3/29/2024
Today from Hiiraan Online:  _
Wararka Maanta- Arbaco, May 9 , 2012
Suxufi Soomaaliyeed oo Suxufiyiin kale kaga guuleysatay Abaal-marinta Suxufiyiinta Caalamka ee Sannadkan

Arbaco, May 09, 2012 (HOL) — Jamaal Cusmaan oo ah wariye u shaqeeya Tv-ga Channel-4 oo saldhiggiisu yahay dalka Ingiriiska ayaa ku guuleystay abaal-marinta sannadkan ee suxufiyiinta caalamka.

Xafladda abaalmarinta oo dhacday habeenkii Talaadada ahayd ayaa waxaa goob-joog ka ahaa madaxa telefishinka Channel-4, Jon Snow, waxaana Jamaal uu kaga guuleystay abaal-marintan laba wariye oo kala ahaa: Sue Lloyd Roberts oo u shaqeeya Newsnight iyo Felicity Lawrence oo ka tirsan wargeyska The Guardian ee kasoo baxa London.

Jamaal ayaa lagu qiimeeyay sida xafladda laga sheegay wararkii iyo filimmadii uu ka qaaday Soomaaliya xilliyadii ay dagaalladu socdeen iyo xilligii ay abaaraha ba'an ee ku dhuftay Soomaaliya.

"Jamaal Cusmaan wuxuu ku guuleystay in dhageysatayaasha Channel-4 News uu fahamsiiyo halganka ka jira Soomaaliya, sida burburka, abaaraha iyo dagallada ka socda. Wuxuu noqday ruux ay saxaafadda inta badan ka hadasho waxqabadkiisa iyo sharaxaadda uu ka bixiyay dalkiisa dhibaatadu ka jirto. Aad ayaan ugu faraxsan-nahay inaan aragno isagoo ah hoggaaminaya suxufiyiinta caalamka," ayuu yiri Ben De Pear oo ah madaxa wararka dibadda ee Channel 4 News.

Wariye Jamaal ayaa la sheegay in markii ugu horreysay oo uu u safro Soomaaliya uu doonayay inuu la kulmo koox ciyaaraha fudud ee Soomaaliya oo tababar lagu siinayay meelo khatar ah xilli ay Muqdisho ku dagaalamayeen ciidamada dowladda KMG ah iyo kuwa Al-shabaab.

Mar kale ayuu Jamaal kusoo laabtay Muqdisho si uu arko abaarta ay macluushu ka dhalatay ee ku dhufatay Soomaaliya, isagoo filimaan ka qaaday dad saameyn xooggan ay ku yeesheen abaaraha.

Jamaal ayaa wuxuu hadda ka howgalaa London, isagoo ah wariye ka shaqeeya Tv-ga Channel-4, waxaana uu qayb ka noqonayaa wariyeyaal Soomaaliyeed oo horya loo guddoonsiiyay abaalmarinno kala duwan oo caalami ah.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
5/9/2012 6:51 PM EST
Arbaco, May 10, 2012(HOL):-Waxaa si heer qaran ah loogu aasay magaalada Nairobi ee caasimadda Dalka Kenya Marxuum Cabdi Xayi Cusmaan Garaad oo shalay ku geeriyooday magaalada Nairobi.

5/9/2012 6:30 AM EST
Arbaco, May 09, 2012 (HOL) — Dood-cilmiyeedkan oo ay soo qabanqaabisay UYS oo ah hay'adda Midowga Dhallinyarada Soomaaliyeed ayaa looga hadlay sida lagu xoojin karo nabada loogana wada-shaqeyn karo ammaanka caasimadda, kaasoo ay ka qeyb-galeen boqolaal haween oo ka socday qaybaha ururrada haweenka.

5/9/2012 6:08 AM EST
Arbaco, May 09, 2012 (HOL) — Qoysaska danyarta ah ee ku dhaqan deegaanka Deg-ilima oo hoostaga degmada Afmadow ee Gobolka Jubada Hoose ayaa waxa soo wajahday xaalad nolol xumo oo aad u liidata.

5/9/2012 4:12 AM EST
Arbaco, May 09, 2012 (HOL) — Jen. Yuusuf Maxamed Siyaad (Indhacadde) oo ka mid ahaa xubnihii sida weyn uga soo horjeeday dastuurka cusub ee Soomaaliya ayaa iska bedelay mowqifkaas kaddib markii uu sheegay in dastuurka laga saarayo dhammaan qodobbadii dhaliyay muranka.

5/9/2012 3:59 AM EST
Arbaco, May 09, 2012 (HOL) — Ra'iisul wasaaraha Soomaaliya, Cabdiweli Maxamed Cali ayaa diiday in xil ka qaadis lagu sameeyo maareeyaha dekedda Muqdisho inta lagu jiro xilligan kala guurka ah, kaddib markii uu dhawaan madaxweynuhu xilka ka qaaday maareeyaha.

5/9/2012 3:40 AM EST
Arbaco, May 09, 2012 (HOL) — Guddoomiyaha majmaca culummada Soomaaliyeed, Sheekh Axmed Dhicisoow ayaa sheegay in maalinta Jimcaha ah ee soo socota uu Muqdisho ka dhici doono dibabax looga soo horjeedo dastuurka cusub ee Somalia oo uu muran badan ka taagan yahay.

5/9/2012 3:30 AM EST
Arbaco, May 09, 2012 (HOL) — Kooxo hubeysan ayaa xalay laba qof ku toogtay degmada degmada Dharkeynley ee gobolka Banaadir, sidoo kalena waxaa xalay uu qarax miino ka dhacay waddada soddobka gaar ahaa inta u dhexeysa isgoysyada Black Sea iyo Baar Ubax, waxaana halkaas ku dhintay ruux la sheegay inuu aasayay miinada.