3/29/2024
Today from Hiiraan Online:  _
Wararka Maanta- Isniin, Aug 20, 2012
Baydhabo oo si weyn looga xusay Ciidul-Fidriga iyadoo Munaasabad lagu qabtay ay ka qaybgaleen Ma'suuliyiinta Gobolka Bay

Isniin, Ogoosto 20, 2012 (HOL) — Munaasabadda Ciidul-fidriga ayaa si heer loogu dabaal-dagay magaalada Baydhabo ee xarunta gobolka Bay, taasoo lagu qabtay xarunta garoonka kubadda cagta ee Dr Ayuub, waxaana tukashada Salaadda ciidda ka qaygalay mas'uuliyiinta dowladda Soomaaliya ee gobolka Bay.

Guddoomiyaha gobolka Bay, Cabdifataax Maxamed Ibraahim (Geesey) oo ka hadlay kulanka ayaa sheegay in ciiddan ay kusoo beegantay iyadoo ciidamada dowladda oo garabsanaya kuwa Itoobiya ay gacanta ku hayaan degmada Baydhabo iyo qaar ka mid ah degmooyinka gobolka.

"Annagoo ka fa’iidaysanaya fursadan ciidda waxaan ka codsanayaa shacabka Soomaaliyeed inay is cafiyaan isuna tanaasulaan isna caawiyaan, waa in kuwa wax haysta ay farxada la qaybsadaan walaalahooda dhibaateysan ee aan wax haysan. Waxaa kaloo farxad ah in ciiddan ay kusoo beegantay innagoo rajo wanaagsan ka qabna inaan maalmaha soo socda Soomaaliya yeelato dowlad rasmi ah taasna waxay noo tahay farxad labaad," ayuu yiri Cabdifataax Geeseey.

Sidoo kale; munaasabadda waxaa ka hadlay guddoomiye ku xigeenka degmada Baydhabo, Maxamed Macallin Ibraahim (Dr Dhalo) iyo maas’uuliyiin kale, kuwaasoo ka halay ahmiyadda ciiddu u leedahay, iyagoo xusay in farxaddan bulshada reer Baydhabo uu maamulka la qeybsanayo ay ugu dambeysday sanooyin badan.

Madaxa xafiiska hoggaanka shacabka ee gobolka Bay, Saabir Colaad Cabdiraxmaan Goley oo isna hadlay ayaa tibaaxay qiimaha maalinta ciidda ay leedahay, wuxuuna u mahad naqay guddi-hoosaadyada xafiiska hoggaanka shacabka oo munaasabadda soo qabanqaabiyay.

Sidoo kale waxaa munaasabadaas ka hadlay guddoomiyaha Ahlusunna ee gobolka Bay, Sheekh Xasan Cali Hilowle oo halkaasi ka akhriyay khudabada ciidda ayaa xusay in munaasabaddan ay qiimo weyn u leedahay shacabka iyo mas'uuliyiinta ku sugan Baydhabo.

Ugu dambeyn, waxaa munaasabadda soo xiray guddoomiyaha gobolka isagoo u diray hambalyo dhammaan ummadda Soomaaliyeed meel kasta oo ay joogto, isagoo sheegay in ummad kasta ay leedahay ciid iyo munaasabado waaweyn, hayeeshee uu Ilaahay ummaddan Islaamka u jideeyey laba ciidood oo kala ah ciidul-fidriga iyo ciidul-adxa, kuwaasoo ay muslimiinta caalamka oo dhan u dabbaal-dagaan.

Maxamed Xaaji Xuseen, Hiiraan Online
[email protected]
Muqdisho, Soomaaliya













Click here
8/20/2012 12:48 PM EST
Isniin, August 20, 2012(HOL): Sidii aad kula socoteen wararkeennii hore waxaa hool ku yaalla garoonka diyaaradaha Muqdisho ka socotay dhaarinta xildhibaannada Baarlamaanka cusub ee Soomaaliya, kuwaasi oo tiradoodu dhammeyd 211 Mudane, waxaana dhaarintaas kaddib guddoomiye kumeel gaar ah loo doortay Muuse Shiikh Xasan Cabdulle Xasan.

8/20/2012 10:56 AM EST
Isniin, Ogoosto 20, 2012 (HOL) — Waxaa garoonka diyaaradaha Muqdisho goor dhow ka furmay shirka xildhibaannada cusub ee baarlamaanka Soomaaliya, kaasoo lagu dhaarin doono ayna ku dooran doonaan guddoomyaha kulammada si KMG ah u guddoomin doono inta laga dooranayo guddoomiye cusub.

8/20/2012 10:54 AM EST
Isniin, Ogoosto 20, 2012 (HOL) — Munaasabad si heer sare ah loosoo agaasimay oo laba loogu qaybinayay gobolka Hiiraan ayaa maanta lagu qabtay magaalada Muqdihso, iyadoo ay goojoog ka ahaayeen xildhibaanno iyo wasiirro kasoo jeeda gobolka Hiiraan.

8/20/2012 6:10 AM EST
Hay'adda Camuud (Amoud Foundation) ayaa soo gabagabeysay barnaamijyo isugu jiray afurin, biya-qaybin iyo kaalmo ay ugu talo-gashay ciidul-fidriga kuwaasoo ay ka qaybisay gobollada dalka qaarkood, iyadoo ay ka faa'iideysteen deeqahaas dad badan oo ay ku jireen indhoolayaal.

8/20/2012 5:29 AM EST
Isniin, Ogoosto 20, 2012 (HOL) — Kulan looga hadlayay ammaanka Muqdihso uuna shir guddoominayay madaxweynaha Soomaaliya, Shariif Sheekh Axmed ayaa xalay ka dhacay xarunta madaxtooyada Soomaaliya, waxaana kulankaas ka qayb-galay taliyaha guud ee AMISOM Andrew Gutti.

8/20/2012 3:28 AM EST
Isniin, Ogoosto 20, 2012 (HOL) — Ra'iisul wasaaraha Soomaaliya, C/weli Maxamed Cali ayaa sheegay in dowladda cusub ee la dhisayo ay xoogga saari doonto dib u dhiska dalka 20-sano oo dagaallo kaddib ayna la dagaalami doonto burcadbadeedda oo uu sheegay inay dhibaato ku hayaan dhaqaalaha caalamka.

8/20/2012 2:47 AM EST
Isniin, Ogoosto 20, 2012 (HOL) — Ugu yaraan afar qof oo shacab ah ayaa ku dhaawacmay qaraxyo siyaabo kala duwan xalay uga dhacay degmooyinka Muqdisho kuwaasoo lagu weeraray booliiska Soomaaliya iyo booliiska AMISOM.

8/20/2012 2:44 AM EST
Isniin, Ogoosto 20, 2012 (HOL) — Iyadoo maanta ay ku eg-tahay xilliga DKMG ah ee Soomaaliya ayaa waxaa magaalada Muqdisho laga dareemayaa qabanqaabada kulankii ugu horreeyay oo ay yeelanayaan xidlhibaannada cusub ee baarlamaanka Soomaaliya, kuwaasoo isla maanta la dhaafin doono guddoomiye KMG ah dhexdooda ka xulanaya.