11/14/2018
Today from Hiiraan Online:  _
Wararka Maanta- Sabti, Jun 2 , 2012
Ciidamada Booliiska iyo Nabadsugidda DKMG Soomaaliya oo lagu wareejiyay Sugidda Ammaanka Deegaannada loo Barakacay


Sabti, June 02, 2012 (HOL) — Ciidamada Booliiska iyo kuwa nabad-sugidda DKMG ah ee Soomaaliya ayaa lagu wareejiyay ammaanka deegaannada loo barkaacay ee duleedka Muqdisho, halkaasoo ciidamada dowladda iyo kuwa AMISOM ay toddobaad ka hor ka qabsadeen xoogaggii Al-shabaab ee ka talin jiray.

Saraakiisha ciidamada dowladda KMG ah ayaa sheegay in howgallo laga sameeyay maanta deegaanka Ceelasha biyaha lagu soo qabtay taliyihii ciidamada Al-shabaab ee deegaankaas, iyadoo ay soo qabteen ciidammo gaar ah oo wajiga xirtay.

Ciidamada dowladda ayaa waxay saldhigyo ka sameysteen deegaannada loo barakacay, iyagoo halkaas si rasmi ah ugala wareegay ciidamada milateriga Soomaaliya oo ku sugnaa tan iyo markii ay Al-shabaab kala wareegeen.

"Deegaannada laga saaro Al-shabaab waxaa lagu wareejinayaa booliiska, ceebtii ka timaadana iyaga ayaa dusha u ridan doona," ayuu yiri taliye ku xigeenka ciidamada milateriga Soomaaliya, Jen. C/kariin Dhego-badan oo goobta ka hadlay.

Inkastoo ciidamada booliiska iyo kuwa nabadsugiddu ay la wareegeen deegaannada loo barakacay haddana jidkaas ayaa waxaa ka jirta cabsi weyn iyo weerarro ay mar walba kusoo qaadaan xoogagga Al-shabaab.

Baaritaanno ay ciidamada dowladdu ka sameeyeen deegaanka Ceelasha biyaha ayaa lagu soo qabtay dhallinyaro fara badan oo la sheegay inay Al-shabaab xiriir la lahaayeen, kuwaasoo loosoo qaaday dhinaca Muqdisho.

Saraakiisha ciidamada dowladdu ma sheegin xilliga maxkamad lasoo taagayo, balse waxay sheegeen in ruuxii aan dambi lahayn lasii dayn doono baaris kaddib, ruuxii dambi yeeshana yeesha la xukumi doono.

Maxamed Xaaji Xuseen, Hiiraan Online
[email protected]
Muqdisho, Soomaaliya







Click here
6/2/2012 9:09 AM EST
Sabti, June 02, 2012 (HOL) — Madaxda dalalka ay ka socdaan ciidamada AMISOM ee ku sugan Soomaaliya ayaa ka sheegay shirkii Istanbuul II ee kusoo xirmay dalka Turkiga inay gacan ka siinayaan DKMG ah ee Soomaaliya sidii ay ammaan uga dhigi lahayd dalka oo dhan.

6/2/2012 8:37 AM EST
Sabti, June 02, 2012 (HOL) — Shirkii Isbtanbuul laba ee looga hadlayay sidii ay uga gudbi lahayd Soomaaliya xilliga KMG ah ayaa waxaa kasoo baxay qodobbo muhiim ah oo tilmaamaya howlaha la doonayo in calaamku ka qabto Soomaaliya.

6/2/2012 7:53 AM EST
Sabti, June 02, 2012 (HOL) — Madaxweynihii hore ee dalka Masar, Xusni Mubaarak iyo wasiirkii arrimaha gudaha Xabiib Cadli ayaa maanta lagu xukumay xabsi daa'in kaddib dacwado socday tan iyo markii xukunka laga tuuray Mubaarak.

6/2/2012 7:04 AM EST
Sabti, June 02, 2012 (HOL) — Abaanduulaha ciidamada xoogga dalka, Jen. C/kariin Yuusuf Aadan (Dhego-badan) iyo taliyaha ciidamada nabadsugidda DKMG ah. Jen. Khaliif Axmed Ereg ayaa maanta lagu weeraray jidka Muqdisho iyo Afgooye u dhexeeya, waxaana mas'uuliyadda weerarradaas sheegatay Xarakada Al-shabaab.

6/2/2012 4:52 AM EST
Sabti, June 02, 2012 (HOL) — Ra'iisul wasaaraha dalka Turkiga, Recep Tayyip Erdogan oo ka hadlayay shirkii lagu soo gabgabeeyay Istanbuul ee looga hadlay sidii dib loogu soo celin lahaa deggenaashii Soomaaliya ayaa beesha caalamka ku war-geliyay inaysan ogaan karin xaaladda ka jirta Soomaaliya iyagoo aan tegin.

6/2/2012 4:34 AM EST
Sabti, June 02, 2012 (HOL) — Hal qof ayaa ku dhaawacmay kaddib markii xalay ay dadweyne careysan rabshado ka sameeyeen magaalada Garoowe ee xarunta Puntland, iyadoo dadkan ay muddo kooban xireen waddada weyn ee dhexmara degmadaas.

6/2/2012 4:24 AM EST
Sabti, June 02, 2012 (HOL) — Xoghayaha guud ee Qaramada Midoobay Ban Ki-Moon ayaa uga digay wufuuddii ka qaybgashay shirkii looga hadlay mustaqablka Soomaaliya ee labada maalmood ka socday magaalada Istanbuul ee dalka Turkiga in mar kale ay awoodda Soomaaliya la wareegaan dagaal-oogayaashii Soomaaliya.