Wednesday, May 22, 2013
Today from Hiiraan Online:  _
Wararka Maanta- Sabti, Jan 5 , 2013
Taliska AMISOM oo sheegay in Sannadkii hore ee 2012 ay guulo waaweyn ka gaareen howgalkooda Soomaaliya

Sabti, Jannaayo 05, 2013 (HOL) — Taliska howgalka ciidamada Midowga Afrika ee AMISOM ayaa sheegay in sannadkii hore ay guulo la taaban karo ka gaareen howgalladooda Soomaaliya, iyagoo sheegay inay xoojin doonaan howgalka ay kula jiraan Al-shabaab.

Jen. Andrew Gutti oo saxaafadda kula hadlay Muqdisho ayaa sheegay inay dhul ballaaran kaga qabsadeen Al-shabaab howalladii sannadkii hore dhacay, isagoo sheegay in AMISOM ay hadda ka howgalayso gobollo ku yaalla bartamaha iyo Koonfurta Soomaaliya.

“Howgalka AMISOM wuxuu galay wajigii lahaad oo ay isku ballaarinayaan iyo inay ciidamadooda gaarsiiyaan deegaanno ka fog Muqdisho,” ayuu yiri Jen. Gutti oo intaas ku daray in howgalladoodu ay socon doonaan.

Taliyaha Ciidamada Uganda ee qaybta ka ah AMISOM, Micheal Odongo ayaa isaguna sheegay in ciidamadooda ay hormuud u ahaayeen howgalladii looga qabsaday Al-shabaab deegaannada badan oo ay ka mid yihiin Jowhar iyo Marko.

“Ciidamada AMISOM waxay hadda gaareen deegaanno ka badan Muqdisho, runtiina howgalkeennu wuu ka duwan yahay kuwii sannadihii hore oo aan ku sugnayn oo keliya Muqdisho,” ayuu yiri taliyaha ciidamada Uganda ee ku sugan Muqdisho.

Sidoo kale, Maj. Henry Obbo oo ka mid ah saraakiisha ciidamada Uganda ee ku sugan Soomaaliya ayaa sheegay in sannadkii hore uu ahaa sannadkii guul-darrada ee Al-shabaab, wuxuuna xusay in AMISOM ay guulo waaweyn ka gaartay dagaalladii ay la gashay Al-shabaab.

Afhayeenka AMISOM, Col. Cali Aadan Xumud oo saxaafadda la hadlay ayaa isaguna sheegay in ciidamada AMISOM ay guulo ku tallaabsadeen sannadkii hore, ayna howgalkooda xoojin doonaan, isagoo dhallinyarada Al-shabaab ugu baaqay inay ka baxaan falalka ay ku jiraan.

“Waxaa jira dagaalyahanno Al-shabaab ka tirsanaan jiray oo isku soo dhiibay AMISOM, kuwaas waxay haystaan daryeel iyo waxbarasho, cid walba oo isku soo dhiibta ciidamadeenana waxay heli doontaa daryeen iyo waxbarasho,” ayuu yiri afhayeenka AMISOM.

Ciidamada AMISOM ee ku sugan Soomaaliya  oo tiradoodu tahay in ka badan 17,000 oo askari ayaa waxay sannadkii hore la wareegeen deegaanno ay ka talin jirtay Al-shabaab, kuwasoo ay ka mid yihiin, Afgooye, Balcad, Marko, Jowhar iyo Kismaayo.

Maxamed Xaaji Xuseen, Hiiraan Online
maxuseen@hiiraan.com
Muqdisho, Soomaaliya




Post your comments

Siyaasi C/llaahi Cali (Ciddi-Libaax): "Waxan ahay murashax Madaxweynaha Puntland, Doorashaduna waxay dhacaysaa 8-da bishan"
1/5/2013 2:07 PM EST
Sabti, Jannaayo 05, 2013 (HOL) — Siyaasi Cabdilaahi Cali Barre (Ciddi Libaax) oo ah aqoonyahan si weyn looga yaqaan bariga Africa iyo Khaliijka, ayaa shaaca ka qaaday in uu yahay musharrax u taagan xilka madaxtinimada ee Puntland.

