Arbaco, January 7, 2026 (HOL) - Bannaanbax ballaaran ayaa maanta ka dhacay caasimadda Muqdisho, gaar ahaan aagga Daljirka Daahsoon, kadib markii dadweyne tiro badan ay isugu soo baxeen mudaharaad ay ku muujinayaan diidmo ay ka qabaan waxa ay ku tilmaameen faragelin dibadeed oo kusii kordhaysa arrimaha Soomaaliya iyo guud ahaan gobolka.
Bannaanbaxa waxaa ka qaybgalay culimo Soomaaliyeed, odayaal dhaqameed, aqoonyahanno iyo qaybaha kala duwan ee bulshada, kuwaas oo dhammaantood adkeeyay baahida loo qabo in la ilaaliyo midnimada, madaxbannaanida iyo qiyamka diimeed ee dalka.
Dadka mudaharaadayay ayaa watay boorar iyo halku-dhegyo ku baaqaya in la joojiyo faragelin kasta oo shisheeye oo wax u dhimaysa go’aanka iyo jiritaanka qaranka Soomaaliyeed.
Intii ay socotay isu-soo-baxa, culimo Soomaaliyeed ayaa jeediyay khudbado ay uga digeen cawaaqibka diimeed iyo midka bulsho ee ka dhalan kara haddii aan laga hortagin faragelin ay sheegeen in ay khatar ku tahay aqoonsiga iyo wadajirka ummadda.
Culimadu waxa kale oo ay fariimo u direen hoggaanka Somaliland, iyagoo ugu baaqay in dib loo eego tallaabooyin iyo xiriirro ay sheegeen in ay dhaawici karaan midnimada Soomaaliya.
Sidoo kale, abwaanno iyo hal-abuurro dhaqameed ayaa madasha ka tiriyay gabayo iyo suugaan kale oo Soomaaliyeed, kuwaas oo xambaarsanaa farriimo ku saabsan midnimo qaran, mas’uuliyad wadareed iyo feejignaan laga qaato saameynta mustaqbalka fog ee ku imaan karta dalka haddii la fududeeyo soo-gelitaanka quwado shisheeye oo muran dhalinaya.
Bannaanbaxan ayaa ku soo beegmaya xilli ay jirto xiisad siyaasadeed oo ka dhalatay horumarro iyo go’aanno goboleed oo muran badan dhaliyay, kuwaas oo si weyn looga dooday gudaha dalka iyo qurbo-joogta Soomaaliyeed.
Qaban-qaabiyeyaasha bannaanbaxa ayaa sheegay in isu-soo-baxa uu yahay mid nabadeed, iyagoo ugu baaqay madaxda qaranka iyo beesha caalamka in ay ixtiraamaan madaxbannaanida Soomaaliya iyo arrimaheeda gudaha, Waxay sidoo kale dalbadeen in si degdeg ah loo sii daayo culimo diimeed ay sheegeen in lagu xiray Hargeysa.
Bannaanbaxayaasha ayaa ku adkeystay in codkooda uu yahay mid ka tarjumaya dareenka guud ee shacabka Soomaaliyeed ee ku aaddan difaaca diinta, qarannimada iyo wadajirka ummadda.