5/27/2024
Today from Hiiraan Online:  _
Wararka Maanta- Khamiis, Feb 2 , 2023
Wasiir Koore: Siyaasada dowladu waxa weeyi in dadka Laascaanood anay dareemin cabudhin
 

Khamiis, February, 2, 2023 (HOL) -Wasiirka Warfaafinta Somaliland Saleebaan Yuusuf Cali Koore, ayaa sheegay in ciidanka magaalada Laascaanood looga saaray si anay dadku u dareemin cabudhin.

Waxa uu sheegay in ay ogyihiin nadaam daro hada ka jirta Laascaanood, lakiin ciidanka magaalada laga saaray si shacabku anay u dareemin in awood ciidan loo isticmaalayo, isla markaana la dareensiiyo in ciidanku ay dadkoodii yihiin.

"Buuqa magaalada ka jira waa la ogyahay, ciidanka qaranka iyo dhamaan siyaasada dowladu waxay noqotay, in dadku anay dareemin in la cabudhinayo, ama awood ciidan loo isticmaalayo, ee dadku dareemaan in ciidanka iyo dowladu yihiin dadkoodii oo ay jeceliyiin oo anay dhib la rabin" ayuu yidhi Wasiir Koore.

Waxa uu sheegay in iyadoo la ilaalinayo nabada ciidamada habeen madow laga saaray magaalada, isla markaana magaalada ay joogaan ciidamo deegaanka ah oo laysla ogolyahay, waxa uu sheegay in xukuumadu ay rabto in ay wanaag iyo wadahadal ku dhamayso waxkasta.

Waxaanu sheegay in bulshadu fikirka ku kala duwanyihiin, lakiin ay Somaliland wada leeyihiin, isla markaana anay jirin cid cid kale ka saari karta, lakiin loo bahanyahay in wadahadal waxkasta lagu dhameeyo.

Wasiirka ayaa ka hadlayay munaasibad lagu xusayay xaflada xuska sannad guurada 29aad ee Ciidanka Millateriga Somaliland oo lagu qabtay dulleedka Laascaanood.

Abdilahi Geel-maal, Hiiraan Online
[email protected]