Madaxweynaha Jabuuti oo weydiistay Eritrea inay sii dayso Maxaabiista ay Jabuuti kaga qabsatay dagaalkii 2008
1/5/2013 1:51 PM EST
Sabti, Jannaayo 05, 2013 (HOL) — Madaxweynaha dalka Jabuuti, Ismaaciil Cumar Geelle ayaa weydiistay xukuumadda Eritrea ee ay dariska yihiin inay sii dayso maxaabiista Jabuutiyaanka ah ee ay ku qabsatay dagaalkii Jabuuti iyo Eritrea dhexmaray bishii Juun ee sannadkii 2008, sida lagu daabacay shabakadda wasaaradda arrimaha dibadda Itoobiya.

Dagaal culus oo Ciidamada Dowladda Somalia, kuwa Itoobiya iyo Al-shabaab ku dhexmaray Gobolka Gedo
1/5/2013 12:47 PM EST
Sabti, Jannaayo 05, 2013 (HOL) — Dagaal khasaare badan dhaliyay ayaa ku dhexmaray gellinkii dambe ee maanta deegaan u dhexeeya deegmooyinka Luuq iyo Garbahaarey iyadoo aan si dhab ah loo ogeyn inta uu le’eg yahay khasaaraha ka dhashay dagaalka.

Koox hubeysan oo xalay weeraray Hoteel uu Magaalada Boosaaso ka degen yahay Wasiirka Amniga Puntland
1/5/2013 8:47 AM EST
Sabti, Jannaayo 05, 2013 (HOL) — Dabley hubeysan oo ana haybtooda la garanayn ayaa xalay saqdii dhexe weerar gaadmo ah ku qaaday hoteelka Panorama oo ku yaalla dhinaca Koonfureed ee magaalada Boosaaso, halkasa oo ay deggen yihiin mas’uuliyiin ka tirsan dowlad-goboleedka Puntland.

Xildhibaannada Baarlamaanka Soomaaliya oo kulan ay Maanta yeesheen ku doortay Hoggaanka Guddi-hoosaadyada
1/5/2013 8:35 AM EST
Sabti, Jannaayo 05, 2013 (HOL) — Kulankii baarlamaanka Soomaaliya ee maanta oo ay soo xaadireen 170 xildhibaan ayay guddi-hoosaadyada baarlamaanku ay ku doorteen guddoomiye, ku xigeen iyo xoghayaha, iyadoo guddiga doorashada galay ka mid ah guddiga difaaca iyo guddiga xuquuql insaanka, haweenka iyo arrimaha bani’aadamnimda.

Tartan Kubada Cagta ah oo ka Furmay Garoon ay Dayactireen saraakiisha ka socda Jabuuti ee ku sugan Baladweyne
1/5/2013 3:59 AM EST
Sabti, Jannaayo, 05, 2013 (HOL) – Tartan kubada cagta ah oo ay isku arkayaan kooxo ka kala socda afarta xaafadood oo ay ka kooban tahay magaalada Baladweyne ee xarunta gobollka Hiiraan ayaa galinkii danbe ee maalintii shalay ka furmay garoonka kubadda cagta ee Lama-galaay.

Ciidamada Huwanta ah iyo Xoogag Taabacsan Al-shabaab oo ku dagaalamay duleedka Magaalada Kismaayo
1/5/2013 3:03 AM EST
Sabti, Jannaayo 05, 2013 (HOL) —Iska-horimaad xooggan ayaa xalay duleedka magaalada Kismaayo ku dhexmaray ciidamada dowladda Soomaaliya, kuwa Raaskaambooni iyo Militariga Kenya ee qeybta ka ah AMISOM oo isku dhinac ah iyo xoogagga xarakada Al-shabaab.

Ciidamada Dowladda Soomaaliya iyo kuwa AMISOM oo si wadajir ah howgallo uga wada Xaafadaha Magaalada Jowhar
1/5/2013 1:01 AM EST
Sabti, Jannaayo 05, 2013 (HOL) — Ciidamada dowladda Soomaaliya oo gacan ka helaya kuwa AMISOM ayaa saakay howgallo ballaaran ka billaabay xaafadaha kkala duwan ee degmada Jowhar ee xarunta gobolka Shabeellada dhexe.

Qarax sababay khasaare nafeed oo xalay ka dhacay Xerada Dhagaxley oo ka mid ah Xeryaha Qoxootiga ee Dhadhaab
1/5/2013 12:50 AM EST
Sabti, Jannaayo 05, 2013 (HOL) — Ugu yaraan laba qof ayaa ku dhintay, shan kalena way ku dhaawacmeen kaddib markii uu xalay ka dhacay qarax xerada Dhagaxleey oo ka mid ah xeryaha qoxootiga Dhadhaab oo ay ku jiraan in ka badan nus malyuun qof oo qoxooti Soomaaliyeed ah.