12/11/2019
Today from Hiiraan Online:  _
Wararka Maanta- Arbaco, Feb 27, 2013
Ururka Dhallinyarada SYL II oo Dufcaddii Saddexaad oo Arday ah u soo Gaba-gabeeyay Tababarro kala duwan (SAWIRRO)



Arbaco, Feberaayo 27, 2013 (HOL) — Ururka dhallinyarada SYL II ayaa maanta xaflad qalin-jebin ah u sameeyay illaa 150 arday oo ahaa dufcaddii saddexaad oo ka qalin-jebiya machadka SYL II ee xirfadaha shaqo abuurka, kaasoo si lacag la’aan ah wax loogu barayay.

Xafladda qalin-jebinta oo ka dhacday xarunta dhexe ee ururka SYL II ee magaalada Muqdisho ayaa waxaa kasoo qayb-galay howl-wadeennada kala duwan ee ururka, waaliddiin, marti-sharaf iyo ardaydii ka qalin-jabisay qaybaha kala duwan ee machadka farsamada gacanta sida: harqaanka, makaanikada, faryaamada, sida ganacsiga loo abuuro iyo horumarinta bulshada.

Mid ka mid ah howl-wadeennada ururka SYL II ayaa ku amaanay ardayda qalin-jabisay sida ay ugu dhabar adeygeen muddadii ay wax-baranayeen, isagoo ugu baaqay in dhallinyarada kale iyo bulshadaha ay uga faa’iideeyaan  farsamooyinka ay barteen.

Sidoo kale, qaar ka mid ah ardaydii qalin-jabisay ayaa waxay sheegeen inay ka faa’iideen tababarka waxyaabo aan lasoo koobi karin, iyagoo tilmaamay in shalay iyo maanta aysan isugu mid ahayn, ayna maanta bulshada wax la qabsan karaan.

Ardayda ka mid ahayd kuwa maanta qalin-jabiyay ee shahaadada la siiyay ayaa sheegtay in SYL II ay u ahayd toosh u iftiimisay waxbarashada iyo sida ay bulshada ula noolaan karaan, isla markaana ay u faa’iideysay in si lacag la’aan ah ay ku bartaan xirfado shaqo oo kala duwan.

Xoghayaha naadiga kubadda cagta ee Elman, Anas Cali Maxamuud oo ka mid ahaa dadkii lagu casuumay munaasabadda qalin-jabinta ayaa sheegay in SYL II ay dhallinyarada u qabteen waxyaabo badan oo baal dahab ah galay, isagoo xusay in dhallinyarada ay kasoo saareen dhanka jahliga oo ay dhanka aqoonta u soo weeciyeen, taasoo ay bulshada marqaati ka tahay.

Xasan Yaxye Cusmaan oo ku hadlayay magaca waalidiinta ayaa ugu baaqay dhallinyarada dhameysatay waxbarashada inay bulshada ugu faa’iideeyaan wixii ay barteen, wuxuuna uu uga mahad-celiyay SYL II in maanta ay soo saareen dhallinyaro bulshada wax u qabato, maadaama ay heleen xirfado shaqo ay ku abuuran karaan .

Macallin Barre Bangaladesh oo kalmado aad muhiim u ahaa ka jeediyay munaasabadda ayaa sheegay in waxyaabaha muhiimka ah ee ay barteen dhallinyarada ay isugu jirtay mid dadban iyo mid toos ah, isagoo xusay in maanta dhallinyarada mooraalkooda wanaagsan yahay, dadkana ay ku dhex noolaan karaan, isagoo ugu baaqay inay bulshada u adeegaan, wuxuuna ku soo xiray hadalkiisa maanso aad iyo aad u qiimo badan.

Intii munaasabadu socotay ayaa waxaa kooxda Rajo Band ee naadiga SYL II ay kusoo bandhigeen suugaan iyo ruwaayad hal-ku-dhiggeedu ahaa ABAAL, taasoo ka hadlaysay faa’iidada waxbarashada iyo aqoontu ay leeyihiin.

Ugu dambeyn, maamulka iyo macallimiinta SYL II waxay abaalmarin siiyeen shan arday oo kaalimaha koowaad ka galay shanta maado oo ay baranayeen waxayna heleen shahaadooyin iyo abaal-marin gaar ah, waxaana ardaydan saddex ka mid ah ay ahaayeen gabdho, iyadoo dhammaan ardayda qalin-jabiyay ay ahaayeen 150 arday, kuwaasoo dhammaantood la guddoonsiiyay shahaadada muujinayay waxbarashadooda.

Ururka dhallinyarada SYL II ayaa si weyn uga qayb-qaata horumarinta dhallinyarada, wacyi-gelinta iyo xirfado shaqooyin loogu abuuro, waxaana dhallinyaro badan oo xirfad la’aan ah ay noqdeen kuwo ka faa’iida xirfadihii la baray iyagoo haatan ku shaqeysta.












Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
2/27/2013 12:13 PM EST
Arbaco, Feberaayo 27, 2013 (HOL) — Xaalad biyo la'aaneed oo baahsan ayaa soo food saartay dadweynaha ku dhaqan magaalada Laascaanood ee Gobolka Sool, kaddib markii ay ilo-biyoodyadii deegaanka oo dhami ay gabaabsi noqdeen.

2/27/2013 11:52 AM EST
Arbaco, Feberaayo 27, 2013 (HOL) — Kulan ballaaran oo ay isugu yimaadeen qaar kamid ah beelaha dega gobollada Jubooyinka islamarkaasina ka dhacay Hotel City Palace ee magaalada Muqdisho ayaa si kulul loogu cambaareeyay dowladda Kenya oo lagu eedeeyay in ay faraha kula jirto arimaha Jubooyinka.

2/27/2013 8:43 AM EST
Arbaco, Feberaayo 27, 2013 (HOL) — Munaasabad siweyn loo soo agaasimay islamarkaana ay ka qeyb-galeen mas’uuliyiinta maamulka gobollka, saraakiisha ciidamada Jabuuti AMISOM, odayaasha dhaqanka iyo xubno ka kala socday qeybaha bulshada rayidka oo lagu qabtay magaalada Baladweyne aya lagu soo bandhigay waxqabadka ururka midowgga dhalinyarrada gobollka Hiiraan [Hiran Youth Development Association].

2/27/2013 8:07 AM EST
Arbaco, Feberaayo 27, 2013 (HOL) — Ugu yaraan 35-qof ayaa ku dhintay shil gaari oo maanta ka dhacay magaalada Mwingi oo ku taalla duleedka magaalada Nairobi ee xarunta Kenya, iyadoo ay ku dhaawacmeen 70 qof oo kale.

2/27/2013 7:27 AM EST
Arbaco, Feberaayo 27, 2013 (HOL) — Maxkamadda ciidamada qalabka sida ee Puntland ayaa maanta xukun ku ridey dad ku eedeysnaa in ay ka danbeeyeen dilkii Sheekh/Dr. Axmed Xaaji Cabdiraxmaan oo kamid ahaa culimada waaweyn ee Soomaaliya.

2/27/2013 7:25 AM EST
Arbaco, Feberaayo 27, 2013 (HOL) — Ciidamada booliiska magaalada Baladweyne ayaa gacanta ku dhigay maanta oo Arbaco ah in ka badan 25 dhalinyarro ah oo sida ay sheegeen saraakiisha booliiska Baladweyne uga shakisan yihiin in ay ka tirsan yihiin Al-shabaab.

2/27/2013 2:55 AM EST
Arbaco, Feberaayo 27, 2013 (HOL) — Magaalada Jabuuti ee xarunta dalka Jabuuti ayaa waxaa labadii maalmood ee ugu dambeeyay ka socday isku-dhacyo u dhexeeyay ciidamada ammaanka Jabuuti iyo taageerayaasha xisbiga mucaaradka ah ee USN oo ka cabanaya natiijadii doorashooyinkii golaha baarlamaanka Jabuuti.

2/27/2013 2:21 AM EST
Arbaco, Feberaayo 27, 2013 (HOL) — Ugu yaraan shan qof oo labada dhinac ah ayaa ku dhintay tiro intaas ka badnna way ku dhaawcmeen dagaal culus oo ciidamada dowladda iyo xoogagga Al-shabaab ku dhexmaray gabal-dhicii shalay deegaanka Daynuunaay oo 18-km u jira degmada Baydhabo.

2/27/2013 2:03 AM EST
Arbaco, Feberaayo, 27, 2013 (HOL) -- Weerar loo adeegsaday Bam gacmeed ayaa fiidnimadii xalay waxaa ay kooxo hubeysan ku qaadeen guri ku yaalla xaafadda Howl-wadaag ee magaalada Baladweyne, sida ay HOL u xaqiijiyeen saraakiisha ciidamada booliiska.

2/27/2013 1:50 AM EST
Arbaco, Feberaayo 27, 2013 (HOL) — Hay’adda Bancroft iyo AMISOM ayaa shalay tababar uga furay Muqdisho saraakiil ka tirsan ciidamada Milateriga dowladda Soomaaliya, kaasoo socon doona muddo laba toddobaad ah.

2/27/2013 1:25 AM EST
Arbaco, Feberaayo 27, 2013 (HOL) — Dekedda weyn ee Muqdisho ayaa laga dhoofiyay markii ugu horreysay xalay xoolo nool oo ganacsi ah, kaddib sannado badan, iyadoo munaasabadda furitaanka ay ka qaybgaleen xubno ka socday dowladda Soomaaliya.

2/27/2013 12:50 AM EST
Arbaco, Feberaayo 27, 2013 (HOL) — Ciidamada dowladda Soomaaliya iyo kuwa AMISOM oo iskaashanaya ayaa 7:00 aroonimo saakay oo Arbaco ah si nabad ah kula wareegay degmada Buur-hakaba ee gobolka Bay, kaddib markii ciidamadu labaadii maalmood ee lasoo dhafay ku dhawaanayeen degmadaas.