5/19/2019
Today from Hiiraan Online:  _
Wararka Maanta- Arbaco, Feb 27, 2013
Ciidamada Dowladda Somalia iyo kuwa AMISOM oo aroortii saaka si Nabad ah kula wareegay Degmada Buurhakaba



Arbaco, Feberaayo 27, 2013 (HOL) — Ciidamada dowladda Soomaaliya iyo kuwa AMISOM oo iskaashanaya ayaa 7:00 aroonimo saakay oo Arbaco ah si nabad ah kula wareegay degmada Buur-hakaba ee gobolka Bay, kaddib markii ciidamadu labaadii maalmood ee lasoo dhafay ku dhawaanayeen degmadaas.

Abaanduulaha ciidamada xoogga dalka, Jen. C/kariin Yuusuf Aadan (Dhego-badan) oo warbaahinta la hadlay ayaa sheegay in ciidamada dowladda iyo kuwa AMISOM ay la wareegeen degmada Buurhabaka iyadoo uusan dhicin wax dagaal ah.

“Ciidamada dowladda iyo kuwa walaalaha ah ee AMISOM waxay saakay si nabad ah kula wareegeen degmada Buurhakaba, xaaladda degmaduna waa mid deggen,” ayuu yiri Jen. Dhego-badan oo intaas ku daray in ciidamadu ay isku diyaarinayaan inay isku furaan Baydhabo iyo Buurhabaka.

Goobjoogayaal ku sugan degmada Buurhabaka ayaa iyagna sheegay inay soo galeen saakay ciidamada dowladda Soomaaliya iyo kuwa AMISOM, ayna xaaladdu tahay mid deggen, iyadoo aan la ogeyn halka ay aadeen xoogaggii Al-shabaab.

Wasiirka gaashaandhigga Soomaaliya, C/xakiin Maxamuud Xaaji Fiqi ayaa isaguna sheegay in ciidamada dowladda iyo kuwa AMISOM ay gudaha u galeen degmada Buurhakaba ee gobolka Bay, isagoo la wareegisteeda ku tilmaamay.

“Waxaan ciidamada dowladda iyo kuwa AMISOM ugu hambalyeynayaa guusha ay ka gaareen degmada Buurhakaba, guushanna waa mid u soo hoyatay shacabka Soomaaliyeed oo dhan,” ayuu yiri C/kariin Fiqi.

Degmada Buurhakaba oo 187-km dhinaca Waqooyi-galbeed kaga beegan Muqdisho ayaa waxay noqonaysaa degmadii afaraad oo ka tirsan gobolka Bay oo Al-shabaab laga qabsado tan iyo sannadkii hore.

Xarakada Al-shabaab oo aan la ogeyn halka ay ciidamadoodii ku sugnaa degmada Buurhakaba aadeen ayaan weli ka hadlin la wareegista ay ciidamada dowladda iyo kuwa AMISOM kala wareegeen degmada Buurhakaba.

Maxamed Xaaji Xuseen, Hiiraan Online
[email protected]
Muqdisho, Soomaaliya










Click here
2/27/2013 12:50 PM EST
Arbaco, Feberaayo 27, 2013 (HOL) — Ururka dhallinyarada SYL II ayaa maanta xaflad qalin-jebin ah u sameeyay illaa 150 arday oo ahaa dufcaddii saddexaad oo ka qalin-jebiya machadka SYL II ee xirfadaha shaqo abuurka, kaasoo si lacag la’aan ah wax loogu barayay.

2/27/2013 12:13 PM EST
Arbaco, Feberaayo 27, 2013 (HOL) — Xaalad biyo la'aaneed oo baahsan ayaa soo food saartay dadweynaha ku dhaqan magaalada Laascaanood ee Gobolka Sool, kaddib markii ay ilo-biyoodyadii deegaanka oo dhami ay gabaabsi noqdeen.

2/27/2013 11:52 AM EST
Arbaco, Feberaayo 27, 2013 (HOL) — Kulan ballaaran oo ay isugu yimaadeen qaar kamid ah beelaha dega gobollada Jubooyinka islamarkaasina ka dhacay Hotel City Palace ee magaalada Muqdisho ayaa si kulul loogu cambaareeyay dowladda Kenya oo lagu eedeeyay in ay faraha kula jirto arimaha Jubooyinka.

