wanaaga ayaa layskugu yimid waxa layska afgartay in waxyaabaha laysku khilaafsanyahay in xiliga ay dhamaato 18 May, in markaa layskaga yimaado, si qoto dheerna markaa looga wadahadlo, inta ka horaysana qolo waliba dhankeeda kasoo diyaar garowdo" ayuu yidhi wasiir Kaahin.

Kulanka oo ka dhacay Madaxtooyada Somaliland, ayaa waxaa ka qayb galay Madaxweynaha Somaliland Muuse Biixi Cabdi, Musharaxa Madaxweynaha Xisbiga Waddani Cabdiraxmaan Maxamed Cabdillaahi Cirro, Guddoomiyayaasha xisbiyada mucaaradka Xirsi Cali Xaaji Xasan iyo Faysal Cali Waraabe, wasiiro iyo saraakiil kale.

Abdilahi Geel-maal, Hiiraan Online












Click here
5/17/2022 4:25 PM EST
Talaado, May, 17, 2022 (HOL) - Madaxweynaha Soomaaliya Xasan Sheikh Maxamuud ayaa u mahadceliyay madaxweynaha dalka Maraykanka Joe Biden oggolaanshaha uu u fasaxay in ciidamada Mareykanka loo diro gudaha Soomaaliya, si ay uga qeyb qaataan la dagaalanka Alshabaab.

5/17/2022 12:52 PM EST
Talaado, May, 17, 2022 (HOL) - Madaxweynaha cusub ee dowladda Fedaraalka Soomaaliya Xasan Sheekh Maxamuud ayaa Maanta kulan la qaatay madaxweynayaasha Maamul goboleedyada dalka, kadib kulan qado ah oo uu sameeyay Madaxweynaha la doortay ee JFS Xasan Sheekh Maxamuud.

5/17/2022 10:00 AM EST
Talaado, May, 17, 2022 (HOL) - Ciidamada dowladda Soomaaliya iyo kuwa Burundi ee qeybta ka ah howlgalka Midowga Afrika ee ATMIS ayaa Maanta dib ula wareegay gacan ku heynta Saldhiga deegaanka Ceelbaraf, halkaas oo laba todobaad ka hor Al-shabaab kula wareegeen weerar culus oo ay qaraxyo ku bilaaween, kaasoo geystay khasaarahii ugu badnaa ee abid ciidanka Burundi kasoo gaara gudaha Soomaaliya.

5/17/2022 8:05 AM EST
Talaado, May, 17, 2022 (HOL) - Madaxweynaha cusub ee Soomaaliya Xasan Sheekh Maxamuud ayaa kulan la qaatay Madaxweynaha xafiiska baneynaya Maxamed Cabdillahi Farmaajo. Waxaana la sheegay inay ka wada hadleen xil wareejinta xafiiska Madaxweynaha

5/17/2022 3:45 AM EST
Talaado, May, 17, 2022 (HOL) - Wararka ka imaanaya deegaanka Ceelbaraf ee gobolka Sh/dhexe ayaa sheegaya in ciidamada Burundi ee qeybta ka ah howlgalka ciidanka Midowga Afrika ee ATMIS in saakay aroornimadii hore tiro madaafiic ah ay ku garaaceen deegaanka Ceelbaraf.

5/17/2022 3:15 AM EST
Talaado, May, 17, 2022 (HOL) - Dowladda Mareykanka ayaa shacabka Soomaaliyeed ugu hambalyeysay dhameystirka hannaankii doorasho ee dalka. Waxayna sidoo kale u hambalyaysay madaxweyne Xasan Sheekh Maxamuud oo loo doortay madaxweynaha Jamhuuriyadda Federaalka Soomaaliya.

5/17/2022 1:58 AM EST
Talaado, May, 17, 2022 (HOL) - Qaramada Midoobay ayaa soo dhaweysay doorashadii madaxtinimo ee Soomaaliya la qabtay habeenimadii axada, taas oo uu ku guulaystay Xasan Sheikh Maxamuud.

5/17/2022 1:47 AM EST
Talaado, May, 17, 2022 (HOL) - Madaxweyne Joe Biden ayaa oggolaaday codsi uga yimid Pentagon-ka oo ku saabsanaa in ciidamada Mareykanka dib loogu soo celiyo Soomaaliya si ay uga hortagaan kooxda Al-Shabaab, sidaas waxaa sheegay sarkaal sare oo ka tirsan maamulka.