11/17/2018
Today from Hiiraan Online:  _
Wararka Maanta- Jimco, May 11, 2012
Guddoomiyihii hore ee Baarlamaanka Soomaaliya oo sheegay inay baaris ku sameynayaan dilal loo geystay dad shacab ah


Jimco, May 11, 2012 (HOL) — Guddoomiyihii baarlamaanka Soomaaliya xildhibaan Sheekh Aadan Maxamed Nuur (Sheekh Aadan Madoobe) oo ku sugan degmada Xudur ayaa sheegay inay baaritaan ku sameynayaan dad shacab ah oo lagu dilay deegaan ku dhow degmada Xudur.

Mudane Sheekh Aadan Madoobe ayaa sheegay inay maqleen in dilkaas ay geysteen ciidammo ka tirsan kuwa dowladda KMG ah iyo kuwa Itoobiya ee caawinaya, kaddib markii ay maalin ka hor weerarro ku qaadeen deegaan ay Al-shabaab saldhigyo ka sameysatay.

"Waan maqalnay in lix qof oo shacab ah lagu dilay deegaan dhawaan ay weerareen ciidamadeenna iyo kuwa Itoobiya, baaris ayaana ku haynaa," ayu yiri Sheekh Aadan Madoobe oo wareysi siiyay VOA-da laanteeda afka Soomaaliga.

Xildhibaanku wuxuu sheegay inaysan ogeyn in ciidamadu ay dileen dadkaas iyo in kale, balse ay wadaan baaritaan ay arrintaas ku xaqiijinayaan markii ay soo gaba-gabeeyaanna ay soo gudbin doonaan natiijada.

Guddoomiyihii hore ee baarlamaanku wuxuu ka meermeeray inuu carrabka ku dhufto in dilkaas ay geysteen ciidamada dowladda KMG ah iyo kuwa Itoobiya iyo in kale, isagoo sheegay in laga yaabo inay dilkaas geysteen xoogaggii Al-shabaab.

Ugu dambeyn, Xildhibaan Sheekh Aadan Madoobe wuxuu sheegay in weerarkii lagu qaaday deegaanka ay dilalku ka dhaceen ay iyagu qaadeen, kaddib markii halkaas ay Al-shabaab ka sameysatay fariisimo ay ku cunno-qabteynayeen degmada Xudur.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
5/11/2012 1:59 PM EST
Jimco, May 11, 2012(HOL): Ra’iisul Wasaaraha Soomaaliya Dr.Cabdiweli Maxamed Cali Gaas ayaa maanta kulan la qaatay Saraakiil ka tirsan Qaramada Midoobey, iyadoona kulanka looga hadlayay heshiis is-afgarad ah (MOU) oo ay kala saxiixdeen dowladda Soomaaliya iyo hay’adda u qaabilsan Qaramada Midoobey Xuquuqul Insaanka.

5/11/2012 8:28 AM EST
Jimco, May 11, 2012(HOL): Jaaliyadda Somaliland ee magaalada Malmö ee dalka Sweden ayaa maanta la gudoonsiiyey shahaado uu bixiyo aqalka Boqortooyada ee dalkan Sweden. Shahaadadan oo ah markii ugu horeysay ee Taariikhda dalkan Sweden ay ku guuleystaan dad Soomaali ah ayaa waxaa maanta (shalay) guddoonsiiyey Badhasaabka gobolka Skåne Mr: Göran Tunhammar iyadoo ay halkaas goob joog ka ahaayeen madaxada Gobolkan & Madaxda Jaaliyadda Somaliland ee Magaalada Malmö ee dalkan Sweden.

5/11/2012 4:27 AM EST
Jimco, May 11, 2012 (HOL) — Kooxo hubeysan ayaa dagaal kala hortagay ciidammo ka tirsan kuwa dowladda KMG ah oo saakay isku dayay inay fujiyaan goobo ganacsi oo laga dhistay hareeraha isgoyska Banaadir ee magaalada Muqdisho, iyadoo taasi ay keentay in isgoyskaas uu xirmo.

5/11/2012 4:22 AM EST
Jimco, May 11, 2012 (HOL) — Sarkaal ka tirsan ciidamada DKMG ah ayaa ku dhintay dagaal ciidammo kawada tirsan dowladd KMG ah ku dhexmarya xaafadda Suuq-Bacaad ee degmada Yaaqshiid, iyadoo guddoomiyaha degmada Huriwaa uu eedeyn u jeediyay ciidamada dowladda KMG ah iyo kuwa AMISOM.

5/11/2012 4:05 AM EST
Jimco, May 11, 2012 (HOL) — Guddiga xawaaladleyda Soomaalida gobolka Minnesota ee Mareykanka ayaa aad uga carooday bankiga US Bank oo sheegay inuusan diyaar u ahayn inuu la shaqeeyo xawaaladleyda Soomaalida, kaddib wada-xaajood muddo socday oo bankigaas uu kula jiray guddiga xawaaladleyda Soomaalida.

5/11/2012 3:41 AM EST
Jimco, May 11, 2012 (HOL) — Guddoomiyaha majmaca culumada Soomaaliyeed, Sheekh Axmed Dhicisow ayaa sheegay inay dib u dhigeen qabashada mudaaharaad ay ku wadeen inay maanta ka dhigaan Muqdisho, kasaoo ay uga soo horjeedaan dastuurka cusub ee Soomaaliya.

5/11/2012 3:35 AM EST
Jimco, May 11, 2012 (HOL) — Kooxo bastoolado ku hubeysan ayaa toogasho ku dilay laba qof, kuwaasoo warar kala duwan ay kasoo baxayaan, waxaana kooxihii dilka geystay u suurogashay inay ka baxsadeen goobtii ay dilka ka geysteen.