3/28/2024
Today from Hiiraan Online:  _
Wararka Maanta- Axad, Jun 30, 2013
Xukuumadda Soomaaliya oo ku eedeysay Ciidamada Kenya ee AMISOM in ay ka Qayb-galeen Dagaalladii Kismaayo


Axad, Juun 30, 2013 (HOL) — Wasiir ku xigeenka wasaaradda wafaafinta xukuumadda Soomaaliya, C/shakuur Cali Mire oo maanta shir jaraa’id ku qabtay Muqdisho ayaa ciidamada Kenya ee qaybta ka ah howgalka AMISOM ku eedeeyay inay ka qaybgaleen dagaalkii Kismaayo ka dhacay.

C/shakuur Mire ayaa sheegay in ciidamada Kenya ay gacan siiyeen garab ka mid ah garabyadii dagaalamay, isagoo sheegay in ciidamadaas ay hub culus ku garaaceen magaalada kuwaasoo keenay inay dhimasho iyo dhaawacyo ka soo gaareen dad shacab ah.

“Xarigii abaanduulaha ciidamada xoogga ee Jubbooyinka iyo inay ciidamada Kenya la safteen garab ka mid ah garabyadii ku dagaalamay Kismaayo ayna madaafiic ku gaaracaan magaalada waa kuwo xiriir leh sida aan u aragno,” ayuu wasiir ku xigeenku shirkiisa jaraa’id ku yiri.

Sidoo kale, wasiir ku xigeenku wuxuu sheegay in la weeraray saldhiggii ay ciidamada dowladda Soomaaliya ku lahaayeen Kismaayo lana burburiyay, horayna loo xiray abaanduulahoodii, taasoo uu ku sheegay inay xad-gudub ku tahay waajibaadka ciidamada AMISOM ee ka howlgalaya Kismaayo.

Wasiir ku xigeenka oo sii hadlay ayaa wuxuu sheegay in dowladda Somalia ay doonayso in magaalada Kismaayo la geeyo ciidammo aan ahayn kuwa Kenya ee hadda ku sugan, kuwaasoo ka kooban dhowr dal oo howgalka qayb ka ah.

“Dowladda Somaaliya waxay u aragtaa in magaalada Kismaayo la geeyo ciidammo ka socda dalal kala duwan oo ka mid ah kuwa Midowga Afrika eek u sugan Somalia, halka ay hadda ka yihiin hal dal iyo wixii la mid ah,” ayuu yiri wasiirka.

Wasiirku wuxuu sidoo kale sheegay in dowladda Soomaaliya ay codsanayso in Midowga Afrika ay ergay siyaasadeed u magacowdo Jubbooyinka kaasoo aan u dhalan dalalka halkaas ku sugan, isagoo dhanka kalena sheegay inay dowladdu soo jeedinayso in loo diro Jubbooyinka wafdi xaqiiqo-raadin ah oo u kuurgala sida ay wax uga dhaceen magaalada Kismaayo.

Ugu dambeyn, Mire wuxuu sheegay in dowladda Somalia ay doonayso in si dhaqso ah lagu sii daayo abaanduulihii ciidamada xoogga dalka, dibna loogu celiyo saldhiggiisii, si uu howlihiisa halkaas uga sii wato.

Hadalka wasiir ku xigeenka ayaa kusoo beegmaya iyadoo afhayeenka AMSOM Col. Cali Aadan Xumad uu shalay sheegay inaysan jirin wax lug ah oo ay ku leeyihiin dagaalladii Kismaayo, mas’uuliyadda dagaalkaasna ay qaadanayso dowladda Soomaaliya.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
6/30/2013 2:00 PM EST
Axad, Juun 30, 2013 (HOL) — Dowladda Somalia ayaa sheegtay in arrinta Sheekh Xasan Daahir Aweys ay u baahan tahay fursad si arritan xal looga gaaro, waxaana arrintaan sheegay afhayeenka madaxweynaha Soomaaliya, Inj. C/raxmaan Cumar Cismaan (Yariisow).

