9/25/2018
Today from Hiiraan Online:  _
Wararka Maanta- Jimco, May 11, 2012
Ciidammo ku diriray Suuq-bacaad iyo Guddoomiyaha Degmada Huriwaa oo eedeyn u jeediyay Ciidamada DKMG ah iyo AMISOM


Jimco, May 11, 2012 (HOL) — Sarkaal ka tirsan ciidamada DKMG ah ayaa ku dhintay dagaal ciidammo kawada tirsan dowladd KMG ah ku dhexmarya xaafadda Suuq-Bacaad ee degmada Yaaqshiid, iyadoo guddoomiyaha degmada Huriwaa uu eedeyn u jeediyay ciidamada dowladda KMG ah iyo kuwa AMISOM.

Dad goobjoogayaal ah ayaa sheegay in dagaalka u dhexeeyay ciidamada dowladda ee shalay ka dhacay Suuq-bacaad uu ka dhashay dil loo geystay sarkaal watay mid ka mid ah labada ciidan ee uu dagaalku dhexmaray.

Guddoomiyaah degmada Yaaqshiid, Muxyadiin Jurrus ayaa dagaalka dhexmaray ciidamada DKMG ah ku tilmaamay mid aad looga xumaado, isagoo xusay inaysan u dul-qaadan doonin in shacabka lagu dul-dagaalamo.

"Ma jirto khasaare shacabka soo gaartay, balse waxaan uga digaynaa ciidamadu inay ku dul-dagaalamaan shacabka ku nool degmada," ayuu yiri Muxyadiin Jurrus oo intaas ku daray in amaanka degmada uu inteeda badan yahay mid wanaagsan.

Dhanka kale, guddoomiyaha degmada Huriwaa, Cumar Jacfaan oo isaguna la hadlay saxaafada ayaa ku eedeeyay ciidamada DKMG ah iyo kuwa AMISOM inay dayaceen ka shaqeynta amaanka degmada uu guddoomiyaha ka yahay.

"Ciidamadii dowladda iyo kuwii AMISOM ee ku sugnaa cirifyada hore ee degmada ayaa dib ugu soo gurtay gudaha degmada, taasina waxay keentay in Al-shabaab ay mar walba soo weeraraan degmada," ayuu yiri Cumar Jacfaan.

Ugu dambeyn, guddoomiyuhu wuxuu dalbaday in dowladda KMG ah ay xil iska saarto sidii loo sugi lahaa degmada, iyadoo mas'uuliyiinta milateriga dowladda aysan ka hadlin eedeyn kaga timid guddoomiyaha degmada Huriwaa.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/11/2012 1:59 PM EST
Jimco, May 11, 2012(HOL): Ra’iisul Wasaaraha Soomaaliya Dr.Cabdiweli Maxamed Cali Gaas ayaa maanta kulan la qaatay Saraakiil ka tirsan Qaramada Midoobey, iyadoona kulanka looga hadlayay heshiis is-afgarad ah (MOU) oo ay kala saxiixdeen dowladda Soomaaliya iyo hay’adda u qaabilsan Qaramada Midoobey Xuquuqul Insaanka.

5/11/2012 8:28 AM EST
Jimco, May 11, 2012(HOL): Jaaliyadda Somaliland ee magaalada Malmö ee dalka Sweden ayaa maanta la gudoonsiiyey shahaado uu bixiyo aqalka Boqortooyada ee dalkan Sweden. Shahaadadan oo ah markii ugu horeysay ee Taariikhda dalkan Sweden ay ku guuleystaan dad Soomaali ah ayaa waxaa maanta (shalay) guddoonsiiyey Badhasaabka gobolka Skåne Mr: Göran Tunhammar iyadoo ay halkaas goob joog ka ahaayeen madaxada Gobolkan & Madaxda Jaaliyadda Somaliland ee Magaalada Malmö ee dalkan Sweden.

5/11/2012 4:27 AM EST
Jimco, May 11, 2012 (HOL) — Kooxo hubeysan ayaa dagaal kala hortagay ciidammo ka tirsan kuwa dowladda KMG ah oo saakay isku dayay inay fujiyaan goobo ganacsi oo laga dhistay hareeraha isgoyska Banaadir ee magaalada Muqdisho, iyadoo taasi ay keentay in isgoyskaas uu xirmo.

5/11/2012 4:05 AM EST
Jimco, May 11, 2012 (HOL) — Guddiga xawaaladleyda Soomaalida gobolka Minnesota ee Mareykanka ayaa aad uga carooday bankiga US Bank oo sheegay inuusan diyaar u ahayn inuu la shaqeeyo xawaaladleyda Soomaalida, kaddib wada-xaajood muddo socday oo bankigaas uu kula jiray guddiga xawaaladleyda Soomaalida.

5/11/2012 3:52 AM EST
Jimco, May 11, 2012 (HOL) — Guddoomiyihii baarlamaanka Soomaaliya xildhibaan Sheekh Aadan Maxamed Nuur (Sheekh Aadan Madoobe) oo ku sugan degmada Xudur ayaa sheegay inay baaritaan ku sameynayaan dad shacab ah oo lagu dilay deegaan ku dhow degmada Xudur.

5/11/2012 3:41 AM EST
Jimco, May 11, 2012 (HOL) — Guddoomiyaha majmaca culumada Soomaaliyeed, Sheekh Axmed Dhicisow ayaa sheegay inay dib u dhigeen qabashada mudaaharaad ay ku wadeen inay maanta ka dhigaan Muqdisho, kasaoo ay uga soo horjeedaan dastuurka cusub ee Soomaaliya.

5/11/2012 3:35 AM EST
Jimco, May 11, 2012 (HOL) — Kooxo bastoolado ku hubeysan ayaa toogasho ku dilay laba qof, kuwaasoo warar kala duwan ay kasoo baxayaan, waxaana kooxihii dilka geystay u suurogashay inay ka baxsadeen goobtii ay dilka ka geysteen.