12/1/2022
Today from Hiiraan Online:  _
Wararka Maanta- Talaado, Feb 12, 2013
Guddiyada Joogtada ah ee Baarlamaanka oo Muqdisho ku yeeshay kulan ay ku ansixiyeen Qorshe-howleedka Baarlamaanka

Talaado, Feberaayo 12, 2013 (HOL) —  Guddiyada joogtada ah ee baarlamaanka Soomaaliya ayaa kulan ay maanta oo Talaado ah ku yeesheen xarunta golaha shacabka ee Muqdisho ayaa waxay ku ansixiyeen qorshe howleedka baarlamaanka uu ku shaqeynayo sanadkan 2013 iyo arrimmo kale.

Kulankan oo ahaa kulankii labaad oo ay yeeshaan guddiyada joogtada ah ee baarlamaanka tan iyo intii ay xildhibaannada baarlamaanku la fasaxay ayaa waxaa shir-guddoominayay guddoomiyaha baarlamaanka Somalia, Maxamed Sheekh Cismaan Jawaari; waxaana ugu horreyn ay guddiyada joogtada ah ka doodeen jadwalka xil-gudashada baarlamaanka sannadkan 2013, sida howlaha uu baarlamaanku qaban lahaa maalin walba ama bil walba, iyadoo dood kadibna ay guddiyada joogtadu ansixiyeen qorshe howleedka uu ku shaqeynayo baarlamaanka sannadkan cusub ee 2013.

Ajandaha labaad ee ay ka hadleen guddiyada joogtada eebBaarlamaanka ayaa ahaa magacaabidda xogayaha guud ee golaha shacabka waxayna guddiyadu ansixiyeen in Cabdikariin Xaaji Cabdi Buux uu noqdo xoghayaha guud ee baarlamaanka Soomaaliya.

Sidoo kale, guddiyada joogtada ah ee baarlamaanka waxay ka hadleen fulinta istiraatiijiyadda afarta sano ee baarlamaanka laga doonayo iyo fulinta xeer hoosaadka baarlamaanka kaasoo ay horey xildhibaannada u ansixiyeen waxaana guddiyada joogtada ah dhinacyo kala duwan ka eegeen in sida loo ansixiyay xeerarkan loo hirgelin doono haduu Alle idmo.

Ugu dambeyn, guddiga joogtada ah ee baarlamaanka ayaa waxay ka hadleen socdaalka ay gobollada kala duwan ee dalka ku marayaan xubno ka tirsan baarlamaanka si ay usoo ogaadaan baahida dhabta ah ee ka jirta deegaannada iyo degmooyinka ay kasoo jeedaan; taasoo qeyb ka ah habka uu guddoonka baarlamaanka horay ugu dejiyay xildhibaannada inay xilliga ay fasaxa ku jiraan ay ku tagaan deegaannada ay kasoo jeedaan si warbixin dhameystiran ay uga jeediyaan baarlamaanka marka ay kalfadhiyaduu dib u furnaan.

Guddoomiyaha baarlamaanka Soomaaliya, Maxamed Sh. Cismaan Jawaari oo ka hadlay kulanka ayaa aad u amaanay xildhibaannada gobollada dalka ku maqan horumarka ay sameeyeen; isagoo ku guubaabiyay mudaneyaasha baarlamaanka inay sii wadaan kulammada xog-wareysiga ah ee ay la yeelanayaan dadka ku nool deegaannada ay kasoo jeedaan, iyagoo ugu dambeyn uu guddoomiyaha baarlamaanka Alle uga baryay xildhibaannada gobollada ku maqan in socdaalkooda ay si nabad ah kusoo dhameystaan.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
2/12/2013 11:11 AM EST
Talaado, Feberaayo 12, 2013 (HOL) — Ciidamadda Amaanka ee magaaladda Hargeysa, ayaa xabsiga u taxaabay boqor Raabi Yuusuf Cabdilaahi oo ka mid ah salaadiinta Somaliland, kaas oo ka soo laabtay magaaladda Muqdisho ee Soomaaliya.

2/12/2013 9:57 AM EST
Talaado, February 12, 2013 (HOL) - Waxaa qarax lala eegtay ciidammo Itoobiyaan ah oo ku sugan Magaalada Baydhabo iyo wafdi ka socday taliska xoogga dalka Soomaaliyeed kuwaasi oo uu hoggaaminayay taliyaha ciidanka xoogga dalka Soomaaliyeed Jen. Cabdulqaadir Shiikh Cali Diini oo ku sugnaa Afar Irdoodka magaalada Baydhabo.

2/12/2013 9:18 AM EST
Talaado, Feberaayo, 12, 2013 (HOL) – Warar dheeraad ah ayaa ka soo baxaya khasaaraha uu sababay qarax loo adeegsaday Bam kuwa gacanta laga tuuro ah oo lagu weeraray goob maqaaxi ah oo ku taala agagaarka suuqa xoola xaafadda Howl-wadaag ee magaalada Baladweyne.

2/12/2013 8:53 AM EST
Talaado, Feberaayo, 12, 2013 (HOL) -- Qoysaskii ku nool 22-kii sano ee la soo dhaafay xeradii hore ee ciidamada xoogga dalka Soomaaliyeed Lam-galaay ee magaalada Baladweyne, ayaa hadda bilaabay in ay isaga guuraan halkaa kadib markii ay sidaa amar ku siiyeen saraakiisha ciiidamada dowladda iyo AMISOM.

2/12/2013 7:20 AM EST
Talaado, Feberaayo 12, 2013 (HOL) —Ra’isul wasaaraha dowladda Federaalka Soomaaliya Mudane Cabdi Faarax Shirdoon (Saacid) ayaa maanta xafiiskiisa kulan kula qaatay wafdigii Xildhibaanada ka koobnaa ee ka socday dalka Brundi islamarkaasina mudooyinkii u danbeeyay ku sugnaa magaalada Muqdisho ee caasimadda dalka Soomaaliya.

2/12/2013 6:09 AM EST
Talaado, Feberaayo 12, 2013 (HOL) —Kooxo hubeysan ayaa lagu soo waramayaa in ay gudaha magaalada Mandera ee gobolka waqooyi bari Kenya ay ku dileen sarkaal katirsan ciidamada Kenya, iyadoona kooxahaasi ay sidoo kale qaateen hubkii uu sitay askarigaasi.

2/12/2013 5:40 AM EST
Talaado, Feberaayo 12, 2013 (HOL) —Dagaalyahanno ka tirsan Al-shabaab iyo dad xoolaley ah ayaa lagu soo waramayaa in ay ku dagaalameen deegaanka Cabdi-dhoore oo qiyaastii 20-km dhanka galbeed kaga beegan magaalada Kismaayo ee xarunta gobolka Jubada hoose.

2/12/2013 1:01 AM EST
Talaado, Feberaayo 12, 2013 (HOL) — Howgallo lagu qabqabtay 217 qof ayay ciidamada dowladda xalay ka sameeyeen afar degmo oo ku yaalla magaalada Muqdisho, kuwaasoo ay ka mid yihiin, Xamar-jajab iyo Xamar-weyne.

2/12/2013 1:00 AM EST
Talaado, Feberaayo 12, 2013 (HOL) — Taliyaha gaaska labaad ee ciidamda dowladda Soomaaliya, Jen. C/llaahi Cali Cageyayaa sheegay in la toogan doono askarigii la arko isagoo isbaaro dhiganaya jidka isku xira Muqdisho iyo Afgooye, kaddib markii dhowrkii casho ee lasoo dhaafay ay jidkaas kusoo badanyeen isbaarooyinka loo dhigayo gaadiidka.