6/30/2013 1:16 PM EST
Axad, Juun 30, 2013 (HOL) — Madaxweynaha Soomaaliya, Xasan Sheekh Maxamuud ayaa maanta ka qaybgalay xirtaankii kalfadhigii labaad ee golaha baarlamaanka Soomaaaliya oo maanta lasoo xiray, waxaana sidoo kale goob-joog ka ahaa kulankaas guddoomiyeyaasha baarlamaannada Puntland iyo Galmudug.

6/30/2013 10:31 AM EST
Axad, Juun 30, 2013 (HOL) — Wasaaradda Qorsheynta Qaranka Somaliland, ayaa soo bandhigay daraasad ay afartii sannaba mar samayso oo lagu eego hab nololeedka bulshadda Somaliland sida arrimaha Hooyadda iyo dhalaanka, Caafimaadka, waxbarashadda, shaqada iyo isticmaalka biyaha nadiifadda ah.

6/30/2013 10:31 AM EST
Axad, Juun 30, 2013 (HOL) — Guddoomiyaha maamulka gobolka Hiiraan Cabdi Faarax Lanqayo oo shir jaraa'id ku qabtay maanta magaalada xafiiskiisa magaalada Baladweyne ayaa uga digay ganacsatada gobolka in ay soo galiiyaan magaalada lacago been abuur ah.

6/30/2013 10:31 AM EST
Axad, Juun 30, 2013 (HOL) — Hay’adda horumarinta haweenka Soomaaliyeed ee SWDC ayaa Muqdisho ka qaybisay deeq dhar ah oo ay soo dhiibeen jaaliyadda Soomaaliyeed ee ku nool Magaalada London ee xarunta dalka Britain , iyadoo deeqdan ay ka koobnayd dharka haweenka, raga iyo kuwa caruurta, waxaaana la socday kabo iyo bustayaal.

6/30/2013 4:32 AM EST
Axad, Juun 30, 2013 (HOL) — Ciidamada Maamulka Axmed Maxamed Islaam (Axmed Madoobe) ayaa la wareegay gacan ku haynta magaalada Kismaayo ee xarunta gobolka Jubbada Hoose, kaddib dagaallo saddexdii maalmood ee ugu dambeeyay ka socday gudaha magaaladaas.

6/30/2013 3:49 AM EST
Axad, Juun 30, 2013 (HOL) — Wafdi uu hoggaaminayo wasiirka Owqaafta, arrimaha diinta iyo dhaqanka dalka Jabuuti ayaa Muqdisho u yimid saakay ka qaybgalka munaasabadda 01-da Luuliyo oo ku beegan 53-guuradii kasoo wareegtay markii gobollada Koonfureed ka xoroobeen gurmeysigii Talyaaniga iyo is-raacii labada gobol.

6/30/2013 2:52 AM EST
Axad, Juun 30, 2013 (HOL) — Dowladda Soomaaliya ayaa xabsiga dhigtay Sheekh Xasan Daahir Aweys iyo xubno taageerayaashiisa ah oo la socday, kuwaasoo xalay fiidkii laga soo dajiyay garoonka diyaaradaha ee Muqdisho.

6/30/2013 2:30 AM EST
Axad, Juun 30, 2013 (HOL) — Afhayeenka howgallada Al-shabaab, Sheekh C/casiis Abuu-Muscab ayaa war uu warbaahinta siiyay ku xaqiijiyay in laba ka mid ah saraakiishii sar-sare ee Al-shabaab lagu dilay degmada Baraawe ee gobolka Shabeellada Hoose, kaddib markii ay diideen inay is-dhiibaan.

6/30/2013 2:01 AM EST
Axad, Juun 30, 2013 (HOL) — Dagaal culus oo galay maalintii saddexaad ayaa saakay dib uga qarxay magaalada Kismaayo ee xarunta gobolka Jubbada Hoose, dagaalkan oo daba socda dagaalladii labadii maalmood ee lasoo dhaafay ka dhacayay degmadaas.