2/27/2013 8:43 AM EST
Arbaco, Feberaayo 27, 2013 (HOL) — Munaasabad siweyn loo soo agaasimay islamarkaana ay ka qeyb-galeen mas’uuliyiinta maamulka gobollka, saraakiisha ciidamada Jabuuti AMISOM, odayaasha dhaqanka iyo xubno ka kala socday qeybaha bulshada rayidka oo lagu qabtay magaalada Baladweyne aya lagu soo bandhigay waxqabadka ururka midowgga dhalinyarrada gobollka Hiiraan [Hiran Youth Development Association].

2/27/2013 8:07 AM EST
Arbaco, Feberaayo 27, 2013 (HOL) — Ugu yaraan 35-qof ayaa ku dhintay shil gaari oo maanta ka dhacay magaalada Mwingi oo ku taalla duleedka magaalada Nairobi ee xarunta Kenya, iyadoo ay ku dhaawacmeen 70 qof oo kale.

2/27/2013 7:27 AM EST
Arbaco, Feberaayo 27, 2013 (HOL) — Maxkamadda ciidamada qalabka sida ee Puntland ayaa maanta xukun ku ridey dad ku eedeysnaa in ay ka danbeeyeen dilkii Sheekh/Dr. Axmed Xaaji Cabdiraxmaan oo kamid ahaa culimada waaweyn ee Soomaaliya.

2/27/2013 7:25 AM EST
Arbaco, Feberaayo 27, 2013 (HOL) — Ciidamada booliiska magaalada Baladweyne ayaa gacanta ku dhigay maanta oo Arbaco ah in ka badan 25 dhalinyarro ah oo sida ay sheegeen saraakiisha booliiska Baladweyne uga shakisan yihiin in ay ka tirsan yihiin Al-shabaab.

2/27/2013 2:55 AM EST
Arbaco, Feberaayo 27, 2013 (HOL) — Magaalada Jabuuti ee xarunta dalka Jabuuti ayaa waxaa labadii maalmood ee ugu dambeeyay ka socday isku-dhacyo u dhexeeyay ciidamada ammaanka Jabuuti iyo taageerayaasha xisbiga mucaaradka ah ee USN oo ka cabanaya natiijadii doorashooyinkii golaha baarlamaanka Jabuuti.

2/27/2013 2:21 AM EST
Arbaco, Feberaayo 27, 2013 (HOL) — Ugu yaraan shan qof oo labada dhinac ah ayaa ku dhintay tiro intaas ka badnna way ku dhaawcmeen dagaal culus oo ciidamada dowladda iyo xoogagga Al-shabaab ku dhexmaray gabal-dhicii shalay deegaanka Daynuunaay oo 18-km u jira degmada Baydhabo.

2/27/2013 2:03 AM EST
Arbaco, Feberaayo, 27, 2013 (HOL) -- Weerar loo adeegsaday Bam gacmeed ayaa fiidnimadii xalay waxaa ay kooxo hubeysan ku qaadeen guri ku yaalla xaafadda Howl-wadaag ee magaalada Baladweyne, sida ay HOL u xaqiijiyeen saraakiisha ciidamada booliiska.

2/27/2013 1:50 AM EST
Arbaco, Feberaayo 27, 2013 (HOL) — Hay’adda Bancroft iyo AMISOM ayaa shalay tababar uga furay Muqdisho saraakiil ka tirsan ciidamada Milateriga dowladda Soomaaliya, kaasoo socon doona muddo laba toddobaad ah.

2/27/2013 1:25 AM EST
Arbaco, Feberaayo 27, 2013 (HOL) — Dekedda weyn ee Muqdisho ayaa laga dhoofiyay markii ugu horreysay xalay xoolo nool oo ganacsi ah, kaddib sannado badan, iyadoo munaasabadda furitaanka ay ka qaybgaleen xubno ka socday dowladda Soomaaliya.