Janaayo 12, 2007 Magaalada San Diego waxaa ka dhacay bannaanbax lixaad leh oo lagaga soo horjeedo weerarka gardaradda ah ee ay ciidamada Itoobiyaanku ku qabsadeen Koonfurta Soomaaliya, iyo duqeynta ay dayuuradaha Maraykanku u geysteen shacabka deggan Gobollada Jubbooyinka ee Soomaaliya.
Bannaanbaxaas oo ay ka soo qeyb galeen dad lagu qiyaasay 250 ilaa iyo 300 oo qof wuxuu ahaa mid si wanaagsan loo soo agaasimey. Dadkaas oo isugu jirey Haween, carruur, aqoonyahano, cuqaal, iyo dhallinyarada oo ka kala yimid magaalooyinka Koonfurta California waxay socod dheer ku mareen waddada faras magaalaha ee San Diego, halkaas oo ay horjoogsadeen xarunta Magaalada San Deigo looga taliyo.
Dadkii halkaas isugu soo baxay oo watay boodhadh waaweyn iyo makarafoono waxay ku dhawaaqayeen erayo ay kaga so horjeedaan joogitaanka ciidamada Itoobiya ee ciida Soomaaliya iyo duqeynta ay dayuuradaha Maraykanku u geysanayaan shacabka aan waxba galabsan ee Soomaaliyeed.