4/19/2024
Today from Hiiraan Online:  _
Wararka Maanta- Axad, Apr 30, 2023
Ciidamada dowladda iyo kuwa dib u xureynta oo burburiyay Saldhigyo Al-shabaab ku laheyd Shabeellaha Dhexe

Axad, April, 30, 2023 (HOL) - Ciidanka xoogga dalka Soomaaliya, gaar ahaan kuwa Kumaandooska Danab oo kaashanaya ciidamada dib u xureynta deegaanka ayaa howlgalo ka dhan ah Ururka Al-shabaab ka sameeyay sacaadahi lasoo dhaafay deegaano ka tirsan gobolka Shabeellaha Dhexe.

Ciidamada is garabsanaya ayaa howlgalka si gaar ah uga fuliyay deegaanka Ceel Cali godle iyo deegaano kale oo dhinaca Waqooyi kaga beegaan deegaanka Ceel Cali Axmed ee gobolka Shabeellaha Dhexe.

Saraakiisha hoggaamineysay ciidamada howlgalka fuliyay ayaa Warbaahinta qaranka waxay u sheegeen in howlgalada ay ku burburiyeen Saldhigyo ciidamada Al-shabaab ku lahayeen deegaanadaasi oo ay kasoo abaabuli jireen weerarada.

Waxay sidoo kale sheegeen saraakiisha iney sii wadayaan howlgalada noocaan ah oo ay kula dagaalamayaan kooxda Al-shabaab ilaa inta ay ka xureynayaan  deegaanada ay kaga sugan yihiin Shabaab gobolka Shabeellaha Dhexe.

Ciidamada dowladda iyo kuwa dadka deegaanka ayaa haatan kawada qeybo ka mid ah gobolada dalka wajiga labaad ee howlgalada lagu doonayo in Al-shabaab dalka looga xureynaayo.